കഞ്ഞിവെള്ളം മാത്രം മതി, തക്കാളിയും പച്ചമുളകും ഇനി കുലകുത്തി കായ്‌ക്കും

പലപ്പോഴും എത്രയൊക്കെ ശ്രദ്ധിച്ചാലും ചെടികളും പച്ചക്കറികളും മികച്ച രീതിയിലുള്ള വിളവ് നൽകാറില്ല. മണ്ണിൽ ആവശ്യത്തിന് വളവും പോഷകങ്ങളും ഇല്ലാത്തതാകാം അതിന് കാരണം. വളപ്രയോഗം നൽകുന്നതിലെ ബുദ്ധിമുട്ടുകളും ചെലവും കാരണം പലരും അവ വേണ്ട വിധത്തിൽ പരിഗണിക്കാറില്ല. എന്നാൽ അടുക്കളയിൽ നാം വെറുതെ കളയുന്ന കഞ്ഞിവെള്ളം വേണ്ടരീതിയിൽ ഉപയോഗിച്ചാൽ അടുക്കളത്തോട്ടത്തിലെ വിളവെടുപ്പ് ഇരട്ടിയാക്കാനാകും.

കഞ്ഞിവെള്ളത്തിൽ അടങ്ങിയിരിക്കുന്ന അന്നജം, കാൽസ്യം, ഫോസ്‌ഫറസ്, പൊട്ടാസ്യം തുടങ്ങിയ പോഷകങ്ങൾ ചെടികളുടെ വളർച്ചയെ വേഗത്തിലാക്കാൻ സഹായിക്കുന്നു. കഞ്ഞിവെള്ളം പുളിപ്പിച്ചുവേണം ചെടികൾക്ക് പ്രയോഗിക്കാൻ.

ഉപയോഗിക്കേണ്ട വിധം

• പുളിപ്പിച്ച കഞ്ഞിവെള്ളത്തിലേക്ക് അതിന്റെ ഇരട്ടിയോ മൂന്നിരട്ടിയോ വെള്ളം ചേർത്ത് നേർപ്പിക്കുക. ഇത് ആഴ്‌ചയിൽ രണ്ട് തവണ വീതം ചെടികളുടെ ചുവട്ടിൽ ഒഴിച്ചുകൊടുക്കാം.
• ഇത് മണ്ണിലെ ഗുണകരമായ ബാക്‌ടീരിയകളുടെ എണ്ണം വർദ്ധിപ്പിക്കുകയും മണ്ണ് കൂടുതൽ ഫലഭൂയിഷ്‌ടമാക്കുകയും ചെയ്യുന്നു.
• നന്നായി പുളിപ്പിച്ച കഞ്ഞിവെള്ളം ഒരു സ്‌പ്രേയർ ഉപയോഗിച്ച് ചെടികളുടെ ഇലകളിൽ തളിക്കുന്നത് പ്രാണികളെ അകറ്റിനിർത്തുകയും ചെയ്യുന്നു.
• വീട്ടിൽ നിർമ്മിക്കുന്ന കമ്പോസ്റ്റ് വളങ്ങളിൽ കഞ്ഞിവെള്ളം ചേർക്കുന്നതും നല്ലതാണ്.
• തക്കാളി, വഴുതന, പച്ചമുളക് തുടങ്ങിയവയിൽ മികച്ച രീതിയിൽ വിളവ് ലഭിക്കുന്നതിന് ഈ രീതിയിലുള്ള വളപ്രയോഗം ഗുണം ചെയ്യും.

ശ്രദ്ധിക്കേണ്ട കാര്യം

• ചെടികൾക്ക് ഒഴിക്കാൻ മാറ്റിവയ്‌ക്കുന്ന കഞ്ഞിവെള്ളത്തിൽ ഉപ്പ് ചേർക്കരുത്. ഉപ്പിന്റെ അംശം മണ്ണിന്റെ ഗുണനിലവാരത്തെയും ചെടിയുടെ വളർച്ചയെയും ദോഷകരമായി ബാധിക്കും.
• കഞ്ഞിവെള്ളം കട്ടിയോടെ നേരിട്ടൊഴിച്ചാൽ മണ്ണിൽ പൂപ്പൽ വരാനും സാദ്ധ്യതയുണ്ട്.