ആ വെള്ളാനകൾക്ക് കൂച്ചുവിലങ്ങിടുമ്പോൾ

സർക്കാരിന്റെ പണം എന്നത് ജനങ്ങൾ നല്കുന്ന നികുതിപ്പണമാണല്ലോ. ആ നികുതിപ്പണം പ്രയോജനമില്ലാതെ പാഴായിപ്പോകുന്നത് ഒഴിവാക്കാൻ ഉദ്ദേശിച്ചുള്ളത് ഉൾപ്പെടെ ഭരണപരിഷ്കാരവുമായി ബന്ധപ്പെട്ട അ‍ഞ്ച് കാര്യങ്ങൾ എത്രയും വേഗം നടപ്പാക്കാൻ കഴിഞ്ഞ ദിവസം ചേർന്ന സംസ്ഥാന മന്ത്രിസഭാ യോഗം തീരുമാനിച്ചിരുന്നു. യോഗ തീരുമാനങ്ങൾ വാർത്താസമ്മേളനത്തിൽ വിശദീകരിച്ച മുഖ്യമന്ത്രി വി.ഡി.സതീശൻ,​ അക്കൂട്ടത്തിൽ സർക്കാർ പണം തിന്നുമുടിക്കുന്ന 591 'വെള്ളാന'കളുടെ കാര്യം എടുത്തുപറഞ്ഞു. വെള്ളാന എന്നത് ഇംഗ്ളീഷ് പ്രയോഗമാണെങ്കിലും (വൈറ്റ് എലഫന്റ്)​ അതിന്റെ വിശ്വരൂപം മനസിലാക്കാൻ സംസ്ഥാന സർക്കാരിനു കീഴിലുള്ള നൂറുകണക്കിന് ബോർഡുകളുടെയും കോർപ്പറേഷനുകളുടെയും സമിതികളുടെയും പ്രവർത്തനം പരിശോധിച്ചാൽ മതിയാകും! മുഖ്യമന്ത്രി തന്നെ വെളിപ്പെടുത്തിയ കണക്കനുസരിച്ച്,​ ഇപ്പോഴത്തെ നിലയിൽ കാര്യമായ പ്രയോജനമൊന്നുമില്ലാതെ പ്രവർത്തിക്കുന്ന ഈ 591 സ്ഥാപനങ്ങളിൽ ജോലിചെയ്യുന്നവർക്ക് പ്രതിവ‍ർഷം ശമ്പള ഇനത്തിൽ നൽകേണ്ടത് 19,​000 കോടി രൂപയാണ്! കേരളത്തെ 'വെള്ളാനകളുടെ നാട്" എന്നു തന്നെയല്ലേ വിളിക്കേണ്ടതെന്ന് ആർക്കും തോന്നിപ്പോകും!

പണ്ട്,​ ചില ചക്രവർത്തിമാർ ഐശ്വര്യത്തിന്റെ ലക്ഷണമായി വെള്ളാനകളെ തീറ്റിപ്പോറ്രിയിരുന്നത്രേ. ആഡംബരചിഹ്നം എന്നതിനപ്പുറം,​ ഇവയെക്കൊണ്ട് കാൽക്കാശിന്റെ പ്രയോജനമുണ്ടാകില്ല. അങ്ങനെയാണ്,​ പ്രയോജനമോ നേട്ടമോ ഇല്ലാത്ത സർക്കാർ സ്ഥാപനങ്ങൾക്ക് വെള്ളാനകൾ എന്ന് വിളിപ്പേരു കിട്ടിയത്. ഇത്തരം സ്ഥാപനങ്ങളുടെ നിലവിലെ പ്രയോജനപരത വിലയിരുത്തി അവയെ വേണ്ടെന്നുവയ്ക്കാനോ,​ സമാന പ്രവൃത്തി ചെയ്യുന്ന മറ്റ് സ്ഥാപനങ്ങളുമായി യോജിപ്പിക്കുവാനോ,​ ബന്ധപ്പെട്ട വകുപ്പുമായി കൂട്ടിച്ചേർക്കുവാനോ ആണ് സ്പെഷ്യൽ അസറ്റ് രജിസ്ട്രി എന്ന പുതിയ സംവിധാനംകൊണ്ട് ഉദ്ദേശിക്കുന്നത്. പ്രത്യേക പോർട്ടൽ വഴി സർക്കാരിന്റെ മൊത്തം ആസ്തിവകകളുടെ കണക്കെടുക്കുകയാണ് ആദ്യപടി. സംസ്ഥാനം ഒരു വർഷം എടുക്കുന്ന കടം 39,​000 കോടി രൂപയായിരിക്കെ,​ പ്രയോജനമില്ലാത്ത സ്ഥാപനങ്ങൾ ശമ്പള ഇനത്തിൽ മാത്രം അതിന്റെ പകുതിയിൽ കൂടുതലും വിഴുങ്ങുന്ന ദുരവസ്ഥയെ ഭീകരം എന്നുതന്നെ വിളിക്കണം.

