കാഫിർ സ്‌ക്രീൻഷോട്ട് കേസ്: അന്വേഷണത്തിന് പുതിയസംഘം

വടകര: ലോക്സഭ തിരഞ്ഞെടുപ്പ് പ്രചാരണ വേളയിൽ വിവാദമായ കാഫിർ സ്‌ക്രീൻ ഷോട്ടിന്റെ ഉറവിടം കണ്ടെത്താൻ പ്രത്യേക അന്വേഷണ സംഘം. നിലവിലെ അന്വേഷണ സംഘത്തിനെതിരെ ആക്ഷേപമുയർന്ന സാഹചര്യത്തിലാണ് ഇന്നലെ വടകര റൂറൽ എസ്.പി ഓഫീസിൽ ചേർന്ന യോഗത്തിൽ പ്രത്യേക സംഘത്തെ നിയോഗിച്ചത്. ക്രൈംബ്രാഞ്ച് ഡിവൈ.എസ്.പി ടി.മനോഹരനാണ് അന്വേഷണച്ചുമതല. വടകര സ്റ്റേഷനിലെ എസ്.എച്ച്.ഒ ഉൾപ്പെടെ ഏഴുപേരാണ് സംഘത്തിലുള്ളത്. സോഷ്യൽ മീഡിയ പ്ലാറ്റ്‌ഫോമായ മെറ്റയിൽ നിന്ന് വിവരങ്ങൾ ലഭിക്കേണ്ടതിനാൽ അന്വേഷണസംഘം അപേക്ഷ നൽകും. സൈബർ വിദഗ്ദ്ധരെ ഉൾപ്പെടുത്തിയാണ് പുതിയ സംഘം രൂപീകരിച്ചത്. നേരത്തെ ചോദ്യം ചെയ്തവരെ പുതിയ അന്വേഷണസംഘം വീണ്ടും വിളിപ്പിക്കും. സ്‌ക്രീൻഷോട്ട് നിർമ്മിച്ചവരെ കണ്ടെത്താത്തതിനാൽ കുറ്റിയാടി എം.എൽ.എ പാറയ്ക്കൽ അബ്ദുള്ള ആഭ്യന്തരമന്ത്രി രമേശ് ചെന്നിത്തലയ്ക്ക് പരാതി നൽകിയിരുന്നു. ഇതിന്റെ അടിസ്ഥാനത്തിൽ എസ്.ഐ.ടി രൂപീകരിച്ച് അന്വേഷണം നടത്തണമെന്ന് ആഭ്യന്തരമന്ത്രി ഡി.ജി.പിയ്ക്ക് നിർദ്ദേശം നൽകുകയായിരുന്നു.