ഇന്നറിയാം, അന്തിമ പോരാട്ട ചിത്രം; 257 പേരുടെ പത്രിക തള്ളി

തിരുവനന്തപുരം: നിയമസഭാ തിരഞ്ഞെടുപ്പിൽ നാമനിർദ്ദേശ പത്രിക നൽകിയ 1,254 സ്ഥാനാർത്ഥികളിൽ 257 പേരുടെ പത്രിക ചൊവ്വാഴ്ച നടന്ന സൂക്ഷ്മപരിശോധനയിൽ തള്ളി. 12 പേർ പത്രിക പിൻവലിച്ചു. മത്സരരംഗത്തുള്ളത് 985 പേർ. ഡമ്മി സ്ഥാനാർത്ഥികൾ ഉൾപ്പെടെയുള്ള കണക്കാണിത്.

മുന്നണി സ്ഥാനാർത്ഥികളിൽ ആരുടേയും പത്രിക തള്ളിയിട്ടില്ല. പത്രിക പിൻവലിക്കാനുള്ള അവസാന ദിവസം ഇന്നാണ്. ‌ഡമ്മി സ്ഥാനാർത്ഥികൾ ഇന്ന് പത്രിക പിൻവലിക്കും. ഇതോടെ സ്ഥാനാർത്ഥികളുടെ അന്തിമ ചിത്രം വ്യക്തമാകും.

ജില്ലകളിൽ തിരുവനന്തപുരത്താണ് ഏറ്റവും കൂടുതൽ സ്ഥാനാർത്ഥികൾ- 115 പേർ. കുറവ് വയനാട്ടിൽ- 22 പേർ. മണ്ഡലങ്ങളിൽ കൂടുതൽ സ്ഥാനാർത്ഥികൾ കോഴിക്കോട് കൊടുവള്ളിയിൽ-17. കുറവ് സംവരണ മണ്ഡലങ്ങളായ തൃശൂർ നാട്ടികയിലും വയനാട് മാനന്തവാടിയിലും- മൂന്നു പേർ വീതം. ചൊവ്വാഴ്ച പ്രസിദ്ധീകരിച്ച അന്തിമ വോട്ടർപട്ടികയിൽ സംസ്ഥാനത്തുള്ളത് 2.72 കോടി വോട്ടർമാർ.