അവണൂർ എൽ.പി സ്കൂളിന് പുത്തൻ കെട്ടിടമൊരുങ്ങുന്നു

കൊട്ടാരക്കര: അവണൂർ ഗവ.എൽ.പി സ്കൂളിന്റെ പുതിയ കെട്ടിടം നിർമ്മാണം തുടങ്ങി. ഫെബ്രുവരിയിൽ നിർമ്മാണ ഉദ്ഘാടനം നടത്തിയിരുന്നുവെങ്കിലും ഇപ്പോഴാണ് ജോലികൾ ആരംഭിച്ചത്. കെ.എൻ.ബാലഗോപാൽ മന്ത്രിയായിരിക്കെ അനുവദിച്ച 1.30 കോടി രൂപ ഉപയോഗിച്ചാണ് മതിയായ സൗകര്യങ്ങളോടെ സ്കൂളിന് കെട്ടിടം നിർമ്മിക്കുന്നത്. കൊട്ടാരക്കര- പുത്തൂർ റോഡരികിലാണ് അവണൂർ ജംഗ്ഷന് സമീപത്തായി സ്കൂൾ പ്രവർത്തിക്കുന്നത്. റോഡിനോട് ചേർന്നുണ്ടായിരുന്ന പഴയ കെട്ടിടം പൊളിച്ച് നീക്കി. പിൻഭാഗത്തെ കെട്ടിടങ്ങളിലാണ് ഇപ്പോൾ സ്കൂളിന്റെ പ്രവർത്തനം. സ്ഥല പരിമിതി ബുദ്ധിമുട്ടുണ്ടാക്കുന്നുവെങ്കിലും പുതിയ കെട്ടിടത്തിന്റെ നിർമ്മാണം തുടങ്ങിയതിന്റെ ആശ്വാസത്തിലാണ് സ്കൂൾ അധികൃതർ.

 തലമുറകൾക്ക് അക്ഷരം മധുരം വിളമ്പിയ വിദ്യാലയം

• 1930ൽ ആണ് അവണൂരിൽ എൽ.പി സ്കൂൾ പ്രവർത്തനം തുടങ്ങിയത്.
• അവണൂർ, മുസ്ളീം സ്ട്രീറ്റ്, വല്ലം, പത്തടി പ്രദേശങ്ങളിൽ നിന്നടക്കം വലിയ തോതിൽ കുട്ടികളുണ്ടായിരുന്നു. റോഡരികിലുള്ള വിദ്യാലയമായതിനാൽ അദ്ധ്യാപകർക്കും വന്നുപോകാൻ ബുദ്ധിമുട്ടുകളില്ല.
• ഇപ്പോൾ കൊട്ടാരക്കര നഗരസഭയുടെ പരിധിയിലാണ് സ്കൂൾ പ്രവർത്തിക്കുന്നത്.
• റോഡിന്റെ മറുവശം നെടുവത്തൂർ ഗ്രാമപഞ്ചായത്താണ്.
• ഇരു പഞ്ചായത്തുകളിലുമുള്ളവർക്ക് പ്രാഥമിക വിദ്യാഭ്യാസം നേടാൻ ഉപകരിച്ചിരുന്ന, തലമുറകൾക്ക് അക്ഷര മധുരം വിളമ്പിയ വിദ്യാലയമാണ്.
• സ്വകാര്യ സ്കൂളുകളുടെ കടന്നുവരവോടെ ഇവിടെ കുട്ടികൾ കുറഞ്ഞു.
• മെച്ചപ്പെട്ട സ്കൂൾ കെട്ടിടത്തിന്റെ കുറവും മറ്റും സാരമായി ബാധിച്ചു.
• പ്രീ പ്രൈമറി വിഭാഗം തുടങ്ങിയതോടെ കുട്ടികളുടെ വരവ് കൂടിയിട്ടുണ്ട്. ഇനി പുതിയ കെട്ടിടവും കളിക്കോപ്പുകളും അനുബന്ധ സൗകര്യങ്ങളുമെത്തുമ്പോൾ വിദ്യാലയം കൂടുതൽ ആകർഷിക്കപ്പെടും.കുട്ടികളും കൂടുമെന്നാണ് പ്രതീക്ഷ.