എവറസ്റ്റിന്റെ ചോട്ടിലെത്തി കേരള പൊലീസിലെ പെൺകരുത്ത്, വനിതാ കോൺസ്റ്റബിളിന്റെ അടുത്ത ലക്ഷ്യം എവറസ്റ്റ്​ കൊടുമുടി

കേരള സായുധ വനിതാ പൊലീസ്​ ബറ്റാലിയനിലെ പൊലീസ്​ കോൺസ്റ്റബിളായിരുന്ന അനു ടി. സാബു എവറസ്റ്റ്​ ബേസ്​ ക്യാമ്പിൽ നിന്ന്​ മടങ്ങിയെത്തിയിട്ട് ദിവസങ്ങൾ കഴിഞ്ഞിരിക്കുന്നു. ദിവസവും അനുവിന്റെ വാക്കുകളിൽ ഹിമാലയത്തിന്റെ തണുപ്പും ഉറയാത്ത ഓർമകളും നിറഞ്ഞുനിൽക്കാറുണ്ട്. ഇതിനിടെ ഓക്‌സിജൻ കുറഞ്ഞ വായുവും അലച്ചിലും മൂലമുള്ള യാത്രാക്ഷീണം ആരോഗ്യത്തെ ബാധിച്ചു. ആശുപത്രിയിൽ ചികിത്സ തേടേണ്ടിയുംവന്നു. ഒരുമാസത്തോളം നീണ്ട ചുമയും തൊണ്ടയിലെ അസ്വസ്ഥതയും ആ യാത്ര എത്ര കഠിനമായിരുന്നെന്ന്​ ഞങ്ങൾ സഹ പ്രവർത്തകരെ ഓർമിപ്പിച്ചുകൊണ്ടേയിരുന്നു.

ചില യാത്രകൾ അങ്ങനെയാണ്​. ശരീരത്തെ തളർത്തും, പക്ഷേ മനസിനെ കൂടുതൽ ഉറപ്പുള്ളതാക്കും. പുലരിയുടെ ആദ്യപ്രകാശം മഹാ പർവതത്തിന്റെ വെള്ളിമുടിയിൽ​ പതിയുമ്പോൾ​, ആകാശം ഭൂമിയോടു മിണ്ടാതൊരു പ്രാർത്ഥന ചൊല്ലുന്നതു പോലെ തോന്നും. മ‌ഞ്ഞുപാളികളിൽ തട്ടി മടങ്ങുന്ന സൂര്യകിരണങ്ങൾ പ്രകൃതിയുടെ ഏറ്റവും വിശുദ്ധമായ ദീപാരാധനയാണത്രെ. അനേകായിരം വർഷങ്ങളായി ഭൂമിയുടെ നെറുകയായി നിൽക്കുന്ന ആ മഹാപർവ്വത നിരയ്ക്ക് മനുഷ്യന്റെ ഭാഷ അറിയില്ല.

അതിജീവനത്തിന്റെ ഭാഷ നന്നായറിയും. ബേസ്​ ക്യാമ്പിൽ നിന്ന്​ കൊണ്ട്​ ഹിമാലയത്തെ നോക്കുമ്പോൾ ഇങ്ങനെ തോന്നുമത്രേ! അനു, എവറസ്റ്റ്​ ബേസ്​ ക്യാമ്പിലെത്തിയപ്പോൾ ഒരു ലക്ഷ്യം പൂർത്തിയാക്കിയതല്ല. മറിച്ച്​, മറ്റൊരു വലിയ സ്വപ്നത്തിലേയ്ക്കുള്ള ആദ്യ ചുവടുവയ്പ്പു നടത്തുകയായിരുന്നു. എവറസ്റ്റിന്റെ നെറുകയിൽ ഒരുനാൾ, ദേശീയ പതാകയ്‌ക്കൊപ്പം, പൊലീസിന്റെ പെൺകരുത്ത്​ ലോകത്തിലെ ഏറ്റവും ഉയർന്ന കൊടുമുടിയിൽ അടയാളപ്പെടുത്തുകയെന്ന സ്വപ്നത്തിലേയ്ക്കുള്ള യാത്രയ്ക്കാണ് ഇനി മനസൊരുങ്ങുന്നത്.