വെള്ളാനകൾ വരുത്തുന്ന ശമ്പളബാദ്ധ്യതയുടെ കണക്കു മാത്രമാണ് നേരത്തേ പറഞ്ഞത്. കെട്ടിടവാടക,​ ഔദ്യോഗിക വാഹനങ്ങൾ,​ അലവൻസുകൾ,​ യാത്രാബത്ത,​ മേധാവികളുടെ വിദേശയാത്രാ ചെലവ് തുടങ്ങി കാക്കത്തൊള്ളായിരം ഇനങ്ങളിലായി വേറെ എത്രയോ കോടി കൂടി ഇവ തിന്നുമുടിക്കുന്നുണ്ടാവും! ഇത്തരം സ്ഥാപനങ്ങളിൽ പലതും ഓരോ കാലത്ത് പ്രത്യേക ഉദ്ദേശ്യത്തോടുകൂടി രൂപീകരിച്ചവയും,​ എത്രയോ വർഷങ്ങൾക്ക് മുമ്പുതന്നെ ആ ലക്ഷ്യം കൈവരിച്ചവയുമായിരിക്കും. എത്രകാലത്തേയ്ക്ക് എന്ന് മുൻകൂട്ടി നിശ്ചയിച്ചിട്ടില്ലാത്തതുകൊണ്ട് അവ അങ്ങനെതന്നെ പണംതീനികളായി തുടരുന്നു എന്നേയുള്ളൂ. ഉദ്യോഗത്തിൽ തുടരുമ്പോൾത്തന്നെ വിശ്രമജീവിതം നയിക്കാൻ ആഗ്രഹവും,​ അവിടേയ്ക്ക് ഡെപ്യൂട്ടേഷൻ തരപ്പെടുത്താൻ പിടിപാടുമുള്ളവർ ഈ വെള്ളാനകളുടെ തണലിൽ സസുഖം വാഴുന്നു.

ഈ പാഴ്ച്ചെലവിന് വിരാമമിടുന്നതാണ് സർക്കാരിന്റെ പരിഷ്കാരപദ്ധതി. സാക്ഷരതാ മിഷൻ,​ റീബിൽഡ് കേരള,​ എയ്ഡ്സ് കൺട്രോൾ സൊസൈറ്റി,​ നിർമ്മിതി കേന്ദ്ര,​ ബുക്ക്മാർക്ക് തുടങ്ങിയ സ്ഥാപനങ്ങളൊക്കെ മുഖ്യമന്ത്രി സൂചിപ്പിച്ച വെള്ളാനകളുടെ പട്ടികയിലുണ്ട്. ഇവയൊക്കെ ഓരോ ആവശ്യം മുൻനിറുത്തി അക്കാലത്ത് ആരംഭിച്ചവയാണ് എന്നത് നേരുതന്നെ. പക്ഷേ,​ നിലവിൽ ഇവയുടെ പ്രയോജനമാണ് പരിശോധിക്കേണ്ടത്. നാമമാത്രമായ പ്രവൃത്തിയേ അവയ്ക്ക് ഇപ്പോൾ നിർവഹിക്കാനുള്ളൂവെങ്കിൽ അത്തരം സ്ഥാപനങ്ങൾ നിറുത്തലാക്കി,​ ആ ജോലി ബന്ധപ്പെട്ട വകുപ്പുകൾക്ക് കൈമാറുന്നതിൽ ഒരു തരക്കേടുമില്ല. അങ്ങനെ മിച്ചംവരുന്ന പണം ഭരണകാര്യക്ഷമത മെച്ചപ്പെടുത്താനും വികസനപ്രവർത്തനങ്ങൾക്കും വിനിയോഗിക്കുകയും ചെയ്യാം. തൊഴിൽസംബന്ധമായ വിഷയങ്ങൾ കൂടി പരിശോധിച്ച് വ്യവഹാരങ്ങൾക്ക് ഇടവരുത്താത്ത വിധത്തിൽ പരിഷ്കാരം നടപ്പാക്കണമെന്നു മാത്രം.