ചൈനയുടേത് മണ്ടത്തരമോ അതിബുദ്ധിയോ? മാസം 85,000 രൂപ ശമ്പളം നൽകി റോബോട്ടിനെ പഠിപ്പിക്കുന്നു, രാജ്യം മുഴുവൻ സെന്ററുകൾ

ബീജിംഗ്: പുറമേനിന്ന് നോക്കിയാൽ വിചിത്രമെന്ന് തോന്നുന്ന ചില ജോലികളാണ് ചൈനയിൽ ഇപ്പോൾ ട്രെൻഡാവുന്നത്. 'റോബോട്ട് ട്രെയിനർ' എന്നാണ് ഈ ജോലിയുടെ പേര്. 'മോഷൻ ക്യാപ്‌ചർ സെൻസർ' ഉപയോഗിച്ച് സാധാരണ വീട്ടുജോലികൾ ചെയ്യുന്നതാണ് ഇവരുടെ പണി. പാത്രം കഴുകുക, തുണികൾ കഴുകുക, തുണികൾ മടക്കി വയ്ക്കുക, വീട് അടിച്ചുവാരുക എന്നിങ്ങനെയാണ് റോബോട്ട് ട്രെയിനർമാരുടെ പണി. കാര്യം സിംപിളാണെന്ന് തോന്നുമെങ്കിലും ഈ ജോലി അത്ര സിംപിളല്ല.

വീടും ഫാക്‌ടറികളുമൊക്കെ എങ്ങനെ കൈകാര്യം ചെയ്യാമെന്ന് ആർട്ടിഫിഷ്യൽ ഇന്റലിജൻസിനെ (എഐ) പഠിപ്പിക്കുന്നതിന് ആവശ്യമായ ഭൗതിക വിവരങ്ങൾ ശേഖരിക്കുന്നതിനായാണ് മനുഷ്യരെക്കൊണ്ട് ഈ ജോലികൾ ചെയ്യിപ്പിക്കുന്നത്. നിർമ്മാണം, ലോജിസ്റ്റിക്സ്, ഗാർഹിക സഹായം, വയോജന പരിചരണം എന്നിങ്ങനെയുള്ള മേഖലകളിൽ ഹ്യുമനോയിഡ് റോബോട്ടുകളെ വിന്യസിക്കുകയാണ് ചൈനയുടെ ലക്ഷ്യം.

എന്താണ് റോബോട്ട് ട്രെയിനർ ചെയ്യുന്നത്?

സെൻസർ ബ്രേസ്‌ലെറ്റ്, ക്യാമറ പോലെയുള്ള പ്രത്യേക സെൻസർ ഗിയറുകൾ കയ്യിൽ ധരിച്ച് കമ്പ്യൂട്ടർ സ്‌ക്രീനിലെ നിർദേശങ്ങൾ പിന്തുടരുകയാണ് റോബോട്ട് ട്രെയിനർമാർ ചെയ്യുന്നത്. സാധനങ്ങൾ നീക്കുക, അടുക്കള വൃത്തിയാക്കുക തുടങ്ങി എല്ലാവിധ വീട്ടുജോലികളും നിരന്തരം ചെയ്തുകൊണ്ടേയിരിക്കണം. ഒരുകാര്യംതന്നെ ഇരുന്നൂറോ മുന്നൂറോ തവണ ആവർത്തിക്കേണ്ടതായി വരും. ഓരോ പ്രവൃത്തിക്കും ക്വാട്ട പൂർത്തിയാക്കേണ്ടതുണ്ട്. മനുഷ്യരുടെ ഈ ചലനങ്ങൾ റെക്കോർഡ് ചെയ്തു സൂക്ഷിക്കും. ഭാവിയിൽ റോബോട്ടുകളെ പഠിപ്പിക്കാൻ ഈ ചലനങ്ങൾ ഉപയോഗിക്കും. മനുഷ്യരുടെ ഉൽപ്പാദനക്ഷമതയും വേഗതയും കമ്പ്യൂട്ടർ സ്‌ക്രീൻ നിരീക്ഷിക്കുകയും ചെയ്യും.

ശമ്പളം

സാമൂഹിക മാദ്ധ്യമങ്ങളിലൂടെയും മറ്റും പരസ്യം നൽകിയാണ് റോബോട്ട് ട്രെയിനർമാർ റിക്രൂട്ട് ചെയ്യുന്നത്. മാസം ഏകദേശം 85,000 രൂപയാണ് ഇവർക്ക് ശമ്പളം.

റോബോട്ട് ട്രെയിനിംഗ് സെന്റർ

റോബോട്ട് പരിശീലനത്തിനായി രാജ്യവ്യാപക ശൃംഖലകൾ നിർമിക്കാനുള്ള നീക്കത്തിലാണ് ചൈന. നിലവിൽ പല പ്രവിശ്യകളിലും കേന്ദ്രങ്ങൾ പ്രവർത്തിച്ച് തുടങ്ങിയിട്ടുണ്ട്.