ചിലർ അങ്ങനെയാണ്​. പൗലോ കൊയ്‌ലോയുടെ ആൽക്കമിസ്റ്റ് വായിക്കാതെയും ജീവിതം കൊണ്ട്​ ആൽക്കെമിസ്റ്റുകളാകുന്നവർ. അവർ സാധാരണ ദിവസങ്ങളെ അസാധാരണ യാത്രകളാക്കി മാറ്റുന്നു. വർഷങ്ങൾക്കുമുമ്പ്​ ടെലിവിഷനിൽ കണ്ട സഞ്ചാരം പരിപാടിയാണ്​ യാത്രകളോട് ആദ്യം കൗതുകം ജനിപ്പിച്ചത്​. പിന്നീട്​ യാത്രാവിവരണങ്ങൾ വായിക്കുന്നത്​ അനുവിന് ശീലമായി. ഒരോ പുസ്കതകവും പുതിയ ദേശങ്ങളെ പരിചയപ്പെടുത്തി. ഒരോ യാത്രാകുറിപ്പും ലോകം ഇതുവരെ കണ്ടിട്ടില്ലാത്ത ഒരാളുടെ കണ്ണിലൂടെ കാണാൻ പഠിപ്പിച്ചു. അപ്പോഴൊന്നും ഹിമാലയം ഒരു ലക്ഷ്യമായിരുന്നില്ല.

പൊലീസ്​ ഉദ്യോഗത്തിലെ തിരക്കും ഉത്തരവാദിത്തങ്ങളും ഒരിക്കലും പിന്തിരിപ്പിച്ചില്ല. പല കടമ്പകളും കടക്കേണ്ടി വന്നു. യാത്രയ്ക്ക്​ മുന്നോടിയായി തയ്യാറെടുപ്പുകൾ, പരിശീലനം, സാമ്പത്തിക ക്രമീകരണങ്ങൾ എന്നിവയ്‌ക്കൊപ്പം ഔദ്യോഗിക നടപടിക്രമങ്ങളും പൂർത്തിയക്കേണ്ടതുണ്ട്​. ഡിപ്പാർട്ട്മെന്റിൽ നിന്നുള്ള അനുമതിയും അവധിയും ലഭിക്കുമോ എന്ന ആശങ്കയും ഒരു ഘട്ടത്തിൽ ഉണ്ടായിരുന്നു. എന്നാൽ മേലുദ്യോഗസ്ഥരുടെ പിന്തുണയും പ്രോത്സാഹനവും ആശങ്കകൾക്ക്​ വിരാമമിട്ടു. അവരുടെ പ്രോത്സാഹനമാണ്​ യാത്ര ആത്മവിശ്വാസത്തോടെ തുടരാൻ കരുത്തായത്​. ജോലി, കുടുംബം, പരിശീലനം, യാത്ര ഇവയെല്ലാം ഒരുമിച്ച്​ മുന്നോട്ടുകൊണ്ടുപോകാൻ അത്​ നിർണായകമായി.

