കുട്ടികളെ കാണാതാകൽ: അന്വേഷണത്തിന് കേന്ദ്ര പോർട്ടൽ വേണം

ന്യൂഡൽഹി: കാണാതാകുന്ന കുട്ടികളെ കണ്ടെത്താൻ കേന്ദ്ര ആഭ്യന്തര മന്ത്രാലയം പ്രത്യേക പോർട്ടൽ തയ്യാറാക്കണമെന്ന് സുപ്രീംകോടതി. രാജ്യത്ത് കുട്ടിക്കടത്തും, തട്ടിക്കൊണ്ടുപോകലും വർദ്ധിക്കുന്നെന്ന പരാതിയിലാണിത്. സംസ്ഥാനങ്ങളിലെ പൊലീസ് സംവിധാനങ്ങൾ തമ്മിൽ ഏകോപനത്തിന്റെ കുറവുണ്ട്. അതിനാൽ പല കേസുകളിലും കുട്ടികളെ കണ്ടെത്താൻ കഴിയുന്നില്ല. ഈ സാഹചര്യം മാറണമെന്ന് ജസ്റ്റിസുമാരായ ബി.വി. നാഗരത്ന, ആർ. മഹാദേവൻ എന്നിവരടങ്ങിയ ബെഞ്ച് നിലപാടെടുത്തു. അന്വേഷണത്തിനും ഏകോപനത്തിനും കേന്ദ്രത്തിന് കീഴിൽ പൊതു പോർട്ടൽ അഭികാമ്യമാകും. നിലപാട് അറിയിക്കാമെന്ന് അഡീഷണൽ സോളിസിറ്റർ ജനറൽ ഐശ്വര്യ ഭാട്ടി പറഞ്ഞു. ഒക്ടോബർ 14ന് വീണ്ടും പരിഗണിക്കും.