പച്ചക്കറിക്ക് പൊള്ളും വില

പാലക്കാട്: സംസ്ഥാനത്ത് പച്ചക്കറി വില കുതിച്ചുയരുന്നു. മറ്റ് സംസ്ഥാനങ്ങളിലെ കനത്ത മഴയും വെള്ളപ്പൊക്കവും കാരണം വിളവെടുപ്പ് കുറഞ്ഞതും പ്രതിദിനം കേരളത്തിലേക്കുള്ള പച്ചക്കറി വരവ് ഗണ്യമായി കുറഞ്ഞതുമാണ് വിലവർദ്ധനയ്ക്ക് കാരണം. ബീൻസ്, പയർ, ചെറിയ ഉള്ളി എന്നിവയുടെ വില കിലോയ്ക്ക് 100 രൂപ കടന്നു. രണ്ടാഴ്ചയ്ക്കിടെ പല പച്ചക്കറികളുടെയും വിലയിൽ കാര്യമായ വർദ്ധനയുണ്ടായതായി വ്യാപാരികൾ പറയുന്നു. ബീൻസിന് കിലോയ്ക്ക് 120 രൂപയും പയറിന് 140 രൂപയുമാണ് നിലവിലെ വില. ചെറിയ ഉള്ളിയുടെ വിലയും 100 രൂപയിലെത്തി. ബീൻസിന് 30 രൂപയും പയറിന് 40 രൂപയും ചെറിയ ഉള്ളിക്ക് 40 രൂപയും വർദ്ധിച്ചു. വെളുത്തുള്ളി കിലോയ്ക്ക് 220 രൂപയാണ് വിപണി വില. ഉത്സവകാലമല്ലാത്ത സമയത്തും പച്ചക്കറി വില കുത്തനെ ഉയരുന്നത് സാധാരണക്കാരുടെ കുടുംബ ബഡ്ജറ്റിനെ ബാധിക്കുന്നുണ്ട്. പച്ചക്കറികളുടെ വലുപ്പവും ഗുണനിലവാരവും അനുസരിച്ച് വിലയിൽ വ്യത്യാസമുണ്ടെങ്കിലും വിലക്കയറ്റത്തിന്റെ ഭാരം ഉപഭോക്താക്കൾ നേരിടുകയാണ്. വില ഇനിയും ഉയർന്നാൽ വിൽപ്പനയെ ബാധിക്കുമെന്ന ആശങ്കയിലാണ് വ്യാപാരികൾ. ഉയർന്ന വില കാരണം ഉപഭോക്താക്കൾ വാങ്ങുന്ന അളവ് കുറയ്ക്കാനുള്ള സാധ്യതയും കച്ചവടക്കാരെ ആശങ്കപ്പെടുത്തുന്നു. ലഭ്യത ഇനിയും കുറഞ്ഞാൽ വരും ദിവസങ്ങളിൽ വില വീണ്ടും ഉയരാൻ സാധ്യതയുണ്ടെന്നും അവർ മുന്നറിയിപ്പ് നൽകുന്നു. കേരളത്തിലെ വിപണിയിലെത്തുന്ന പച്ചക്കറികളിൽ വലിയൊരു പങ്കും അന്യ സംസ്ഥാനങ്ങളിൽ നിന്നുള്ളതാണ്. ഓണത്തിന് പിന്നാലെ പച്ചക്കറി വില കുത്തനെ ഉയർന്നിരുന്നു. പിന്നീട് നേരിയ കുറവുണ്ടായെങ്കിലും ചെറിയ ഇടവേളയ്ക്ക് ശേഷം വീണ്ടും വില ഉയരുന്ന സാഹചര്യമാണ് നിലവിലുള്ളത്.