എമ്പാർക്കേഷൻ പോയിന്റ്: കോഴിക്കോട് നിന്ന് കണ്ണൂരിലേക്ക് 516 പേരെ മാറ്റും

കരിപ്പൂർ: കോഴിക്കോട് വിമാനത്താവളം വഴി പുറപ്പെടേണ്ട 516 ഹജ്ജ് തീർത്ഥാടകരുടെ യാത്ര കണ്ണൂരിലേക്ക് മാറ്റും. കോഴിക്കോട് നിന്നുള്ള ഉയർന്ന ടിക്കറ്റ് നിരക്കിൽ മാറ്റം വരുത്താൻ വിമാന കമ്പനി തയ്യാറാവാത്തതിനെ തുടർന്നാണ് ഈ നടപടി. കണ്ണൂർ എമ്പാർക്കേഷൻ പോയിന്റിൽ നിലവിൽ 516 സീറ്റുകൾ ലഭ്യമാണെന്ന് ഇവിടെ നിന്ന് സർവീസ് നടത്തുന്ന എയർലൈൻ കമ്പനി കേന്ദ്ര,​ സംസ്ഥാന ഹജ്ജ് കമ്മിറ്റികളെ അറിയിച്ചിട്ടുണ്ട്. കൂടുതൽ പേർ രംഗത്തുവന്നാൽ നറുക്കെടുപ്പിലൂടെയാവും കണ്ണൂർ വഴിയുള്ള യാത്രക്കാരെ തിര‍ഞ്ഞെടുക്കുക.

നിലവിൽ ഹജ്ജ് അപേക്ഷയിൽ കോഴിക്കോട് എമ്പാർക്കേഷൻ പോയിന്റ് ഒന്നാമത്തെ ഒപ്ഷനായും, രണ്ടാമത്തെ ഒപ്ഷൻ കണ്ണൂരും നൽകിയവർക്ക് മാത്രമാണ് ഈ അവസരം നൽകുക. 1,​423 പേരാണ് ഈ രീതിയിൽ ഹജ്ജ് അപേക്ഷ സമർപ്പിച്ചത്. ഇവർക്ക് എമ്പാർക്കേഷൻ പോയിന്റ് മാറ്റുന്നതിനു പ്രത്യേകം അപേക്ഷ ക്ഷണിക്കും. ഇതിന് കൃത്യമായ മാർഗ്ഗനിർദ്ദേശങ്ങൾ കേന്ദ്ര ഹജ്ജ് കമ്മിറ്റി ഉടനെ പുറത്തിറക്കുമെന്ന് സംസ്ഥാന ഹജ്ജ് കമ്മിറ്റി ചെയർമാൻ ഡോ. ഹുസൈൻ സഖാഫി ചുള്ളിക്കോട് അറിയിച്ചു.