നിവേദിത ദുബെ എയർപോർട്ട് അതോറിട്ടിയിലെ വനിതാ അംഗം

ന്യൂഡൽഹി: എയർപോർട്ട് അതോറിട്ടി ഓഫ് ഇന്ത്യയുടെ ബോ‌ർഡ് ഓഫ് ഡയറക്‌ടേഴ്സിലെ ആദ്യ വനിതാ അംഗമായി നിവേദിത ദുബെ ചുമതലയേറ്റു. ഇന്ത്യൻ വ്യോമയാന മേഖലയ്‌ക്കിത് ചരിത്ര നിമിഷമാണ്. ഉത്തർപ്രദേശ് പ്രയാഗ്‌രാജ് സ്വദേശിനിയാണ്. മെ‌ംബർ (ഹ്യൂമൻ റിസോഴ്സസ്) എന്ന പദവിയിലാണ് നിയമിതയായത്. എയർപോർട്ട് അതോറിട്ടി ഓഫ് ഇന്ത്യയുടെ രണ്ടാമത്തെ ഉയർന്ന പദവിയാണിത്. പ്രയാഗ്‌‌രാജ് സെന്റ് മേരീസ് കോൺവെന്റ് സ്‌കൂൾ, അലഹബാദ് യൂണിവേഴ്സിറ്റി എന്നിവിടങ്ങളിലായിരുന്നു പഠനം. എയർപോർട്ട് അതോറിട്ടി ഓഫ് ഇന്ത്യയിൽ 1995ൽ ഡൽഹി ഇന്ദിരാ ഗാന്ധി വിമാനത്താവളത്തിലെ എയർപോ‌ർട്ട് മാനേജ‌ർ ആയിട്ടാണ് കരിയറിന്റെ തുടക്കം. അവിടെ മികച്ച പ്രകടനം കാഴ്ചവച്ചു. 2023ൽ ഈസ്റ്റേൺ റീജിയനൽ എക്‌സിക്യൂട്ടീവ് ഡയറക്‌ടർ പദവിയിലെത്തുന്ന ആദ്യ വനിതയായി. കിഴക്കൻ മേഖലയിലെ വിമാനത്താവളങ്ങൾ ലാഭകരമാക്കുന്നതിൽ നിർണായക പങ്കുവഹിച്ചു.