പൂർവികരുടെ ചിത്രങ്ങൾ ഈ അഞ്ച് ദിശകളിൽ ഒരിക്കലും സ്ഥാപിക്കരുത്; ഉത്തമ സ്ഥാനമറിയാം

മൺമറഞ്ഞുപോയ പ്രിയപ്പെട്ടവരെ ആദരിക്കുന്നതിന് ഓരോ സംസ്‌കാരത്തിലും ഓരോ രീതികളാണ് പിന്തുടരുന്നത്. പ്രിയപ്പെട്ടവരുടെ ഓർമ്മദിവസങ്ങളിൽ മോക്ഷത്തിനായി നടത്തുന്ന ചടങ്ങുകൾക്കുപുറമെ അവരുടെ ചിത്രങ്ങൾ വീട്ടിലെ ചുമരുകളിൽ സ്ഥാപിക്കുന്നതും പതിവാണ്. എന്നാൽ, പൂർവികരുടെ ചിത്രങ്ങൾ വീട്ടിൽ സ്ഥാപിക്കുമ്പോൾ വാസ്‌തുശാസ്‌ത്രപരമായി ചില കാര്യങ്ങളും ശ്രദ്ധിക്കേണ്ടതുണ്ട്.

അനുയോജ്യമായ ദിശ

വാസ്‌തുശാസ്ത്രപ്രകാരം തെക്ക്, തെക്ക്-പടിഞ്ഞാറ് ദിശകളാണ് പൂർവികരുടെ ചിത്രങ്ങൾ സ്ഥാപിക്കാൻ ഏറ്റവും അനുയോജ്യമായ ദിശകൾ. ഈ ദിശകൾക്ക് പിതൃലോകവുമായി അല്ലെങ്കിൽ അവരുടെ വാസസ്ഥലവുമായി അടുത്ത ബന്ധമുണ്ടെന്നാണ് കരുതപ്പെടുന്നത്. ഈ ദിശകളിൽ പൂർവികരുടെ ചിത്രങ്ങൾ സ്ഥാപിച്ചാൽ വീട്ടിന് ഐശ്വര്യവും പൂർവികരുടെ അനുഗ്രഹവും ലഭിക്കുമെന്നാണ് വിശ്വാസം.

ഒഴിവാക്കേണ്ട അഞ്ച് ദിശകൾ

1. വടക്ക്-കിഴക്ക് (ഈശാന കോൺ): പൂ‌ജയ്‌ക്കും ധ്യാനത്തിനുമായി കണക്കാക്കപ്പെടുന്ന ഈ ഭാഗത്ത് പൂർവ്വികരുടെ ചിത്രങ്ങൾ സ്ഥാപിക്കുന്നത് ഒഴിവാക്കുന്നതാണ് നല്ലത്. പൂർവികരെ നമ്മൾ ആരാധിക്കുമെങ്കിലും അവർ ദൈവങ്ങളല്ല. അതിനാൽ ഈ ഭാഗത്ത് അവരുടെ ചിത്രങ്ങൾ സ്ഥാപിക്കുന്നത് വീടിന്റെ ആത്മീയ സന്തുലനാവസ്ഥയെ പ്രതികൂലമായി ബാധിക്കും.
2. കിടപ്പുമുറിയിലെ കട്ടിലിന്റെ തലയ്‌ക്കൽ: ഈ ഭാഗത്ത് പിതൃക്കളുടെ ചിത്രങ്ങൾ സ്ഥാപിക്കുന്നത് മാനസിക അസ്വസ്ഥതയ്‌ക്കും ഉറക്കം നഷ്‌ടപ്പെടാനും കാരണമാകുമെന്നാണ് വിശ്വാസം.
3. കിഴക്ക് ദിശ: വളർച്ച, വിദ്യാഭ്യാസം, കരിയർ എന്നിവയുമായി ബന്ധപ്പെട്ട ദിശയായതിനാൽ ഇവിടെ പിതൃക്കളുടെ ചിത്രങ്ങൾ സ്ഥാപിക്കാൻ പാടില്ലെന്നാണ് വാസ്‌തുശാസ്‌ത്രം പറയുന്നത്.
4. വടക്ക് ദിശ: സമ്പത്തിനെയും പുതിയ അവസരങ്ങളെയും പ്രതിനിധീകരിക്കുന്ന ഭാഗമാണ് വടക്കുദിശ. വടക്ക് ഭാഗത്ത് പൂർവ്വികരുടെ ചിത്രങ്ങൾ സ്ഥാപിക്കുന്നത് സമ്പത്തിന്റെ ഒഴുക്കിനെ തടസപ്പെടുത്തും.
5. ബ്രഹ്മസ്ഥാനം: വീടിന്റെ മദ്ധ്യഭാഗത്തെയാണ് ബ്രഹ്മസ്ഥാനം എന്നതുകൊണ്ട് അർത്ഥമാക്കുന്നത്. ഈ ഭാഗത്ത് ഭാരമുള്ള വസ്‌തുക്കൾ സ്ഥാപിക്കാനോ വൃത്തിഹീനമാക്കിയിടാനോ പാടില്ല. ഈ ഭാഗത്ത് പൂർവികരുടെ ചിത്രങ്ങൾ സ്ഥാപിക്കുന്നത് വീടിന്റെ പോസിറ്റീവ് എനർജിയെ പ്രതികൂലമായി ബാധിക്കും.