സൂര്യയുടെയും ജ്യോതികയുടെയും 'രണ്ടാം വിവാഹ' വേദി; ചരിത്രപ്രസിദ്ധമായ ഈ കൊട്ടാരത്തിന്റെ ചെലവ് എത്ര?

മുംബയ്: ഇരുപതാം വിവാഹവാർഷികത്തോടനുബന്ധിച്ച് നടൻ സൂര്യയും നടി ജ്യോതികയും സ്കോട്‌ലൻഡിലെ ബ്ലെയർക്വാൻ കാസിലിൽ വിവാഹവാഗ്ദാനങ്ങൾ പുതുക്കിയത് ആരാധകർ ഇരുകയ്യും നീട്ടിയാണ് സ്വീകരിച്ചത്. ആഘോഷത്തിന്റെ ചിത്രങ്ങൾ സമൂഹമാദ്ധ്യമങ്ങളിൽ വൈറലായതിനൊപ്പം വിവാഹത്തിനായി തിരഞ്ഞെടുത്ത വേദിയും എല്ലാവരുടെയും ശ്രദ്ധ നേടിക്കഴിഞ്ഞു.

പച്ചപ്പാർന്ന അയർഷയർ ഗ്രാമപ്രദേശത്ത് സ്ഥിതി ചെയ്യുന്ന ചരിത്രപ്രസിദ്ധമായ കൊട്ടാരം അതിന്റെ ആഡംബരവും പ്രകൃതിഭംഗിയും കൊണ്ടും ശ്രദ്ധേയമാണ്. സ്കോട്ട്ലൻഡിലെ മെയ്ബോളിലുള്ള ബ്ലെയർക്വാൻ കാസിൽ ഏകദേശം 200 ഏക്കറിൽ വ്യാപിച്ചുകിടക്കുന്ന സ്വകാര്യ എസ്റ്റേറ്റാണ്. 15 വ്യത്യസ്ത കിടപ്പുമുറികൾക്കൊപ്പം എട്ട് കോട്ടേജുകളും ഇവിടെയുണ്ട്. ആഡംബര സൗകര്യങ്ങളോടൊപ്പം ചരിത്രപ്രാധാന്യവും നിലനിർത്തിയിരിക്കുന്ന ഈ വേദി വിവാഹങ്ങൾ, സ്വകാര്യ ആഘോഷങ്ങൾ, കോർപ്പറേറ്റ് പരിപാടികൾ എന്നിവയ്ക്കായാണ് ഉപയോഗിക്കുന്നത്.

ബ്ലെയർക്വാൻ കാസിലിൽ വിവാഹത്തിന് എത്ര ചെലവ്?

കാസിലിന്റെ ഔദ്യോഗിക വെബ്സൈറ്റ് പ്രകാരം വിവിധ വിവാഹ പാക്കേജുകളാണ് ലഭ്യമാകുന്നത്. 60 അല്ലെങ്കിൽ 80 അതിഥികൾ പങ്കെടുക്കുന്ന വിവാഹത്തിന് പാക്കേജ് തിരഞ്ഞെടുപ്പനുസരിച്ച് 21,350 പൗണ്ട് മുതൽ 24,350 പൗണ്ട് വരെ ചെലവാകും. ഇന്ത്യൻ രൂപയിൽ ഏകദേശം 27.4 ലക്ഷം മുതൽ 31.2 ലക്ഷം രൂപ വരെ വരും. കാസിലിന്റെ പൂർണമായും സ്വകാര്യമായ ഉപയോഗത്തിനുള്ള ഫീസും കാറ്ററിംഗ് ചെലവും ഇതിൽ ഉൾപ്പെടുന്നു.

കുറച്ചുപേർ മാത്രം പങ്കെടുക്കുന്ന വിവാഹത്തിനുള്ള പാക്കേജുകളും ഇവിടെയുണ്ട്. 30 അതിഥികൾക്കുള്ള പാക്കേജിന് 20,560 പൗണ്ടും 50 അതിഥികൾക്കുള്ള പാക്കേജിന് 23,560 പൗണ്ടും ചെലവാകും. അതായത് ഏകദേശം 26.4 ലക്ഷം മുതൽ 30.2 ലക്ഷം രൂപ വരെ.

വിവാഹ വിരുന്നിനായി അവാർഡ് നേടിയ കാറ്ററിംഗ് പങ്കാളികളെയാണ് കാസിൽ ഉപയോഗിക്കുന്നത്. സീസണൽ ഉല്പന്നങ്ങൾ ഉപയോഗിച്ചാണ് മെനു തയ്യാറാക്കുന്നത്. അതിഥികളുടെ ഭക്ഷണപരമായ ആവശ്യങ്ങൾക്കനുസരിച്ചും മെനു ക്രമീകരിക്കാമെന്ന് അധികൃതർ വ്യക്തമാക്കുന്നു.

എന്തുകൊണ്ട് ബ്ലെയർക്വാൻ കാസിൽ ശ്രദ്ധേയം?

ചരിത്രപ്രസിദ്ധമായ കൊട്ടാരത്തിനുള്ളിലെ 15 കിടപ്പുമുറികളും ആധുനിക സൗകര്യങ്ങളോടൊപ്പം പഴയകാല പ്രൗഢിയും നിലനിർത്തുന്നവയാണ്. ഓരോ മുറിക്കും വ്യത്യസ്തമായ രൂപകൽപ്പനയാണുള്ളത്. മനോഹരമായ കാഴ്ചകളുള്ള ജനാലകൾക്കും പുരാതന ഫർണിച്ചറുകൾക്കും പുറമെ ഹൈസ്പീഡ് ഇന്റർനെറ്റ് ഉൾപ്പെടെയുള്ള സൗകര്യങ്ങളും ലഭ്യമാണ്. കാസിലിന് പുറമെ സ്വയം ഭക്ഷണം പാകം ചെയ്യാവുന്ന കോട്ടേജുകളും അതിഥികൾക്ക് തിരഞ്ഞെടുക്കാം. കോട്ടേജിലെ താമസത്തിന് 534 പൗണ്ട്, ഏകദേശം 68,500 രൂപ, മുതലാണ് നിരക്ക് ആരംഭിക്കുന്നത്.