ഏഴാംതരം തുല്യത പരീക്ഷ

കൊല്ലം: സംസ്ഥാന സാക്ഷരത മിഷന്റെ നേതൃത്വത്തിൽ നടത്തുന്ന ഏഴാംതരം തുല്യതാ പരീക്ഷ ജില്ലയിൽ ആരംഭിച്ചു. ആകെ 68 പഠിതാക്കളാണ് പരീക്ഷയിൽ പങ്കെടുത്തത്. ഇതിൽ 28 പുരുഷന്മാരും 40 സ്ത്രീകളും ഉൾപ്പെടുന്നു. 11 പേർ പട്ടികജാതി വിഭാഗത്തിൽപ്പെട്ടവരും 8 പേർ ഭിന്നശേഷി പഠിതാക്കളുമാണ്. വിദ്യാഭ്യാസം പാതിവഴിയിൽ നിറുത്തിയവർക്കും പ്രായഭേദമില്ലാതെ പഠനം തുടരാൻ അവസരം നൽകും. പരീക്ഷ വിജയിക്കുന്നവർക്ക് പത്താംതരം പഠനത്തിന് അർഹത ലഭിക്കും. ഏറ്റവും പ്രായം കൂടിയ പഠിതാവ് അഞ്ചാലുമൂട് സ്വദേശി ജറമിയാസ് ഏലിയാസും (67) പ്രായം കുറഞ്ഞ പഠിതാവ് മേലില സ്വദേശിനി ശാരി (18)യുമാണ്.