പകർച്ചവ്യാധി: ജാഗ്രതവേണമെന്ന് മന്ത്രി മുരളീധരൻ

തിരുവനന്തപുരം: മഴ രൂക്ഷമായതോടെ പകർച്ചവ്യാധി പ്രതിരോധത്തിൽ ജാഗ്രത പാലിക്കണമെന്ന് മന്ത്രി കെ.മുരളീധരൻ. ലോക മുലയൂട്ടൽ വാരാചരണത്തിന്റെ സംസ്ഥാനതല ഉദ്ഘാടനം എസ്.എ.ടി ആശുപത്രിയിൽ നിർവഹിക്കുകയായിരുന്നു അദ്ദേഹം. ദുരിതാശ്വാസ ക്യാമ്പുകളിലടക്കം ആവശ്യമായ മരുന്നുകൾ ആരോഗ്യ വകുപ്പ് കരുതിയിട്ടുണ്ട്. നിലവിൽ ആശങ്കയില്ല. സാമ്പത്തികമായും സാമൂഹികമായും പിന്നാക്കം നിൽക്കുന്ന കുടുംബങ്ങളിൽ മുലയൂട്ടലിനെക്കുറിച്ചുള്ള അവബോധക്കുറവ് നിലനിൽക്കുന്നുണ്ട്. അത്തരം കുടുംബങ്ങളിൽ ആരോഗ്യപ്രവർത്തകരും ആശാ പ്രവർത്തകരും ബോധവത്കരണ പ്രവർത്തനങ്ങൾ നടത്തണമെന്നും മന്ത്രി നിർദ്ദേശിച്ചു. വി.മുരളീധരൻ എം.എൽ.എ അദ്ധ്യക്ഷനായി.