സുനിത മടങ്ങിവരുന്നു

വാഷിംഗ്ടൺ: ഒമ്പത് മാസത്തോളം നീണ്ട ബഹിരാകാശ വാസം. ഒടുവിൽ നാസയുടെ ബഹിരാകാശ സഞ്ചാരികളായ സുനിത വില്യംസും ബുച്ച് വിൽമോറും ഭൂമിയിലേക്ക് മടങ്ങാൻ തയ്യാറെടുക്കുന്നു. നിലവിൽ അന്താരാഷ്ട്ര ബഹിരാകാശ നിലയത്തിലാണ് ഇരുവരും.

നാസയുടെ സ്പേസ് എക്സ് ക്രൂ - 10 മിഷന്റെ ഭാഗമായി 4 സഞ്ചാരികൾ നിലയത്തിൽ എത്തി ഒരാഴ്ചയ്ക്ക് ശേഷം സുനിതയ്ക്കും വിൽമോറിനും മടങ്ങാനാകും. കാലാവസ്ഥ അടക്കമുള്ള ഘടകങ്ങൾ അനുകൂലമായാൽ മാർച്ച് 12 രാത്രി 11.48ന് (ഇന്ത്യൻ സമയം, 13ന് രാവിലെ 5.18) ഫ്ലോറിഡയിൽ നിന്ന് ഫാൽക്കൺ റോക്കറ്റിൽ ക്രൂ - 10 പേടകം വിക്ഷേപിക്കും. പേടകത്തിലെത്തുന്ന 4 സഞ്ചാരികൾക്കുവേണ്ട പരിശീലനവും നിർദ്ദേശങ്ങളും നൽകിയ ശേഷം മാർച്ച് 19 ഓടെ സുനിതയ്ക്കും വിൽമോറിനും മടങ്ങാനാകുമെന്നാണ് പ്രതീക്ഷ.

# മടക്കം ഇങ്ങനെ

 സുനിതയും വിൽമോറും 8 ദിവസത്തെ ദൗത്യത്തിനായി 2024 ജൂണിൽ ബോയിംഗ് സ്റ്റാർലൈനർ പേടകത്തിൽ നിലയത്തിൽ എത്തി

 പേടകത്തിലെ ഹീലിയം ചോർച്ച മൂലം ഇരുവരും നിലയത്തിൽ കുടുങ്ങി. സ്‌റ്റാർലൈനറിനെ സെപ്തംബറിൽ ആളില്ലാതെ ഭൂമിയിൽ തിരിച്ചെത്തിച്ചു

 സുനിതയും വിൽമോറും ഭൂമിയിൽ തിരിച്ചെത്തുക നിലയത്തിൽ ഡോക്ക് ചെയ്തിട്ടുള്ള സ്‌പേസ് എക്‌സ് ക്രൂ - 9 മിഷൻ പേടകത്തിൽ. ഈ പേടകം സെപ്തംബറിലാണ് നിലയത്തിൽ എത്തിയത്

 നാസ സഞ്ചാരി നിക്ക് ഹേഗ്, റഷ്യയുടെ അലക്‌സാണ്ടർ ഗോർബുനോവ് എന്നിവരും മടക്കയാത്രയിൽ സുനിതയ്ക്കൊപ്പമുണ്ടാകും (ക്രൂ - 9 മിഷനിലൂടെയാണ് ഇരുവരും നിലയത്തിൽ എത്തിയത്)