നീറ്റ് ചോദ്യപേപ്പർ ചോർച്ച : സി.ബി.ഐ കണ്ടെത്തലിൽ എൻ.ടി.എയ്ക്ക് ആശ്വാസം

ന്യൂഡൽഹി : നീറ്റ് ചോദ്യപേപ്പർ ചോർച്ചയിൽ പരീക്ഷാനടത്തിപ്പുകാരായ നാഷണൽ ടെസ്റ്റിംഗ് ഏജൻസി (എൻ.ടി.എ) ഉദ്യോഗസ്ഥർക്ക് പങ്കില്ലെന്ന സി.ബി.ഐ കണ്ടെത്തൽ കേന്ദ്രസർക്കാരിനും എൻ.ടി.എയ്‌ക്കും ഒരുപോലെ ആശ്വാസമായി. സുപ്രീംകോടതിയുടെ സജീവശ്രദ്ധയുള്ള വിഷയമായതുകൊണ്ടുകൂടിയാണത്. പാട്നയിലെ പ്രത്യേക കോടതിയിൽ രണ്ടാമത്തെ കുറ്റപത്രം സമർപ്പിച്ചിരിക്കുകയാണ് സി.ബി.ഐ. . ജാർഖണ്ഡിലെ ഹസാരിബാഗ് ഒയാസിസ് സ്‌കൂ‍ൾ പ്രിൻസിപ്പൽ ഡോ. അഹ്സനുൾ ഹഖ്,​ വൈസ് പ്രിൻസിപ്പൽ മുഹമ്മദ് ഇംതിയാസ് ആലം,​ മാദ്ധ്യമപ്രവർത്തകനായ ജമാലുദ്ദിൻ തുടങ്ങി ആറ് പ്രതികളാണുള്ളത്. രണ്ടു കുറ്റപത്രങ്ങളിലുമായി ആകെ 20 പ്രതികളായി.

ഗൂഢാലോചന,​ തട്ടിപ്പ്,​ തെളിവു നശിപ്പിക്കൽ,​ അഴിമതി നിരോധന നിയമത്തിലെ വിവിധ വകുപ്പുകൾ എന്നിവ പ്രകാരമാണ് കേസ്. ഇതുവരെ 48 പേരാണ് അറസ്റ്റിലായത്. ആഗസ്റ്റ് ഒന്നിനാണ് ആദ്യ കുറ്റപത്രം സി.ബി.ഐ സമർപ്പിച്ചത്.