മധുരം നിറഞ്ഞ പടിയിറക്കം; സ്ഥലംമാറ്റം കിട്ടിയ കമ്മിഷണർക്ക് സർപ്രൈസ് 'വളകാപ്പ്' ഒരുക്കി സഹപ്രവർത്തകർ

കൊല്ലം: കൊച്ചിയിലേക്ക് സ്ഥലം മാറിപ്പോകുന്ന സിറ്റി പൊലീസ് കമ്മിഷണർ എം ഹേമലതയ്ക്ക് സ്നേഹം നിറച്ച വളകാപ്പ് ചടങ്ങൊരുക്കി യാത്രഅയപ്പ് നൽകി കൊല്ലം സിറ്റി പൊലീസ് കുടുംബം. ഗർഭിണിയായ എം ഹേമലത തമിഴ്‌നാട് സ്വദേശി കൂടിയായതിനാലാണ് തമിഴ് പാരമ്പര്യത്തിലെ വളകാപ്പ് ചടങ്ങ് ഒരുക്കി സഹപ്രവർത്തകർ അമ്പരപ്പിച്ചത്.

തമിഴ് ആചാരപ്രകാരം ആദ്യ ഗർഭകാലത്ത് നടത്താറുള്ള വളകാപ്പ് ചടങ്ങ് കൊവിഡ് കാലത്തെ സാഹചര്യങ്ങൾ കാരണം എം ഹേമലതയ്ക്ക് ആഘോഷിക്കാൻ കഴിഞ്ഞിരുന്നില്ല. ഈ കാര്യം മനസിലാക്കിയ സഹപ്രവർത്തകർ സ്ഥലംമാറ്റത്തോടനുബന്ധിച്ചുള്ള യാത്രഅയപ്പ് സ്നേഹാഘോഷമാക്കുകയായിരുന്നു. സാരി ധരിച്ചെത്തിയ കമ്മിഷണർക്ക് സഹപ്രവർത്തകർ മധുര പലഹാരങ്ങളും ആഭരണങ്ങളും സമ്മാനമായി നൽകി. കൊല്ലം സിറ്റി പൊലീസ് ആസ്ഥാനത്തെ വനിതാ ഉദ്യോഗസ്ഥരാണ് ചടങ്ങിന് മുൻകൈയെടുത്തത്. എസിപിമാർ അടക്കമുള്ള ഉയർന്ന ഉദ്യോഗസ്ഥർ കൊല്ലം പൊലീസ് ക്ലബിൽ നടന്ന ചടങ്ങിലെത്തി ആശംസകൾ നേർന്നു.