മദ്യലഹരിയിൽ പൊലീസ് സ്‌റ്റേഷനിൽ ആക്രമിക്കാൻ ശ്രമം; യുവാവ് അറസ്റ്റിൽ

വടക്കാഞ്ചേരി: മദ്യലഹരിയിൽ പൊലീസ് സ്‌റ്റേഷന്റെ പിൻവശത്തെ കവാടത്തിലൂടെ അകത്ത് കയറി ഡ്യൂട്ടിയിലുണ്ടായിരുന്ന ഗ്രേഡ് സീനിയർ സിവിൽ പൊലീസ് ഓഫീസറെ (ജി.എസ്.സി.പി.ഒ.) ആക്രമിക്കാൻ ശ്രമിക്കുകയും അസഭ്യം പറയുകയും ചെയ്ത യുവാവ് അറസ്റ്റിൽ. വടക്കാഞ്ചേരി കോടതിക്ക് പുറകിൽ താമസിക്കുന്ന ചാത്തൻകോട്ടിൽ മൊയ്‌നുദ്ധീൻ (ഫൈസൽ-41) ആണ് അറസ്റ്റിലായത്.
ജി.എസ്.സി.പി.ഒ. എം.എസ്. കണ്ണന്റെ (43) പരാതിയിലാണ് നടപടി. കഴിഞ്ഞ ദിവസം രാത്രി 10 മണിയോടെയായിരുന്നു സംഭവം.
ഔദ്യോഗിക കൃത്യനിർവഹണം തടസപ്പെടുത്തിയതിനും സ്‌റ്റേഷനിൽ അതിക്രമിച്ച് കയറി അക്രമത്തിന് ശ്രമിച്ചതിനുമാണ് കേസെടുത്തത്. പ്രതിയെ റിമാൻഡ് ചെയ്തു.