'എന്തുപറഞ്ഞ്  ആശ്വസിപ്പിക്കണമെന്ന്  അറിയില്ല, സാദ്ധ്യമായതെല്ലാം ചെയ്യും': ഗൗതം കൃഷ്ണയുടെ വീട് സന്ദർശിച്ച് മുഖ്യമന്ത്രി

കൊല്ലം: നീണ്ടകരയിൽ മത്സ്യബന്ധന ബോട്ടുമറിഞ്ഞ് കാണാതായ ഗൗതം കൃഷ്ണയുടെ വീട് സന്ദർശിച്ച് മുഖ്യമന്ത്രി വിഡി സതീശൻ. കുടുംബത്തെ എന്തുപറഞ്ഞ് ആശ്വസിപ്പിക്കണമെന്ന് അറിയില്ലെന്നും ഒരു കുടുംബത്തിനും ഉണ്ടാകാൻ പാടില്ലാത്ത ദുരന്തമാണിതെന്നും അദ്ദേഹം പറഞ്ഞു. തെരച്ചിൽ കാര്യക്ഷമമല്ലെന്ന ആരോപണത്തിൽ വസ്തുതയില്ലെന്നും ഗൗതമിനെ കണ്ടെത്താൻ സാദ്ധ്യമായതെല്ലാം ചെയ്യുമെന്നും മുഖ്യമന്ത്രി വ്യക്തമാക്കി. മന്ത്രി ഷിബു ബേബി ജോൺ, കലക്ടർ ആനി ജൂല തോമസ് എന്നിവരും മുഖ്യമന്ത്രിക്കൊപ്പമുണ്ടായിരുന്നു.

തെരച്ചിൽ ഇപ്പോഴും തുടരുകയാണ്. കാലാവസ്ഥ പ്രതികൂലമായിരിക്കുമ്പോൾ മാത്രമാണ് തെരച്ചിൽ നിർത്തുന്നത്. ആദ്യദിവസം മുതൽ എല്ലാരീതിയിലുമുള്ള തെരച്ചിൽ നടത്തിയിരുന്നു. മോശം കാലാവസ്ഥയിൽ തെരച്ചിലിന് പോകുന്നവർകൂടി അപകടത്തിൽപ്പെടുമെന്ന സാഹചര്യം എത്തിയപ്പോൾ മാത്രമാണ് താൽക്കാലികമായി നിർത്തിയതെന്നും അദ്ദേഹം വിശദീകരിച്ചു. ഇത്തരം ദുരന്തങ്ങളെ പ്രതിരോധിക്കാനുള്ള സംവിധാനങ്ങൾ സർക്കാർ ഉടൻ നടപ്പാക്കും. മത്സ്യത്തൊഴിലാളികളെ ഉൾപ്പെടുത്തിയുള്ള പദ്ധതിയാവും നടപ്പാക്കുക. മത്സ്യത്തൊഴിലാളികളുടെ സുരക്ഷയ്ക്കായി അടിയന്തരമായി താൽക്കാലിക സംവിധാനം നടപ്പാക്കുന്നതിലേക്ക് ഉടൻ കടക്കുമെന്നും മുഖ്യമന്ത്രി വ്യക്തമാക്കി.

അതേസമയം, വിഴിഞ്ഞത്ത് കടലിൽ​ കാണാതായ മത്സ്യത്തൊഴിലാളി ജോണിന്റെ കുടുംബത്തെ ആഭ്യന്തര മന്ത്രി രമേശ് ചെന്നിത്തല സന്ദർശിച്ചു. ജോണിനെ കാണാതായിട്ട് പതിനൊന്ന് ദിവസം പിന്നിട്ടിട്ടും ഇതുവരെ കണ്ടെത്താൻ കഴിഞ്ഞിട്ടില്ല. ഫിഷറീസ് മന്ത്രി വി ഇ അബ്ദുൾ ഗഫൂറും കോവളം എംഎൽഎ എം വിൻസെന്റും രമേശ് ചെന്നിത്തലയോടൊപ്പം വിഴിഞ്ഞത്ത് എത്തിയിരുന്നു. ഇത് ആദ്യമായാണ് ഫിഷറീസ് മന്ത്രി കുടുംബത്തെ സന്ദർശിക്കാൻ എത്തുന്നത്. വളരെ വേദനാജനകമായ സാഹചര്യമാണുള്ളത്. അവർക്ക് നഷ്ടപ്പെട്ടത് വിലപ്പെട്ട ജീവനാണ്. ആ വേദനയിൽ ഞങ്ങളും പങ്കാളികളാകുന്നു. തെരച്ചിൽ ശക്തമായി തന്നെ തുടരും. സർക്കാരിനെ കൊണ്ട് ചെയ്യാൻ കഴിയുന്നതെല്ലാം ചെയ്യുമെന്നും രമേശ് ചെന്നിത്തല കുടുംബത്തെ സന്ദർശിച്ച ശേഷം പ്രതികരിച്ചു.