തൃക്കരിപ്പൂരിൽ ഭക്ഷണം പാചകം ചെയ്യുന്നതിനിടെ ഗ്യാസ് സിലിണ്ടർ പൊട്ടിത്തെറിച്ചു: ഒഴിവായത് വൻ ദുരന്തം

കാസർകോട്: തൃക്കരിപ്പൂരിൽ ഭക്ഷണം പാചകം ചെയ്യുന്നതിനിടെ ഗ്യാസ് സിലിണ്ടർ പൊട്ടിത്തെറിച്ച് അപകടം. ആളപായമില്ല. ബീരിച്ചേരി കൂലേരിയിലെ കെ പി നിസാറിന്റെ വീട്ടിലാണ് അപകടമുണ്ടായത്. പൊട്ടിത്തെറിയിൽ വീടിന്റെ ഉൾഭാഗം പൂ‌ർണമായും കത്തിനശിച്ചു.

ഇന്ന് വൈകിട്ടോടെയായിരുന്നു സംഭവം. ഭക്ഷണം പാചകം ചെയ്യുന്നതിനിടെ ഗ്യാസ് സിലിണ്ടർ ലീക്കാകുകയും തീപടർന്നുപിടിച്ച് സിലിണ്ടർ ഉഗ്ര ശബ്ദത്തോടെ പൊട്ടിത്തെറിയ്ക്കുകയുമായിരുന്നു. സ്ഫോടനത്തിന്റെ ആഘാതത്തിൽ വീടിന്റെ ഉൾഭാഗം പൂർണമായി തകരുകയും വീട്ടുപകരണങ്ങൾ കത്തിനശിക്കുകയും ചെയ്തു.

അതേസമയം, അപകടസമയം സ്ത്രീകളും കുട്ടികളുമുൾപ്പെടെ നാലുപേ‌ർ വീട്ടിലുണ്ടായിരുന്നെന്നാണ് വിവരം. ഗ്യാസ് ലീക്കായതിന് പിന്നാലെ ഇവർ പുറത്തേയ്ക്ക് ഓടി രക്ഷപ്പെട്ടതിനാൽ വൻ ദുരന്തമാണ് ഒഴിവായത്. വിവരമറിഞ്ഞ് തൃക്കരിപ്പൂരിൽ നിന്നെത്തിയ അഗ്നിരക്ഷാ സേനാ വിഭാഗം തീ പൂർണ്ണമായും അണച്ചു.