അനിൽ ആന്റണിക്കെതിരെ പ്രചാരണത്തിനിറങ്ങില്ല; ബാല്യകാല സുഹൃത്തെന്ന് അച്ചു ഉമ്മൻ

പത്തനംതിട്ട: എൻ ഡി എ സ്ഥാനാർത്ഥി അനിൽ ആന്റണിക്കെതിരെ പ്രചാരണത്തിനിറങ്ങില്ലെന്ന് മുൻ മുഖ്യമന്ത്രി ഉമ്മൻചാണ്ടിയുടെ മകൾ അച്ചു ഉമ്മൻ. ബാല്യകാലം തൊട്ടുള്ള സുഹൃത്താണ് അനിലെന്നും അതിനാലാണ് അദ്ദേഹത്തിനെതിരെ പ്രചാരണത്തിനിറങ്ങാത്തതെന്നും അവർ കൂട്ടിച്ചേർത്തു.

കോൺഗ്രസിലെ പ്രമുഖ നേതാക്കളായിരുന്ന ഉമ്മൻ ചാണ്ടിയും എ കെ ആന്റണിയും അടുത്ത സുഹൃത്തുക്കളായിരുന്നു. ഇവരുടെ കുടുംബങ്ങൾ തമ്മിലും ഈ സൗഹൃദം ഉണ്ടായിരുന്നു. കഴിഞ്ഞ വർഷം ജൂലായ് പതിനെട്ടിനാണ് ഉമ്മൻ ചാണ്ടി അന്തരിച്ചത്. ശാരീരിക അവശതകളുണ്ടായിരുന്നെങ്കിലും ഉമ്മൻചാണ്ടിയെ അവസാനമായി ഒരുനോക്ക് കാണാൻ എ കെ ആന്റണി എത്തിയിരുന്നു.

ഉമ്മൻചാണ്ടിയുടെ വിശ്വസ്തനും സിറ്റിംഗ് എംപിയുമായ ആന്റോ ആന്റണിയാണ് പത്തനംതിട്ടയിൽ യു ഡി എഫ് സ്ഥാനാർത്ഥി. യു ഡി എഫിന് ഏറെ വിജയപ്രതീക്ഷയുള്ള മണ്ഡലം കൂടിയാണ് പത്തനംതിട്ട. മുൻമന്ത്രി തോമസ് ഐസക്കാണ് മണ്ഡലത്തിലെ എൽ ഡി എഫ് സ്ഥാനാർത്ഥി.