ലാംഗ്വേജ്, വിഷൻ മോഡലുകളിൽ നിന്ന് വ്യത്യസ്തമായി, ഹ്യൂമനോയിഡ് റോബോട്ടുകൾക്ക് നേരിട്ടുള്ള ഇടപെടൽ ഡാറ്റ ആവശ്യമാണ്. പരിശീലന ഡാറ്റാ സെറ്റുകളിൽ സംയുക്ത ചലന പാരാമീറ്ററുകൾ, വേഗത, ഭ്രമണ മെട്രിക്സ്, വിഷ്വൽ ഇൻപുട്ട്, സ്പർശന സെൻസിംഗ്, മർദ്ദം റീഡിംഗുകൾ, ഫോഴ്‌സ് ഫീഡ്‌ബാക്ക് എന്നിവ ഉൾപ്പെടുന്നു. ചലനാത്മക ഭൗതിക പരിതസ്ഥിതികളിൽ സുരക്ഷിതവും വിശ്വസനീയവുമായ പ്രവർത്തനത്തിന് ഈ മൾട്ടിമോഡൽ ഇൻപുട്ടുകൾ നിർണായകമാണ്.

ചൈന ഇതിനോടകം തന്നെ 40ലധികം റോബോട്ട് ഡാറ്റാ സെന്ററുകൾ സർക്കാരിന്റെ പിന്തുണയോടെ സ്ഥാപിച്ചിട്ടുണ്ടെന്നും 24 എണ്ണം ഇതിനകം പ്രവർത്തനക്ഷമമാണെന്നാണ് റിപ്പോർട്ടുകൾ വ്യക്തമാക്കുന്നത്. ഈ കേന്ദ്രങ്ങളിൽ പലതും ആയിരക്കണക്കിന് ചതുരശ്ര മീറ്ററിൽ വ്യാപിച്ചുകിടക്കുന്നവയാണ്. കൂടാതെ ഡസൻ കണക്കിന് ഹ്യൂമനോയിഡ് പ്ലാറ്റ്‌ഫോമുകളും ഇവിടെയുണ്ട്. ഈ കേന്ദ്രങ്ങളിൽ വീട്, നിർമാണ ശാലകൾ, വയോജന പരിപാലനം എന്നിവയ്ക്ക് സമാനമായ അന്തരീക്ഷവും സംവിധാനങ്ങളും ക്രമീകരിച്ചിട്ടുണ്ട്.

ഒരു കേന്ദ്രത്തിൽ പ്രതിവർഷം ഏകദേശം ആറ് ദശലക്ഷം ഡാറ്റാ എൻട്രികൾ സൃഷ്ടിക്കപ്പെടുന്നുവെന്നാണ് റിപ്പോർട്ടുകൾ വ്യക്തമാക്കുന്നത്. പരിശീലനം ലഭിച്ച ഹ്യൂമനോയിഡുകൾ ഇപ്പോൾ 20ലധികം വ്യത്യസ്ത ജോലികൾ ചെയ്യുന്നുണ്ടെന്നും, നിയന്ത്രിത സാഹചര്യങ്ങളിൽ ഇവയുടെ പ്രവർത്തന വിജയം ഏകദേശം 95 ശതമാനമാണെന്നും എൻജിനീയർമാർ ചൂണ്ടിക്കാട്ടുന്നു.

മികച്ച വരുമാനം

റോബോട്ടിക് കേന്ദ്രങ്ങളുടെ വരുമാന വളർച്ചയ്ക്കും പരിശീലന ശൃംഖല ഇതിനകം തന്നെ സംഭാവന നൽകുന്നുണ്ട്. ജിയാംഗ്‌സി, ഗ്വാംഗ്‌സി, സിചുവാൻ എന്നിവിടങ്ങളിലെ ഡാറ്റാ സെന്ററുകൾ വില്പനയിൽ ഗണ്യമായ വർദ്ധനവിന് കാരണമായതായി റിപ്പോർട്ടുണ്ട്. ഒരു പ്രധാന റോബോട്ടിക് കമ്പനി 566 ദശലക്ഷം യുവാന് (ഏകദേശം എട്ട് ബില്യൺ രൂപ) ഹ്യൂമനോയിഡ് സിസ്റ്റം വിറ്റതായി റിപ്പോർട്ടുണ്ട്.

ഭാവി ഭീഷണികൾ

വീട്ടുജോലി, വയോജന പരിപാലനം, നിർമാണ ജോലികൾ എന്നിവയിൽ റോബോട്ടുകൾ എത്തുന്നതോടെ തൊഴിൽ ദൗർലഭ്യം വളരെയധികം വർദ്ധിക്കുമെന്ന ആശങ്ക ശക്തമാണ്. ഒട്ടനേകം മനുഷ്യർക്ക് ജോലി നഷ്ടപ്പെടാനിടയുണ്ട്. മനുഷ്യർക്ക് ശമ്പളം നൽകാതെ തന്നെ ജോലികൾ ചെയ്യിപ്പിക്കാൻ സാധിക്കുമെന്നതിനാൽ വലിയ കമ്പനികളും സ്ഥാപനങ്ങളും ഭാവിയിൽ റോബോട്ടുകളെയായിരിക്കും കൂടുതലായി നിയമിക്കുക. ഇത് തൊഴിലില്ലായ്മയിലും സാമ്പത്തിക ഞെരുക്കത്തിലും പട്ടിണിയിലും ദാരിദ്ര്യത്തിലുമായിരിക്കും മനുഷ്യരെ കൊണ്ടെത്തിക്കുക.