താരിഫ്: മെക്‌സിക്കോയ്‌ക്ക് ആശ്വാസം

വാഷിംഗ്ടൺ: മെക്സിക്കോയ്ക്ക് താരിഫ് ഇളവ് പ്രഖ്യാപിച്ച് യു.എസ് പ്രസിഡന്റ് ഡൊണാൾഡ് ട്രംപ്. യു.എസ്-മെക്സിക്കോ-കാനഡ വ്യാപാര കരാറിന് കീഴിൽ വരുന്ന ഇറക്കുമതികൾക്ക് ഏപ്രിൽ 2 വരെ മെക്സിക്കോ യു.എസിൽ താരിഫ് നൽകേണ്ടതില്ലെന്ന് ട്രംപ് അറിയിച്ചു. മെക്സിക്കൻ പ്രസിഡന്റ് ക്ലൗഡിയ ഷെയ്ൻബോമുമായി നടത്തിയ ഫോൺ സംഭാഷണത്തിന് പിന്നാലെയാണ് നീക്കം. കനേഡിയൻ ഇറക്കുമതികൾക്കുള്ള താരിഫിനും ഇളവ് ലഭിച്ചേക്കുമെന്നാണ് സൂചന. മെക്സിക്കോയിൽ നിന്നും കാനഡയിൽ നിന്നുമുള്ള ഇറക്കുമതികൾക്ക് 25 ശതമാനം താരിഫാണ് ട്രംപ് പ്രഖ്യാപിച്ചത്. ഫെബ്രുവരി 4നായിരുന്നു താരിഫ് നിലവിൽ വരേണ്ടിയിരുന്നതെങ്കിലും ഒരു മാസത്തെ സാവകാശം ഇരുരാജ്യങ്ങൾക്കും നൽകിയിരുന്നു.