വീട്ടുമുറ്റത്ത് ഒരു സാത്തുക്കുടി നട്ടാലോ? നല്ല വെയിലും നീർവാർച്ചയുള്ള മണ്ണും മതി,​ എളുപ്പത്തിൽ വിളവെടുക്കാം

സാത്തുക്കുടി അഥവാ മുസംബി ഇഷ്ടപ്പെടാത്തവർ കുറവായിരിക്കും. നല്ല മധുരവും നേരിയ പുളിപ്പുമുള്ള ഈ പഴം ജ്യൂസായും നേരിട്ടും കഴിക്കാം. ഇന്ത്യയിൽ വ്യാപകമായി ഉപയോഗിക്കുന്ന സിട്രസ് വിഭാഗത്തിൽപ്പെട്ട പഴമാണ് സാത്തുക്കുടി. നല്ല സൂര്യപ്രകാശവും വെള്ളം കെട്ടിക്കിടക്കാത്ത മണ്ണുമുള്ള സ്ഥലങ്ങളിൽ ഇത് കൃഷി ചെയ്യാം.

വീട്ടുമുറ്റത്തും കൃഷി ചെയ്യാം

വീട്ടുവളപ്പിൽ ആവശ്യത്തിന് സ്ഥലം ഉണ്ടെങ്കിൽ സാത്തുക്കുടി നട്ടുവളർത്താൻ കഴിയും. ചെടിക്ക് ദിവസവും നല്ല സൂര്യപ്രകാശം ലഭിക്കുന്ന സ്ഥലമാണ് തിരഞ്ഞെടുക്കേണ്ടത്. വെള്ളം കെട്ടിനിൽക്കുന്ന സ്ഥലങ്ങൾ ഒഴിവാക്കണം. നീർവാർച്ചയുള്ള മണ്ണാണ് സിട്രസ് ചെടികൾക്ക് പൊതുവേ അനുയോജ്യം.

തൈ നടുന്നതിന് മുമ്പ് മണ്ണ് നന്നായി ഇളക്കി ജൈവവളം ചേർത്ത് ഒരുക്കാം. മണ്ണിൽ വെള്ളം കെട്ടിനിൽക്കാതിരിക്കാൻ ശ്രദ്ധിക്കണം. മഴക്കാലത്ത് അധികജലം വേഗത്തിൽ ഒഴുകിപ്പോകുന്ന രീതിയിലുള്ള സ്ഥലം തിരഞ്ഞെടുക്കുന്നതും ഗുണം ചെയ്യും. ചെടിയുടെ വളർച്ചയ്ക്കനുസരിച്ച് ജൈവവളങ്ങൾ നൽകാം.

ചെടിയുടെ ചുവട്ടിൽ കളകൾ വളരുന്നത് ഒഴിവാക്കുകയും മണ്ണിന്റെ ഈർപ്പം നിലനിർത്തുന്നതിനായുള്ള സൗകര്യങ്ങൾ ഒരുക്കുകയും ചെയ്യണം. കീടങ്ങളുടെയോ രോഗങ്ങളുടെയോ ലക്ഷണങ്ങൾ കണ്ടാൽ തുടക്കത്തിൽ തന്നെ നിയന്ത്രണ നടപടികൾ സ്വീകരിക്കണം. ഇതിനായി വേപ്പില കഷായം വെള്ളത്തിൽ നേർപ്പിച്ച് ഇലകളിൽ സ്പ്രേ ചെയ്ത് നൽകാം.

മുസംബിയിൽ ജലാംശം കൂടുതലാണ്. വിറ്റാമിൻ സി, ഫോളേറ്റ്, പൊട്ടാസ്യം തുടങ്ങിയ പോഷകങ്ങളും ഇതിൽ അടങ്ങിയിട്ടുണ്ട്. അതുകൊണ്ടുതന്നെ വീട്ടുവളപ്പിൽ ഒരു സാത്തുക്കുടി ചെടി വളർത്തിയാൽ പഴവും ലഭിക്കും, ഒപ്പം വീട്ടിലെ കൃഷിയിടത്തിന് മറ്റൊരു ഫലവൃക്ഷവും സ്വന്തമാകും.