പമ്പയിൽ പൊലീസായി മോഹൻലാൽ; അതിമനോഹരത്തിന്റെ ചിത്രീകരണം ആരംഭിച്ചു

പത്തനംതിട്ട: മോഹൻലാൽ ചിത്രം 'അതിമനോഹര'ത്തിന്റെ ചിത്രീകരണം പമ്പയിൽ ആരംഭിച്ചു. പമ്പയിൽ തുടങ്ങി സന്നിധാനമുൾപ്പെടെയുള്ള പെരിയാർ കടുവാ സങ്കേതത്തിന്റെ ഭാഗങ്ങളിൽ ചിത്രീകരണത്തിന് വനംവകുപ്പ് നേരത്തെ അനുമതി നിഷേധിച്ചിരുന്നു. പമ്പ വരെയുള്ള റാന്നി ഡിവിഷന് കീഴിലെ വനംവകുപ്പിന്റെ മേഖലയിൽ മാത്രമാണ് നിലവിൽ ചിത്രീകരണത്തിനായി അനുമതി ലഭിച്ചിട്ടുള്ളത്. കോടതി അനുവദിച്ചിട്ടുള്ള സ്ഥലങ്ങളിലാണ് ചിത്രീകരണം നടക്കുന്നത്. മോഹൻലാൽ പൊലീസ് വേഷത്തിലുള്ള ദൃശ്യങ്ങൾ പുറത്തുവന്നിട്ടുണ്ട്. അതിമനോഹരത്തിന്റെ അവസാന ഷെഡ്യൂളിന്റെ ചിത്രീകരണമാണ് ഇപ്പോൾ പമ്പയിൽ നടക്കുന്നത്.

തുടരും എന്ന മെഗാ ഹിറ്റ് ചിത്രത്തിനുശേഷം മോഹൻലാലിനെ നായകനാക്കി തരുൺ മൂർത്തി സംവിധാനം ചെയ്യുന്ന ചിത്രം എന്ന പ്രത്യേകതയും അതിമനോഹരത്തിനുണ്ട്. ലൗലജൻ എന്ന പൊലീസ് കഥാപാത്രമായാണ് ചിത്രത്തിൽ മോഹൻലാൽ എത്തുന്നത്. മീര ജാസ്മിൻ ആണ് നായിക. മുകേഷ്, ജഗദീഷ്, മനോജ് കെ ജയൻ, ഇർഷാദ്, വിഷ്ണു ജി വാര്യർ, പ്രമോദ് വെളിയനാട്, കിരൺ പീതാംബരൻ, വിജി വിശ്വനാഥ്, ഭാമ അരുൺ, പ്രാർത്ഥന, സജീവൻ തുടങ്ങിയവരാണ് മറ്റ് താരങ്ങൾ.

രചന രതീഷ് രവി, ഷാജി കുമാർ ഛായാഗ്രഹണം നിർവഹിക്കുന്നു. വിനായക് ശശികുമാർ എഴുതിയ വരികൾക്ക് ജെക്സ് ബിജോയ് സംഗീതം പകരുന്നു. കോ-ഡയറക്ടർ - ബിനു പപ്പു, എഡിറ്റിംഗ് - വിവേക് ഹർഷൻ, ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ ആണ് നിർമ്മാണം.