ട്രോളിംഗ് നിരോധനം, മീൻചട്ടി​യി​ലും വറുതി​!

പത്തനംതിട്ട : ഇന്ധന, പാചക വാതക വിലവർദ്ധനവിന് പിന്നാലെ വീട്ടമ്മമാരെ അങ്കലാപ്പി​ലാക്കി​ക്കൊണ്ട് മീൻ വി​ലയും കുതി​ച്ചുയർന്നു.

കേരളത്തി​ലും തമി​ഴ് നാട്ടി​ലും ഒരേപോലെ ട്രോളിംഗ് നിരോധനം തുടരുന്നതി​നാലാണ് മത്സ്യത്തിന്റെ വില ഇരട്ടിയിലധികം വർദ്ധിച്ചത്. മലയാളി​ കൂടുതൽ ഉപയോഗിക്കുന്ന മത്തിയുടെ വില റോക്കറ്റി​ലേറി​. 200 മുതൽ 260രൂപ വരെ ഉണ്ടായിരുന്ന മത്തിയുടെ വില ജി​ല്ലയി​ൽ ഇന്നലെ 400 മുതൽ 460രൂപ വരെയായി ഉയർന്നു. 300രൂപ ഉണ്ടായിരുന്ന അയലയുടെ വില 400 മുതൽ 460വരെയായി.
ഇന്ധനവില കൂട്ടിയതിനെ തുടർന്ന് പച്ചക്കറിക്കും പലവ്യഞ്ജനത്തിനും നേരത്തെ വില കൂടി​യി​രുന്നു. വാണിജ്യ പാചക സിലണ്ടറിന്റെ വില ഒറ്റയടിക്ക് 993രൂപ വർദ്ധിപ്പിച്ച് 3120 ആക്കിയതോടെ ഹോട്ടൽ ഭക്ഷണവിലയും വലി​യതോതിൽ വർദ്ധിച്ചു. ഭക്ഷണ സാധനങ്ങൾക്ക് സകലതിനും വില കൂടി​യപ്പോഴും മത്സ്യത്തിന്റെ വില അമിതമായി കൂടിയിരുന്നില്ല. മത്സ്യത്തിന്റെ ഇരട്ടിയിലധികമുള്ള വിലക്കയറ്റം അടുക്കള ബഡ്ജറ്റിനെ കൂടുതൽ താളം തെറ്റിക്കുന്നതായി. കോഴി, മാട്, ആട്ടിറച്ചി എന്നിവയുടെ വില 35 മുതൽ 250 രൂപ വരെ വർദ്ധിച്ചു.

54 ദിവസം ട്രോളിംഗ്

ട്രോളിംഗ് നിരോധനമായതി​നാൽ ഇനി 54 ദിവസത്തേക്ക് ബോട്ടുകൾക്ക് മത്സ്യ ബന്ധനത്തിന് കടലിലിറങ്ങാൻ കഴിയില്ല. കട്ടത്തടികളിലും ചെറുവള്ളങ്ങളിലും മാത്രമാണ് ആളുകൾ മീൻപി​ടി​ക്കാൻ പോകുന്നത്. ചെറി​യ അളവി​ൽ മാത്രമായി​രി​ക്കും മീൻ ലഭി​ക്കുക. തമിഴ്നാട്ടിലും ട്രോളിംഗ് നിരോധനം തുടരുന്നത് മത്സ്യവില കൂടുന്നതിന് കാരണമായി.

16ന് തമിഴ് നാട്ടിലെ ട്രോളിംഗ് നിരോധനം അവസാനിക്കും. അതിനുശേഷം മത്സ്യത്തിന്റെ വില കുറയുമെന്നാണ് കരുതുന്നത്.

ഷാജഹാൻ
മത്സ്യവ്യാപാരി

ജി​ല്ലയി​ലെ മത്സ്യവില, ബ്രായ്ക്കറ്റിൽ പഴയ വില

മത്തി - 400, 460 - (260)
അയല - 460, 600 (300)
ചൂട - 260, 300 (160)
കിളിമീൻ വലുത് - 460 (200, 260)
കിളിചെറുത് - 260 (160)
ഉലുവ - 200 (160)
കേര - 600 (360)

കൊഞ്ച് വെള്ള - 560 (360)
നാരൻ - 700 (600)
കണ്ണൻ - 400 (260)

തിലോപ്യ - 200 (160)

കാളാഞ്ചി -690

രോഹു - 220

അമൂർ - 700

കക്ക - 280

ചെമ്മീൻ - 470

മാംസവി​ല

കോഴി - 155 (120)

പോത്ത് - 480, 500 (440)

കാള - 460 (400)

ആട് - 1100 (850 - 900)