വിത്തും ഗ്രോബാഗും മതി; നാലുമാസം കൊണ്ട് 'പ്രോട്ടീൻ കലവറ' വീട്ടുമുറ്റത്ത് വിളയിക്കാം

വീട്ടിൽ ചെറിയ രീതിയിൽ കൃഷി ചെയ്യാൻ ആഗ്രഹിക്കുന്നവർക്ക് പരീക്ഷിക്കാവുന്ന മികച്ച വിളയാണ് നിലക്കടല. അധികം സ്ഥലമോ വലിയ പരിചരണമോ ആവശ്യമില്ലാതെ ഗ്രോബാഗുകളിലും ചട്ടികളിലും നിലക്കടല കൃഷി ചെയ്യാം. ആവശ്യത്തിന് സൂര്യപ്രകാശവും വെള്ളവും ലഭിക്കുകയും മണ്ണ് അനുയോജ്യമായിരിക്കുകയും ചെയ്താൽ വീട്ടിൽത്തന്നെ നിലക്കടല വിളയിച്ചെടുക്കാം.

വിത്ത് തിരഞ്ഞെടുക്കാം

കൃഷിക്കായി നല്ല ഗുണമേന്മയുള്ള നിലക്കടല വിത്തുകൾ തിരഞ്ഞെടുക്കുകയാണ് ആദ്യം വേണ്ടത്. വറുത്ത നിലക്കടല വിത്തായി ഉപയോഗിക്കാനാകില്ല. മുളയ്ക്കാനുള്ള ശേഷിയുള്ള പച്ച നിലക്കടലയാണ് തിരഞ്ഞെടുക്കേണ്ടത്. തോടോടുകൂടിയ നിലക്കടലയിൽ നിന്ന് കേടുപാടുകളില്ലാത്ത വിത്തുകൾ വേർതിരിച്ചെടുക്കാം. തോട് നീക്കുമ്പോൾ അകത്തെ വിത്തിന്റെ തൊലി പൊട്ടാതിരിക്കാൻ ശ്രദ്ധിക്കണം.

മണ്ണ് തയ്യാറാക്കാം

വെള്ളം കെട്ടിനിൽക്കാത്ത മണൽ കലർന്ന പശിമരാശി മണ്ണാണ് നിലക്കടല കൃഷിക്ക് അനുയോജ്യം. ഗ്രോബാഗിലോ വലിയ ചട്ടിയിലോ മണ്ണിനൊപ്പം കമ്പോസ്റ്റും ചകിരിച്ചോറും ചേർക്കാം. മണ്ണ് നല്ല നീർവാർച്ചയുള്ളതും ഇളക്കമുള്ളതുമായിരിക്കണം. കാരണം നിലക്കടല മണ്ണിനടിയിലാണ് രൂപപ്പെടുന്നത്.

വിത്ത് നടേണ്ട രീതി

ഏകദേശം 12–15 ഇഞ്ച് ആഴമുള്ള ഗ്രോബാഗോ വലിയ ചട്ടിയോ തിരഞ്ഞെടുക്കാം. രണ്ടുമുതൽ മൂന്ന് സെന്റിമീറ്റർ വരെ ആഴത്തിൽ വിത്തുകൾ നടാം. ചെടികൾക്ക് വളരാൻ ആവശ്യമായ അകലം നൽകണം. വിത്ത് നട്ടശേഷം മണ്ണ് നനച്ചുകൊടുക്കുക. സാധാരണയായി ഒരാഴ്ചയ്ക്കുള്ളിൽ മുളകൾ പുറത്തുവരാൻ തുടങ്ങും. കാലാവസ്ഥയും വിത്തിന്റെ ഗുണമേന്മയും അനുസരിച്ച് സമയത്തിൽ വ്യത്യാസമുണ്ടാകാം.

സൂര്യപ്രകാശവും വെള്ളവും പ്രധാനം

നിലക്കടല ചെടികൾക്ക് ദിവസവും കുറഞ്ഞത് ആറുമണിക്കൂർ നേരിട്ടുള്ള സൂര്യപ്രകാശം ലഭിക്കുന്നത് നല്ലതാണ്. മണ്ണിൽ ആവശ്യത്തിന് ഈർപ്പം നിലനിർത്തണം. എന്നാൽ അമിതമായി വെള്ളം ഒഴിക്കുന്നത് ഒഴിവാക്കണം. വെള്ളം കെട്ടിനിന്നാൽ വേരുകൾ ചീഞ്ഞുപോകാൻ സാദ്ധ്യതയുണ്ട്. മണ്ണിന്റെ മുകൾഭാഗം ഉണങ്ങുമ്പോൾ മാത്രം വെള്ളം നൽകാം.

പൂക്കൾ വിരിഞ്ഞാൽ ശ്രദ്ധിക്കണം

വിത്ത് നട്ട് ഏകദേശം 30–45 ദിവസത്തിനുള്ളിൽ ചെടികളിൽ മഞ്ഞനിറത്തിലുള്ള പൂക്കൾ പ്രത്യക്ഷപ്പെടാം. പൂക്കൾ വിരിഞ്ഞതിനുശേഷം അവയുടെ തണ്ടുകൾ താഴേക്ക് വളർന്ന് മണ്ണിനുള്ളിലേക്ക് പ്രവേശിക്കും. ഈ തണ്ടുകളുടെ അഗ്രഭാഗത്താണ് പിന്നീട് നിലക്കടലയുടെ കായ്കൾ രൂപപ്പെടുന്നത്. അതിനാൽ ചെടിയുടെ ചുവട്ടിലെ മണ്ണ് ഇളക്കമുള്ളതായിരിക്കണം. കായ്കൾ രൂപപ്പെടുന്ന സമയത്ത് മണ്ണ് അമിതമായി ഇളക്കുന്നത് ഒഴിവാക്കണം.

എപ്പോൾ വിളവെടുക്കാം?

സാധാരണയായി വിത്ത് നട്ട് 90–120 ദിവസത്തിനുള്ളിൽ നിലക്കടല വിളവെടുപ്പിന് തയ്യാറാകും. ചെടികളുടെ ഇലകൾ മഞ്ഞനിറമാകുകയും ഉണങ്ങിത്തുടങ്ങുകയും ചെയ്യുന്നത് വിളവെടുപ്പിന്റെ സൂചനകളാണ്. ഒരു ചെടി ശ്രദ്ധയോടെ പിഴുതെടുത്ത് കായ്കൾ പൂർണമായി വളർന്നിട്ടുണ്ടോയെന്ന് പരിശോധിക്കാം. വിളവെടുത്ത നിലക്കടല വൃത്തിയാക്കി നന്നായി ഉണക്കിയശേഷം സൂക്ഷിക്കാം.