വാക്ക് തെറ്റിച്ചില്ല; അമ്മമാരെ കാണാൻ 'മുഖ്യമന്ത്രി'യായെത്തി

പറവൂർ: വാക്കു തെറ്റിക്കാതെ മുഖ്യമന്ത്രി വി.ഡി. സതീശൻ വടക്കുംപുറം എസ്.എം.എം.ഐ സ്നേഹാലയത്തിലെത്തി 33 'അമ്മമാർക്കും" ഓണക്കോടി നൽകി. എല്ലാവരെയും ആശ്ളേഷിച്ച് കുശലം ചോദിച്ചു. ആ സ്നേഹവായ്പിൽ പലരും കരഞ്ഞു. പള്ളിത്താഴത്തെ കൊത്തൊലെൻഗോ ജീവകാരുണ്യ കേന്ദ്രത്തിലെത്തി 20 അന്തേവാസി​കൾക്കും ഓണക്കോടി നേരി​ട്ട് കൈമാറി. മുഖ്യമന്ത്രിയായ ശേഷം ഇവിടങ്ങളിലേക്കുള്ള ആദ്യസന്ദർശനമാണ്. പ്രതിപക്ഷ നേതാവായിരുന്നപ്പോൾ രണ്ട് തവണയെത്തി. സ്നേഹാലയത്തിലെ അന്തേവാസികളായ അമ്മമാരോട് ഇനി മുഖ്യമന്ത്രിയായി വരാൻ പ്രാർത്ഥിക്കണമെന്ന് പറ‍ഞ്ഞാണ് അന്ന് മടങ്ങിയത്. അതുകൊണ്ട് സത്യപ്രതിജ്ഞ കണ്ട ശേഷം ഈ വരവും കാത്തിരിക്കുകയായിരുന്നു അവരും.