വെറും രസമല്ല, വെളുത്തുള്ളി രസം ട്രൈ ചെയ്തു നോക്കൂ; വായിൽ കപ്പലോടും

രസം ഇഷ്ടമല്ലാത്തവർ വളരെ കുറവാണ്. ചോറിനൊപ്പം നല്ല പുളിയും എരിവുമുള്ള രസം ഒഴിച്ച് കഴിക്കുന്നത് ഇരട്ടി സ്വാദ് നൽകുന്നു. സ്വാദ് മാത്രമല്ല ആരോഗ്യഗുണങ്ങളും രസത്തിനുണ്ട്. ദഹനത്തിന് രസം നല്ലതാണെന്നാണ് പറയപ്പെടുന്നത്. എന്നാൽ ശരിയായ രീതിയിൽ രസം വച്ചാൽ മാത്രമേ ഇതിന്റെ ഗുണവും സ്വാദും ഒരുപോലെ ലഭിക്കുകയുള്ളൂ. എങ്ങനെ ശരിയായ രീതിയിൽ രസം വയ്ക്കാമെന്ന് നോക്കാം.

ആവശ്യമായ സാധനങ്ങൾ

• രസം പൊടി തയ്യാറാക്കാൻ

1. കുരുമുളക് - ഒരു ടീസ്പൂൺ
2. ജീരകം - ഒരു ടീസ്പൂൺ
3. വെളുത്തുള്ളി - 2-3 അല്ലി
4. ഉണങ്ങിയ ചുവന്ന മുളക് - രണ്ട് എണ്ണം

• പ്രധാന കൂട്ടുകൾ

1. വെളുത്തുള്ളി (ചതച്ചത്) - 8-10 അല്ലി
2. തക്കാളി - ഒരു ചെറിയത് (അരിഞ്ഞത്)
3. പുളി - ഒരു നെല്ലിക്ക വലുപ്പത്തിൽ ( വെള്ളത്തിൽ പിഴിഞ്ഞെടുത്തത്)
4. മഞ്ഞൾപ്പൊടി - 1/2 ടീസ്പൂൺ
5. കായം - ഒരു നുള്ള്
6. കടുക് - ഒരു ടീസ്പൂൺ
7. ഉണങ്ങിയ ചുവന്ന മുളക് - ഒരെണ്ണം
8. കറിവേപ്പില - ആവശ്യത്തിന് (അരിഞ്ഞത്)
9. മല്ലിയില - ആവശ്യത്തിന് (അരിഞ്ഞത്)
10. വെള്ളം - 1.5 - 2 കപ്പ്
11. ഉപ്പ് - ആവശ്യത്തിന്

തയ്യാറാക്കുന്ന വിധം

ആദ്യം കുരുമുളക്, ജീരകം, 2-3 വെളുത്തുള്ളി അല്ലി, രണ്ട് ഉണങ്ങിയ ചുവന്ന മുളക് എന്നിവ മിക്സിയിലോ കല്ലില്ലോ ഇട്ട് തരിതരിപ്പായി പൊടിച്ചെടുക്കുക. ശേഷം ഒരു പാത്രത്തിൽ എണ്ണ ചൂടാക്കി കടുക് പൊട്ടിക്കുക. അതിലേക്ക് കറിവേപ്പില, ഒരു ഉണക്ക ചുവന്ന മുളക്, തൊലിയോടുകൂടിയോ അല്ലാതെയോ ചതച്ചുവച്ച 8-10 വെളുത്തുള്ളി എന്നിവ ചേർക്കുക. വെളുത്തുള്ളി ഗോൾഡൻ ബ്രൗൺ നിറമാകുന്നതുവരെ വഴറ്റുക.

ഇതിലേക്ക് അരിഞ്ഞ വച്ച ചെറിയ തക്കാളി ചേർക്കുക. ഒപ്പം മഞ്ഞൾപ്പൊടിയും കായവും ചേർത്ത് തക്കാളി നന്നായി വഴറ്റുക. ഇനി നേരത്തെ തയ്യാറാക്കി വച്ചിരിക്കുന്ന രസം മസാലപ്പൊടി ചേർത്ത് കുറഞ്ഞ തീയിൽ രണ്ട് മിനിറ്റ് വഴറ്റണം. അതിനുശേഷം പിഴിഞ്ഞുവച്ച പുളിവെള്ളവും 1.5 മുതൽ രണ്ട് കപ്പ് വെള്ളവും ആവശ്യത്തിന് ഉപ്പും ചേർക്കാം. ഇടത്തരം തീയിൽ രസം അഞ്ച് മുതൽ ആറ് മിനിറ്റ് വരെ തിളപ്പിക്കുക. നന്നായി തിളച്ചശേഷം ഓഫ് ചെയ്ത് അരിഞ്ഞ മല്ലിയില ചേർത്ത് അടച്ചുവയ്ക്കുക. ചൂടോടെ കുടിക്കാം.