വിനോദസഞ്ചാരത്തിലും 'പ്രിയദർശിനി' ഹിറ്റാണ്; ഈ  ടീ  എസ്റ്റേറ്റിൽ പോയിട്ടുണ്ടോ?

വിദേശരാജ്യങ്ങളിൽ യാത്ര പോകാൻ ആഗ്രഹിക്കാത്തവർ കുറവാണ്. അവിടത്തെ പ്രകൃതിഭംഗിയും വിസ്മയിപ്പിക്കുന്ന കാഴ്ചകളുമാണ് അതിന് കാരണം. എന്നാൽ യാത്രയ്ക്കായി വേണ്ടിവരുന്ന വലിയ സാമ്പത്തിക ചെലവ് പലരുടെയും സ്വപ്നങ്ങൾക്ക് തടസമാകാറുണ്ട്.

അതേസമയം, വിദേശരാജ്യങ്ങളെ വെല്ലുന്ന പ്രകൃതിഭംഗിയും മനോഹരമായ വിനോദസഞ്ചാര കേന്ദ്രങ്ങളും നമ്മുടെ ഇന്ത്യയിലുമുണ്ട്. സ്വിറ്റ്സർലൻഡിനെപ്പോലും ഓർമിപ്പിക്കുന്ന മലകളും പച്ചപ്പുനിറഞ്ഞ താഴ‌്‌വരകളും തടാകങ്ങളുമെല്ലാം ഇന്ത്യയിലുണ്ട്. ഓരോ വർഷവും ആയിരക്കണക്കിന് സഞ്ചാരികളാണ് ഇന്ത്യയിലെത്തുന്നത്. വിദേശയാത്രയുടെ ചെലവില്ലാതെ വിദേശരാജ്യത്തെത്തിയ പ്രതീതി നൽകുന്ന ചില മനോഹരമായ സ്ഥലങ്ങൾ പരിചയപ്പെടാം.

പൈൻ വനങ്ങൾ

സ്വിസ് ഗ്രാമങ്ങളിലെ പൈൻ മരക്കൂട്ടങ്ങളെ ഓർമിപ്പിക്കുന്നതാണ് വാഗമൺ പൈൻ ഫോറസ്റ്റ്. മൂടൽ മഞ്ഞിലൂടെ പൈൻ മരങ്ങൾക്കിടയിലൂടെ നടക്കാം. ഫോട്ടോ എടുക്കാനും നടക്കാനും പറ്റിയ മനോഹരമായ സ്ഥലമാണ് പൈൻ ഫോറസ്റ്റ്. ഇതിന് അടുത്ത് തന്നെ വാഗമൺ കുരിശുമലയുമുണ്ട്. ട്രക്കിംഗ് ഇഷ്ടപ്പെടുന്നവർക്ക് പറ്റിയ മലനിരകളാണ് വാഗമൺ കുരിശുമല.

മൂന്നാറിലെ മാട്ടുപ്പെട്ടി ഡാം

കേരളത്തിലെ ഇടുക്കി ജില്ലയിലെ മൂന്നാറിന് സമീപം ദേവികുളം പഞ്ചായത്തിൽ മാട്ടുപ്പെട്ടിയിൽ ചിത്തിരപുരം ഗ്രാമത്തിൽ സ്ഥിതി ചെയ്യുന്ന അണക്കെട്ടാണ് മാട്ടുപ്പെട്ടി അണക്കെട്ട്. മാട്ടുപ്പെട്ടിയിലെ പുൽമേടുകൾ ആൽപ്സ് മലനിരകളിലെ കാഴ്ചയ്ക്ക് സമാനമാണ്. പ്രകൃതിഭംഗി കൊണ്ടും തണുത്ത കാലാവസ്ഥ കൊണ്ടും ഇവിടം 'മിനി സ്വിറ്റ്സർലൻഡ്' എന്ന് വിളിക്കപ്പെടുന്നു.

പ്രിയദർശിനി ടീ എസ്റ്റേറ്റ്

വയനാട്ടിലെ മാനന്തവാടിക്കടുത്തുള്ള പ്രിയദർശിനി ടീ എസ്റ്റേറ്റ് സ്വിസ് താഴ്‌വരകളിലെ തേയിലത്തോട്ടങ്ങളെപ്പോലെ മനോഹരമാണ്. മലനിരകളുടെ മുകളിലെ മഞ്ഞുപുതച്ച കാഴ്ചകളും തടിയിൽ നിർമ്മിച്ച ഹട്ടുകളും ഈ സ്ഥലത്തെ വിനോദസഞ്ചാരികളുടെ പ്രിയപ്പെട്ട ഇടമാക്കുന്നു.