പൂവിട്ട് 25 ദിവസത്തിനുള്ളിൽ വിളവെടുക്കാം;​ നല്ല സൂര്യപ്രകാശവും കുറഞ്ഞ പരിപാലനവും മതി

അടുക്കളത്തോട്ടത്തിൽ എളുപ്പത്തിൽ വളർത്താവുന്ന പച്ചക്കറികളിൽ പ്രധാനപ്പെട്ടതാണ് വഴുതനങ്ങ. അധികം സ്ഥലമില്ലാത്തവർക്കും ചട്ടിയിലോ ഗ്രോബാഗിലോ വഴുതനങ്ങ കൃഷി ചെയ്യാം. ശരിയായ മണ്ണും വെള്ളവും വളപ്രയോഗവും ഉറപ്പാക്കിയാൽ വീട്ടിൽ നിന്ന് തന്നെ ആവശ്യമായ കായ്കൾ ലഭിക്കും.

വിത്തോ തൈയോ ഉപയോഗിക്കാം

വഴുതനങ്ങ കൃഷി തുടങ്ങാൻ വിത്ത് നേരിട്ട് നടുകയോ നഴ്സറിയിൽ നിന്ന് ആരോഗ്യകരമായ തൈകൾ വാങ്ങി നടുകയോ ചെയ്യാം. വിത്ത് ഉപയോഗിക്കുന്നവർ ആദ്യം ചെറിയ ട്രേയിലോ വിത്തുപാത്രത്തിലോ വിത്ത് പാകി മുളപ്പിച്ച ശേഷം ആരോഗ്യമുള്ള തൈകൾ പ്രധാന ചട്ടിയിലേക്ക് മാറ്റി നടാം.

തൈകൾ നടേണ്ട രീതി

വഴുതനങ്ങ ചെടിക്ക് വേരുകൾ വളരാൻ മതിയായ ഇടം ആവശ്യമാണ്. അതിനാൽ വലിയ ഗ്രോബാഗോ ചട്ടിയോ തിരഞ്ഞെടുക്കുന്നതാണ് നല്ലത്. ചട്ടിയുടെ അടിയിൽ വെള്ളം കെട്ടിനിൽക്കാതിരിക്കാൻ ആവശ്യമായ ദ്വാരങ്ങൾ ഉണ്ടായിരിക്കണം. മണ്ണിനൊപ്പം ജൈവവളമായ ചാണകപ്പൊടി, കമ്പോസ്റ്റ് തുടങ്ങിയവ ചേർക്കുന്നത് നല്ല വിളവ് ലഭിക്കുന്നതിന് സഹായിക്കും. നല്ല നീർവാർച്ചയുള്ള മണ്ണ് തിരഞ്ഞെടുക്കാനും ശ്രദ്ധിക്കണം.

ദിവസവും മതിയായ സൂര്യപ്രകാശം ലഭിക്കുന്ന സ്ഥലം വേണം കൃഷിക്കായി തിരഞ്ഞെടുക്കേണ്ടത്. വീടിന്റെ ടെറസിലോ മുറ്റത്തോ നല്ല വെയിൽ ലഭിക്കുന്ന സ്ഥലത്ത് ചട്ടികൾ വയ്ക്കാം. മണ്ണ് ഉണങ്ങുന്നതനുസരിച്ച് വെള്ളം നൽകാം. എന്നാൽ ചട്ടിയിൽ വെള്ളം കെട്ടിനിൽക്കുന്നത് ഒഴിവാക്കണം. അമിതമായ ഈർപ്പം വേരുകൾക്ക് കേടുപാടുകൾ ഉണ്ടാക്കാൻ സാദ്ധ്യതയുള്ളതിനാൽ നല്ല നീർവാർച്ച ഉറപ്പാക്കേണ്ടത് പ്രധാനമാണ്.

വളപ്രയോഗം ശ്രദ്ധിക്കാം

ചെടി വളരുന്ന ഘട്ടത്തിൽ ഇടയ്ക്കിടെ ജൈവവളം നൽകുന്നത് വളർച്ചയ്ക്ക് സഹായിക്കും. പൂക്കൾ ഉണ്ടാകുന്ന ഘട്ടത്തിലും കായ്കൾ പിടിക്കുന്ന സമയത്തും ആവശ്യമായ വളം ലഭിക്കുന്നുണ്ടെന്ന് ഉറപ്പാക്കണം. വീട്ടിൽ തയ്യാറാക്കുന്ന കമ്പോസ്റ്റ് പോലുള്ള ജൈവവളങ്ങളും ഉപയോഗിക്കാം.

കീടങ്ങളെ ശ്രദ്ധിക്കണം

വഴുതനങ്ങച്ചെടിയിൽ ഇലതീനിപ്പുഴുക്കൾ, തണ്ടുതുരപ്പൻ തുടങ്ങിയ കീടങ്ങളുടെ ആക്രമണം ഉണ്ടാകാനിടയുണ്ട്. ഇലകളും തണ്ടുകളും ഇടയ്ക്കിടെ പരിശോധിക്കുന്നത് കീടബാധ തുടക്കത്തിൽ തന്നെ കണ്ടെത്താൻ സഹായിക്കും. രോഗബാധയുള്ള ഇലകളും കായ്കളും കണ്ടാൽ അവ നീക്കം ചെയ്യുന്നതും നല്ലതാണ്. കൃത്യമായി വിളവെടുക്കുന്നത് ചെടിയിൽ കൂടുതൽ കായ്കൾ ഉണ്ടാകാനും സഹായിക്കും. അൽപം ശ്രദ്ധ നൽകിയാൽ വീടിന്റെ ചെറിയ സ്ഥലത്തുപോലും വഴുതനങ്ങ കൃഷി വിജയകരമായി ചെയ്യാം.