പ്രചോദനം പർവതാരോഹകൻ

ബേസ്​ ക്യാമ്പ്​ സ്വപ്നത്തിന്​ പ്രചോദനമായത്​ പ്രമുഖ മലയാളി പർവതാരോഹകൻ ഷെയ്ഖ്​ ഹസൻ ഖാനെ പരിചയപ്പെട്ടതാണ്​. ലോകത്തിന്റെ വിവിധ ഭാഗങ്ങളിലെ ഉയരങ്ങൾ കീഴടക്കിയ അദ്ദേഹത്തിന്റെ അനുഭവങ്ങൾ ആത്മവിശ്വാസം നൽകി. പരിശീലനം, തയ്യാറെടുപ്പ്​ എന്നിവ മനസിലാക്കി. സെക്രട്ടേറിയറ്റിലെ ധനകാര്യ വകുപ്പിൽ അസി.സെക്ഷൻ ഓഫീസറായി സേവനമനുഷ്ടിക്കുന്ന അദ്ദേഹം, ലോകത്തിലെ ഏഴ്​ ഭൂഖണ്ഡങ്ങളിലേയും ഏറ്റവും ഉയരം കൂടിയ കൊടുമുടികളിൽ ഇന്ത്യൻ ദേശീയ പതാക ഉയർത്തുകയെന്ന മഹത്തായ ലക്ഷ്യത്തോടെ 'ഹർ ദേശ്​ തിരംഗ'' എന്ന ദൗത്യത്തിന്​ നേതൃത്വം നൽകുകയാണ്​. അദ്ദേഹഹമേകിയ ആത്മവിശ്വാസം കരുത്താക്കി,​ ലക്ഷ്യസ്ഥാനത്തേക്ക് എത്തിയതെന്ന് അനു പറയുന്നു.

കഠിനയാത്രയുടെ തുടക്കം

നേപ്പാൾ തലസ്ഥാനമായ കാ‌ഠ്മണ്ഡുവിൽ നിന്ന്​ 138 കിലോമീറ്റർ ആകലെയുള്ള ലുക്ല എന്ന ചെറു വിമാനത്താവളത്തിൽ നിന്നാണ്​ യാത്ര ആരംഭിച്ചത്. ഭൂമിയിലെ ഏറ്റവും അപകടകരമായ വിമാനത്താവളങ്ങളിലൊന്നായി അറിയപ്പെടുന്ന ലുക്ലയിൽ വിമാനം ഇറങ്ങുമ്പോൾ യാത്രക്കാരൻ പ്രകൃതിയുടെ നിയമങ്ങൾക്ക്​ കീഴടങ്ങുകയാണ്.​ അതിനുശേഷം ദിവസങ്ങളോളം നീളുന്ന കാൽനട യാത്ര. ''താഴെ ഉരുകിയ മഞ്ഞിന്റെ ഗർജനം. മുകളിൽ നിശബ്ദമായി തൂങ്ങി നിൽക്കുന്ന ഹിമാനികൾ. വശത്ത് വലിയ കൊക്ക. ആകാശത്തെ തൊടുന്ന പാറ മതിലുകൾക്ക് ഇടയിൽ ഒരാൾക്ക്​ മാത്രം നടക്കാവുന്ന മലമ്പാത. ഒരോ ചുവടും സൂക്ഷിച്ച്​ വയ്‌ക്കണം.

ഉയരം കൂടുന്തോറും ശരീരത്തിനു ലഭിക്കേണ്ട ഓക്സിജൻ കുറയുന്നു. സാധാരണ സ്ഥലത്ത്​ അറിയാത്ത ഹൃദയമിടിപ്പ്​ പോലും ഇവിടെ ചെവികളിൽ മുഴങ്ങും. അത്​ ചിലപ്പോൾ മരണം മുന്നിലുണ്ടെന്ന സൈറൺ പോലെ. പത്ത്​ ചുവടുകൾ നടക്കാൻ പത്ത്​ ശ്വാസങ്ങൾ വേണം. നിൽക്കുമ്പോൾ ശരീരം വിശ്രമം ചോദിക്കും നടക്കുമ്പോൾ മനസ്​ തിരികെ പോകാം എന്ന്​ പറയും. അപ്പോഴാണ്​ യഥാർത്ഥ യാത്ര തുടങ്ങുന്നത്​, ശരീരത്തിന്റെയല്ല മനസിന്റെ യാത്ര.

