സഞ്ചാരി​മുക്ക് റോഡി​ലൂടെ സഞ്ചരി​ക്കാൻ പെട‌ാപ്പാട്!

ശ്രീനാരായണപുരം- സഞ്ചാരിമുക്ക് റോഡ് നവീകരണം മുടങ്ങി

കൊല്ലം: ശ്രീനാരായണപുരം- സഞ്ചാരിമുക്ക് റോഡ് നവീകരണം ആരംഭിച്ചിട്ട് മൂന്ന് വർഷമായെങ്കിലും ഇതുവരെ നടന്നത് 100 മീറ്റർ ഓട നിർമ്മാണം മാത്രം! ഒന്നര പതി​റ്റാണ്ടായി​ തകർന്നു കി​ടക്കുകയായി​രുന്ന റോഡ് നാട്ടുകാരുടെ നി​രന്തര പരാതി​യെത്തുടർന്നാണ് നവീകരി​ക്കാൻ തുടങ്ങി​യത്. യാത്രക്കാർക്ക് പുറമേ റോഡരി​കി​ലുള്ള 300ഓളം കുടുംബങ്ങളും കടുത്ത ദുരിതത്തിലാണ്.

ഇരവിപുരം മുൻ എം.എൽ.എയുടെ ആസ്തി വികസന ഫണ്ടിൽ നിന്ന് അനുവദിച്ച 3.5 കോടി വിനിയോഗിച്ചാണ് നവീകരണം. ശ്രീനാരായണപുരം, കലാവേദി, മാടൻനട വഴി ദേശീയപാതയിലേക്ക് എത്തുന്ന ഈ റോഡ് രണ്ട് കിലോമീറ്ററോളമുണ്ട്. അമ്മൻനട, അയത്തിൽ, വടക്കേവിള, പള്ളിമുക്ക് ഡിവിഷനുകളിലെ ജനങ്ങൾക്ക് ഹൈവേയിലേക്ക് വേഗം എത്താനുള്ള പ്രധാന റോഡാണിത്. എന്നാൽ 15 വർഷത്തിലേറെയായി ഈ റോഡ് തകർന്നു കിടക്കുകയാണ്.

മൂന്ന് വർഷം മുമ്പാണ് നിലവിലെ കരാറുകാരൻ കരാർ ഏറ്റെടുത്തത്. ഓട നിർമ്മാണത്തിനായി കുഴിയെടുത്തതോടെ പലർക്കും വീടുകളിൽ നിന്ന് റോഡിലേക്ക് ഇറങ്ങാൻ പോലും കഴിയാത്ത അവസ്ഥയായി​. സാമ്പത്തിക പ്രയാസങ്ങൾ ചൂണ്ടിക്കാട്ടി കരാറുകാരൻ ജോലി സമയബന്ധിതമായി പൂർത്തിയാക്കാതിരുന്നതിനെ തുടർന്ന് എം.എൽ.എയും കോർപ്പറേഷനും ചേർന്ന് ഹിയറിംഗ് നടത്തുകയും രണ്ട് മാസത്തിനകം പണി തീർക്കാമെന്ന് കരാറുകാരൻ ഉറപ്പുനൽകുകയും ചെയ്തിരുന്നു. അതിനുശേഷം രണ്ട് ദിവസം പണി​ നടന്നു. ജോലിക്ക് ശേഷം പണി വീണ്ടും ഉപേക്ഷിക്കുകയായിരുന്നു.

കരാറുകാരന് നോട്ടീസ്

​കരാറുകാരന് കോർപ്പറേഷൻ അന്തി​മ നോട്ടീസ് നൽകിയിട്ടുണ്ട്. നോട്ടീസ് ലഭിച്ച് 5 ദിവസത്തിനകം മറുപടി നൽകിയില്ലെങ്കിൽ ഇദ്ദേഹത്തെ ഒഴിവാക്കി കരിമ്പട്ടികയിൽ ഉൾപ്പെടുത്തും. റിസ്ക് ആൻഡ് കോസ്റ്റിൽ റീ-ടെൻഡർ ചെയ്യാനും തീരുമാനി​ച്ചി​ട്ടുണ്ട്. വർദ്ധിച്ച മെറ്റീരിയൽ നിരക്കുകൾ മൂലം തുകയിൽ ഉണ്ടാകുന്ന വ്യത്യാസം എം.എൽ.എ ഫണ്ടിൽ നിന്ന് ലഭ്യമാക്കുമെന്ന് ഉറപ്പു ലഭിച്ചു. റീ-ടെൻഡർ നടപടികളിലൂടെ റോഡ് നിർമ്മാണം എത്രയും വേഗം പൂർത്തിയാക്കാനുള്ള ശ്രമത്തിലാണ് അധികൃതർ.

കരാറുകാരന്റെ അലംഭാവം മാത്രമാണ് നിർമ്മാണം വൈകാൻ കാരണം. പ്രദേശവാസികളും കൗൺസിലർമാരും നിരന്തരം ഇടപെട്ടിട്ടും അനുകൂലമല്ല കരാറുകാരന്റെ പ്രതി​കരണം. സാമ്പത്തിക ശേഷിയുമുള്ളവർക്ക് മാത്രം ഇത്തരം വലിയ തുകയുടെ കരാറുകൾ നൽകാൻ അധികൃതർ ശ്രദ്ധിക്കണം. ജനങ്ങളെ ബുദ്ധിമുട്ടിക്കുന്ന കരാറുകാർക്കെതിരെ കർശന ശിക്ഷാനടപടികൾ സ്വീകരിക്കണം

കൃഷ്ണകുമാർ, വാർഡ് കൗൺസിലർ