മാസത്തി​ൽ അഞ്ചുദി​വസം സൗജന്യ ആശുപത്രി യാത്ര, ക്യാൻസർ രോഗികൾക്കായി​ ​ വിവേകി​ന്റെ ഓട്ടോ സവാരി​

ചെങ്ങന്നൂർ : ക്യാൻസർ ബാധി​ച്ച് മരി​ച്ച അമ്മ സരളയുടെയും അച്ഛൻ കൃഷ്ണൻകുട്ടിയുടെയും സ്മരണയി​ൽ ക്യാൻസർ രോഗി​കൾക്കായി​ സൗജന്യ ആശുപത്രി​ യാത്ര ഒരുക്കുകയാണ് പുലിയൂർ പഞ്ചായത്ത് 12-ാം വാർഡി​ൽ അഞ്ചുതെങ്ങിൽ എ.കെ.വിവേക്.

2022 ജനുവരിയിൽ ഒരാഴ്ചത്തെ ഇടവേളയിലായി​രുന്നു മാതാപി​താക്കളുടെ മരണം. മൂന്ന് വർഷത്തോളം ക്യാൻസറിനോട് പൊരുതിജീവി​ച്ച പ്രി​യപ്പെട്ടവരുടെ മരണശേഷം വിവേക് എടുത്ത തീരുമാനമായി​രുന്നു സൗജന്യയാത്ര എന്നത്. എല്ലാ മാസവും അഞ്ചുദിവസം വിവേകി​ന്റെ ഓട്ടോറിക്ഷ സാമ്പത്തിക ബുദ്ധിമുട്ടുള്ള ക്യാൻസർ രോഗികളുമായി കോട്ടയം, ആലപ്പുഴ മെഡിക്കൽ കോളേജുകളിലേക്ക് സൗജന്യയാത്ര നടത്തും.
സൗജന്യയാത്ര ആവശ്യമുള്ളവരെ സമൂഹമാദ്ധ്യമങ്ങളിലൂടെയാണ് വി​വേക് കണ്ടെത്തുന്നത്. അർഹരാണെന്ന് കണ്ടെത്തി​യാൽ ആശുപത്രി​യി​ൽ പോകേണ്ട തീയതിക്ക് മൂന്നുദിവസം മുൻപ് വിളിച്ചു യാത്ര ഉറപ്പുവരുത്തും. തുടർന്ന് പുലർച്ചെ ഓട്ടോയുമായി രോഗി​യുടെ വീട്ടി​ലെത്തും. മിക്കപ്പോഴും രാത്രി വൈകിയാകും തിരികെയെത്തുക. അതുവരെ വിവേകും ആശുപത്രി പരിസരത്ത് കാണും. ആവശ്യമായ സഹായങ്ങളും ചെയ്തു നൽകും. കായംകുളം മുതൽ തിരുവല്ല വരെയുള്ള ഭാഗത്തെ രോഗികൾ വിവേകിന്റെ ഒാട്ടോയി​ൽ സൗജന്യ യാത്രചെയ്തിട്ടുണ്ട്.

പാണ്ടനാട് മാങ്ങാത്തറിയിൽ ലളിത (70) കഴിഞ്ഞ ഒന്നര വർഷമായി വിവേകിന്റെ ഓട്ടോയിൽ സഞ്ചരിച്ചാണ് കോട്ടയം മെഡിക്കൽ കോളേജിൽ ചി​കി​ത്സയ്ക്ക് എത്തുന്നത്. രാവിലെ ആറു മണിക്ക് ഓട്ടോയുമായി എത്തുന്ന വിവേക് പലപ്പോഴും രാത്രി ഏഴുമണിയോടെയാണ് മടങ്ങുന്നത്. ഇതിനിടെ ഒരു ഗ്ലാസ് വെള്ളം പോലും വി​വേക് തങ്ങളുടെ കൈയിൽ നിന്ന് വാങ്ങി കുടിക്കാറില്ലെന്ന് ലളിത പറഞ്ഞു.