പകൽ സൂര്യൻ തെളിഞ്ഞുനിൽക്കുമ്പോളും തണുപ്പ്​ അസ്ഥികളെ കുത്തിനോവിക്കും. വൈകിട്ടോടെ കാറ്റിന്റെ സ്വരം മാറി. മഞ്ഞുപൊടികൾ പാറിച്ചു. ഒരു നിമിഷം മുമ്പ്​ തെളിഞ്ഞുനിന്ന മലനിരകൾ അടുത്ത നിമിഷം മേഘങ്ങളുടെ മറവിൽ അപ്രത്യക്ഷമായി. പ്രകൃതി അവിടെ ഒരോ നിമിഷവും പറയുന്നത്​ ഒരേയൊരു സത്യം'' അനു വിവരിക്കുമ്പോൾ ഞങ്ങളുടെ മുന്നിൽ കാഴ്ചകൾ മിന്നി മാഞ്ഞു.

കമ്പ്യൂട്ടർ എൻജിനിയറിംഗ് ബിരുദ ധാരിയാണ്​ അനു. മകളും ഭർത്താവും അടങ്ങുന്ന കുടുംബം. സർവീസിൽ ഇരിക്കെ അച്ഛൻ മരണപ്പെട്ടതും അനിയത്തിയുടെ അകാല മരണവും നീറ്റലാണ്. കഠിനമായ ജീവിതാനുഭവങ്ങളുടെ കരുത്തിലാണ് ഏത് പ്രതിസന്ധിയെയും ധൈര്യത്തോടെ നേരിടാനിറങ്ങിയത്. ഇനി അനുവിന്റെ ലക്ഷ്യം എവറസ്റ്റ്​ കൊടുമുടിയാണ്​.

അതിനുമുമ്പ്​ ദേശീയ​ അന്തർദേശീയ നിലവാരത്തിലുള്ള മൗണ്ടനിയറിംഗ്​ പരിശീലനവും പ്രത്യേക കോഴ്സുകളും പൂർത്തിയാക്കണം. അതിന്​ വലിയ സാമ്പത്തിക ചെലവും ആവശ്യമാണ്​. പക്ഷേ സ്വപ്നങ്ങൾ പലപ്പോഴും പണത്തിന്റെ കണക്കുകൂട്ടലുകളെക്കാൾ വലുതാണ്​. സംസാരത്തിനിടെ അനു ഒരു കാര്യം പറഞ്ഞു. ''എന്റെ മകൾ ജീവിതത്തിൽ എന്ത്​ തിരഞ്ഞെടുത്താലും അത്​ ധൈര്യത്തോടെ ചെയ്യണം. ഭയന്ന്​ ഒരു സ്വപ്നവും ഉപേക്ഷിക്കരുത്'' ആ വാക്കുകളാകാം ഈ യാത്രയുടെ യഥാർത്ഥ അർത്ഥം.

ബേസ്​ ക്യാമ്പിൽ എത്തിയത്​ ഒരു വ്യക്തിയുടെ നേട്ടമായി മാത്രം കണേണ്ടതില്ല. ഒരു സാധാരണ കുടുംബത്തിൽ വളർന്ന, ദിവസവും യൂണിഫോം ധരിച്ച്​ ജോലിക്ക്​ പോകുന്ന ഒരു വനിതാ പൊലീസ്​ കോൺസ്റ്റബിളും വലിയ സ്വപ്നങ്ങൾ കാണാമെന്നും, അവയ്ക്കുവേണ്ടി അദ്ധ്വാനിക്കാമെന്നും ഓർമ്മപ്പെടുത്തുന്നു. ആംഡ് ബെറ്റാലിയനിൽ നിന്ന് അനു ഇപ്പോൾ തൃശൂർ മണ്ണുത്തി പൊലീസ് സ്റ്റേഷനിലേയ്ക്ക് സ്ഥലം മാറിയെങ്കിലും സ്വപ്നം മാത്രം മാറിയിട്ടില്ല!

(കേരള സായുധ വനിതാ പൊലീസ് ബറ്റാലിയനിൽ സബ് ഇൻസ്പെക്ടറാണ് ലേഖകനായ വിവേക്​ വിജയൻ)​