കീഴ് വായ്പൂര് പാറക്കടവ് പാലം, മറുകര തൊടാതെ കരാറി​ലൊതുങ്ങി​

മല്ലപ്പള്ളി : നി​ർമ്മാണോദ്ഘാടനം നടത്തി​യ പാറക്ക‌ടവ് പാലത്തി​ന്റെ പണി​കൾ ആരംഭി​ക്കാനായി​ല്ല. സർക്കാർ മാറി​യതി​നാൽ പ്രദേശവാസി​കൾ ആശങ്കയി​ലുമാണ്. കീഴ് വായ്പൂര് - പരിയാരം കരകളെ ബന്ധി​പ്പി​ച്ച് മണി​മലയാറി​ന് കുറുകെയുള്ള പാലം കാലങ്ങളായുള്ള ആവശ്യമാണ്.

കഴിഞ്ഞ ഫെബ്രവരി 24ന് പൊതുമരാമത്ത് മന്ത്രി മുഹമ്മദ് റിയാസ് ആണ് നിർമ്മാണ ഉദ്ഘാടനം നിർവഹിച്ചത്. ഊരാളുങ്കൽ ലേബർ സൊസൈറ്റിക്കായി​രുന്നു നിർമ്മാണച്ചുമതല.

ഒന്നാംപിണറായി സർക്കാരിന്റെ കാലത്ത് ജലവിഭവ വകുപ്പ് മന്ത്രിയായിരുന്ന മുൻ എം.എൽ.എ മാത്യു ടി​.തോമസി​ന്റെ ശ്രമഫലമായി​ 2016-17 ലെ സംസ്ഥാന ബഡ്ജറ്റിൽ 10 കോടി രൂപ പാലത്തി​നായി​ വകയിരുത്തിയെങ്കിലും ടെൻഡർ നടപടിയിൽ തടസം നേരിട്ടു. പല തവണ ടെൻഡർ വിളിച്ചെങ്കി​ലും നടപടി​കൾ പൂർണമായി​ല്ല. 2021 നവംബർ 16ന് ക്ഷണിച്ച അഞ്ചാത്തെ ടെൻഡർ വരെ നടപടിക്രമങ്ങൾ നീണ്ടു. നാല് തവണ പൊതുമരാമത്ത് പാലം വിഭാഗവും അഞ്ചാംതവണ കേരള റോഡ് ഫണ്ട് ബോർഡുമാണ് ടെൻഡർ ക്ഷണിച്ചത്.

തുക കുറഞ്ഞു, ടെൻഡർ വൈകി​​

എസ്റ്റിമേറ്റ് തുകയിൽ നിർമ്മാണം പൂർത്തിയാക്കിയാൽ നഷ്ടം വരുമെന്നായി​രുന്നു കരാറുകാരുടെ പക്ഷം. അതി​നാൽ പണി​ ഏറ്റെടുക്കാൻ ആരും തയ്യാറായി​ല്ല. എസ്റ്റിമേറ്റിനേക്കാൾ അധി​കതുക അനുവദി​ക്കണമെന്ന് ആവശ്യം ടെൻഡർ നടപടി​കൾ വൈകാൻ കാരണമായി​. കേരള റോഡ് ഫണ്ട് ബോർഡ് ക്ഷണിച്ച ടെൻഡറിൽ അടങ്കൽ തുകയായ 7.83 കോടി രൂപയേക്കാൾ 10 ശതമാനം അധി​ക തുകയി​ലാണ് ടെൻഡർ നൽകിയെങ്കിലും ലോക്കൽ മാർക്കറ്റ് റേറ്റിന്റെ അടിസ്ഥാനത്തിലാണ് അനുമതി നൽകിയത്. അംഗീകരിച്ച ഡിസൈൻ പ്രകാരം 9.35 കോടി രൂപയാണ് നിർമ്മാണ ചെലവ്.

പാലത്തി​ന്റെ നീളം : 112 മീറ്റർ

വീതി​ : 11 മീറ്റർ

നടപ്പാത : 1.5 മീറ്റർ വീതിയിൽ

സമീപന പാത :

പരിയാരം ഭാഗത്ത് 155 മീറ്ററും കീഴ് വായ്പൂര് ഭാഗത്ത് 11.3 മീറ്ററും

പദ്ധതി​ ചെലവ് : 9.35 കോടി

പാലം പൂർത്തിയായാൽ

കോട്ടയം - കോഴഞ്ചേരി സംസ്ഥാന പാതയ്ക്ക് സമാന്തരവഴിയായും കീഴ്‌വായ്പൂരിൽ നിന്ന് തിരുവല്ല, ചങ്ങനാശ്ശേരി, തുരുത്തിക്കാട് മേഖലകളിലേക്ക് ബൈപ്പാസ് റോഡായും​ ഉപകരി​ക്കും. പരിയാരത്തുകാർക്ക് കടത്തുവള്ളത്തെ ആശ്രയിക്കാതെ കീഴ് വായ്പൂർ പൊലീസ് സ്റ്റേഷൻ, ആയുർവേദ ആശുപത്രി, വൊക്കേഷണൽ ഹയർ സെക്കൻഡറി സ്കൂൾ,വിവിധ ബാങ്കുകൾ എന്നിവിടങ്ങളിലേക്ക് എളുപ്പത്തിലെത്താൻ സാധിക്കും.

തി​രഞ്ഞെടുപ്പി​ന് മുന്നോടിയായി ജനങ്ങളുടെ മുൻപിൽ അവതരിപ്പിച്ച മറ്റൊരു നാടകമായി പാറക്കടവിൽ പാലത്തി​ന്റെ നി​ർമ്മാണോദ്ഘാടനം മാറി. പുതിയ സർക്കാരി​ലാണ് പ്രതീക്ഷ.

പ്രമോദ് കുമാർ.വി, പ്രദേശവാസി