കേരളം കാണാൻ ഇതിലും നല്ലൊരു സമയം വേറെയില്ല: കാത്തിരിക്കുന്നത് പ്രകൃതിയുടെ വിസ്മയക്കാഴ്ചകൾ

കേരളത്തിന്റെ ഭൂപ്രകൃതി ആസ്വദിക്കാൻ ആഗ്രഹിക്കുന്നവർക്ക് അനുയോജ്യമായ സമയമാണ് ഒക്ടോബർ. കാലവർഷം പതുക്കെ വിടപറയുന്നതോടെ പച്ചപ്പണിഞ്ഞ മലനിരകളും നിറഞ്ഞൊഴുകുന്ന വെള്ളച്ചാട്ടങ്ങളും മനോഹരമായ കായലുകളും സഞ്ചാരികളെ വരവേൽക്കാൻ ഒരുങ്ങിയിരിക്കുന്നത്. മനോഹരമായ കാലാവസ്ഥയും പ്രകൃതിഭംഗിയുമാണ് ഒക്ടോബർ മാസത്തെ കേരളം ചുറ്റിക്കറങ്ങാൻ ഏറ്റവും മികച്ച സമയമാക്കുന്നത്. കഠിനമായ ചൂടോ കനത്ത മഴയോ ഇല്ലാത്ത ഈ സമയം യാത്രകൾക്ക് അനുകൂലമാണ്.

പ്രകൃതിഭംഗി ആസ്വദിക്കാം

മഴക്കാലത്തിനുശേഷം കേരളത്തിന്റെ പ്രകൃതിഭംഗി ഇരട്ടിയാക്കുന്നു. മൂന്നാറിലെ തേയിലത്തോട്ടങ്ങളും വയനാട്ടിലെ വനമേഖലകളും ആലപ്പുഴയിലെ ഗ്രാമീണ കാഴ്ചകളും പച്ചപ്പിൽ കുളിച്ചുനിൽക്കും. പ്രകൃതിസ്നേഹികൾക്ക് ഈ കാഴ്ചകൾ മികച്ച അനുഭവമാകും സമ്മാനിക്കുക.

മഴക്കാലത്തെ അപേക്ഷിച്ച് ഒക്ടോബറിലെ കാലാവസ്ഥ യാത്രകൾക്ക് കൂടുതൽ അനുകൂലമാണ്. നഗരങ്ങൾ, ചരിത്രസ്മാരകങ്ങൾ, കടൽത്തീരങ്ങൾ, മലനിരകൾ എന്നിവ സന്ദശിക്കാൻ ഈ കാലാവസ്ഥ സഹായിക്കുന്നു. കുടുംബത്തോടൊപ്പമുള്ള യാത്രകൾക്ക് അനുയോജ്യമായ സമയമാണിത്. എന്നാൽ ചില പ്രദേശങ്ങളിൽ മഴ തുടരാൻ സാദ്ധ്യതയുള്ളതിനാൽ യാത്രയ്ക്ക് മുൻപ് കാലാവസ്ഥാ മുന്നറിയിപ്പുകൾ കൃത്യമായി പരിശോധിക്കണം.

കായൽയാത്രകൾ

മഴയ്ക്കുശേഷം വെള്ളം നിറഞ്ഞുകിടക്കുന്ന കായലുകളും പച്ചപ്പാർന്ന തീരങ്ങളും കേരളത്തിലെ ഹൗസ്‌ബോട്ട് യാത്രകളെ കൂടുതൽ ആകർഷകമാക്കുന്നു. ആലപ്പുഴ, കുമരകം, കൊല്ലത്തെ അഷ്ടമുടിക്കായൽ എന്നിവിടങ്ങളിലെ കായൽക്കാഴ്ചകളും ഗ്രാമീണ ജീവിതവും ആവോളം ആസ്വദിക്കാം.

തിരക്കൊഴിഞ്ഞ വിനോദയാത്ര

ഡിസംബർ, ജനുവരി മാസങ്ങളിൽ പല വിനോദസഞ്ചാര കേന്ദ്രങ്ങളിലും സഞ്ചാരികളുടെ വലിയ തിരക്കായിരിക്കും. അതിനാൽ തൊട്ടുമുൻപത്തെ മാസമായ ഒക്ടോബറിൽ താരതമ്യേന ശാന്തമായ അന്തരീക്ഷത്തിൽ യാത്ര ചെയ്യാൻ സാധിക്കും. ഹോട്ടലുകളിലും പ്രധാന വിനോദസഞ്ചാര കേന്ദ്രങ്ങളിലും തിരക്ക് കുറവായതിനാൽ യാത്ര സുഖകരമായിരിക്കും.

സാഹസിക യാത്രകൾ

പശ്ചിമഘട്ടത്തിലെ ട്രെക്കിംഗ്, വന്യജീവി സങ്കേതങ്ങളിലെ സന്ദർശനം തുടങ്ങിയവയ്ക്കും ഈ മാസം മികച്ചതാണ്. എന്നാൽ കനത്ത മഴയോ മണ്ണിടിച്ചിൽ ഭീഷണിയോ ഉള്ള പ്രദേശങ്ങളിൽ അധികൃതരുടെ നിർദേശങ്ങൾ പാലിക്കണം.