കുറുവസംഘത്തെ കുടുക്കാനും വഴി ശാസ്ത്രമേളയിലുണ്ട് !

ആലപ്പുഴ : കുറുവസംഘത്തെ പേടിച്ച് ഉറക്കംപോയ ആലപ്പുഴക്കാരുടെ ശ്രദ്ധയ്ക്ക്,​ കള്ളനെ പൂട്ടാൻ ഒന്നാന്തരം വിദ്യയുമായി സായിദേവും ആരോമലും ശാസ്ത്രമേളയിലെത്തിയിട്ടുണ്ട്! ഇവരുടെ ഹോം സെക്യൂരിറ്റി അലാറത്തിന് ഒച്ചയില്ല,​ പക്ഷേ സ്ഥലത്തേക്ക് അതിവേഗം പൊലീസെത്തും!

കുളക്കട ജി.വി. എച്ച്. എസ് എസിലെ എട്ടാംക്ളാസ് വിദ്യാർത്ഥി
സായിദേവും പത്താംക്ളാസ് വിദ്യാർത്ഥി ആരോമൽ പി.നായരുമാണ് ഈ ഐഡിയയ്ക്ക് പിന്നിലെ മിടുക്കർ!

കള്ളൻമാരുടെ സാന്നിദ്ധ്യം വ്യക്തമായാലുടൻ ഫോണിലേക്ക് മെസേജും കോളും വരും. അലാറമില്ലാത്തതിനാൽ കള്ളൻമാർ കെണി തിരിച്ചറിയുകയുമില്ല. മൂന്ന് സെൻസർ ഉപയോഗിച്ച് കവർച്ചാസംഘത്തിന്റെ സംസാരവും നീക്കങ്ങളും റെക്കോഡ് ചെയ്യാനാവും. ഈ സമയം കൊണ്ട് പൊലീസിന്റെ സഹായംതേടാം. ആരോമൽ സ്വന്തം വീട്ടിൽ പരീക്ഷിച്ചതാണിത്. കണ്ണൂരിൽ ജോലിചെയ്യുന്ന അച്ഛന്റെയും കൊല്ലത്തെ വീട്ടിലുള്ള ആരോമലിന്റെയും ഫോൺ ഈ സംവിധാനത്തിന്റെ ഭാഗമാണ്. ഇന്റർനെറ്റ് കണക്ഷൻ ഉപയോഗിച്ച് എത്ര ഫോണിലേക്ക് വേണമെങ്കിലും സെക്യൂരിറ്റി അലാം കണക്ട് ചെയ്യാം.

മറ്റ് ചില ഉപകാരങ്ങൾ കൂടിയുണ്ട് ഈ സംവിധാനത്തിന്!

മഴയുടെ വരവറിഞ്ഞ് ഉണക്കാനിട്ട തുണികൾ ഉൾപ്പെടുന്ന സ്റ്റീൽ ബാർ സൺഷേഡിലേക്ക് സ്വയം മാറുന്നതാണ് സംവിധാനത്തിന്റെ പ്രത്യേകത.

തീപിടിത്തമുണ്ടായാൽ വീട്ടുടമസ്ഥരുടെ ഫോണിലേക്ക് അപകട മുന്നറിയിപ്പുമായി മെസേജും കോളും വരുന്നതാണ് മറ്റൊന്ന്.