മെഡിക്കൽ കോളേജ് ആശുപത്രിക്ക് മുഴുവൻ സമയ സൂപ്രണ്ട്: ഡോ. ലിജോ കൊള്ളന്നൂർ ചുമതലയേറ്റു

മുളങ്കുന്നത്തുകാവ്: മെഡിക്കൽ കോളേജ് ആശുപത്രിക്ക് മുഴുവൻ സമയ സൂപ്രണ്ടായി ന്യൂറോ സർജറി വിഭാഗം അസോസിയേറ്റ് പ്രൊഫസർ ഡോ. ലിജോ കൊള്ളന്നൂരിനെ സർക്കാർ നിയമിച്ചു. കഴിഞ്ഞ നാല് വർഷമായി ഇൻചാർജ് സൂപ്രണ്ടുമാരെ നിയമിച്ചാണ് ആശുപത്രി പ്രവർത്തിച്ചിരുന്നത്. മുഴുവൻ സമയ സൂപ്രണ്ടിന്റെ അഭാവം ആശുപത്രിയുടെ വികസന പ്രവർത്തനങ്ങളുടെ ഏകോപനത്തെ സാരമായി ബാധിച്ചിരുന്നുവെന്നാണ് വിലയിരുത്തൽ. ഡെപ്യൂട്ടി സൂപ്രണ്ടുമാരായി ജനറൽ മെഡിസിൻ വിഭാഗം അസോസിയേറ്റ് പ്രൊഫസർ ഡോ. എ.ജെ. ജിയോ പോൾ, ന്യൂറോ സർജറി വിഭാഗം അസോസിയേറ്റ് പ്രൊഫസർ ഡോ. യു.എ. ഷാജി, ഫാർമക്കോളജി വിഭാഗം അസിസ്റ്റന്റ് പ്രൊഫസർ ഡോ. ഇ.ബി. ബിനോയ് എന്നിവരെയും നിയമിച്ചു. ഓർത്തോപീഡിക്‌സ് വിഭാഗം അസിസ്റ്റന്റ് പ്രൊഫസർ ഡോ. അലി ഷാബിത്താണ് പുതിയ ആർ.എം.ഒ. എ.ആർ.എം.ഒയായി ഡോ. ജെ.പി. പത്മയെ നിയമിച്ചു.