കെ.എസ്.യു മാർച്ചിൽ സംഘർഷം, റോഡ് ഉപരോധിച്ച 10പേർ അറസ്റ്റിൽ

ആലപ്പുഴ : ലഹരി വിഷയത്തിൽ ആഭ്യന്തര, എക്​സൈസ്​ വകുപ്പുകൾ അനാസ്ഥ കാട്ടുന്നെന്നാരോപിച്ച് കെ.എസ്​.യു ജില്ലകമ്മിറ്റിയുടെ നേതൃത്വത്തിൽ ആലപ്പുഴ എക്സൈസ്​ ഡെപ്യൂട്ടി കമ്മീഷണറുടെ ഓഫീസിലേക്ക്​ നടത്തിയ മാർച്ചിൽ സംഘർഷം. സമരത്തിന്​ പിന്നാലെ റോഡ്​ ഉപരോധവും നടത്തി. വനിതകളടക്കം 10 കെ.എസ്.യു പ്രവർത്തകരെ സൗത്ത്​ ​പൊലീസ്​ അറസ്റ്റ്​ ചെയ്തു.

കെ.എസ്​.യു ജില്ല​ പ്രസിഡന്റ് എ.ഡി.തോമസ്​, സംസ്ഥാന കമ്മിറ്റിഅംഗം സുറുമി ഷാഹുൽ, ജില്ല ജനറൽസെക്രട്ടറി ദേവിക സുഭാഷ്​, ആര്യ കൃഷ്ണൻ, സനിക സനജൻ, ജില്ല വൈസ്​ പ്രസിഡന്റ് ശേഷ ഗോപൻ, രോഹിത്ത്​ പാറ്റൂർ, ഫ്രാൻസിസ്​ ജോളി, നായിഫ് ​ നാസർ എന്നിവരാണ് അറസ്റ്റിലായത്. ആലപ്പുഴ ടൗൺഹാളിന്​ മുന്നിൽനിന്ന്​ തുടങ്ങിയ പ്രകടനം എക്​സൈസ്​ ഓഫീസിന്​ മുന്നി​ൽ പൊലീസ് തടഞ്ഞു. തുടർന്ന് പ്രതിഷേധസമരം കെ.പി.സി.സി ജനറൽസെക്രട്ടറി കെ.പി. ശ്രീകുമാർ ഉദ്​ഘാടനം ചെയ്തു. പ്രസംഗം കഴിഞ്ഞതോടെ മുദ്രാവാക്യം മുഴക്കിയ പ്രവർത്തകർ ബാരിക്കേഡ്​ തള്ളി മറിച്ചിടാനും മതിൽചാടികടക്കാനും ശ്രമിച്ചതോടെ പൊലീസുമായി വാക്കേറ്റവും ഉന്തുംതള്ളുമുണ്ടായി. ആശുപത്രി ഗേറ്റിന്​ സമീപത്തെ മതിൽവഴി അകത്തേക്ക്​ കടക്കാൻ ​ശ്രമിച്ച പ്രവർത്തകരെ പൊലീസ്​ തടഞ്ഞു. തുടർന്ന് മുദ്രാവാക്യം വിളികളുമായി ജനറൽ ആശുപത്രി ജംഗ്​ഷനിലെത്തിയ പ്രവർത്തകർ റോഡ്​ ഉപരോധിച്ചു. അരമണിക്കൂറോളം ഗതാഗതം തടസപ്പെട്ടു. . ഇതോടെ പ്രവർത്തകരെ ​പൊലീസ്​ ബലംപ്രയോഗിച്ച്​​ അറസ്റ്റ്​ ചെയ്തുനീക്കി.