54 റൺസിന് ഓൾഔട്ട്; ഓസ്‌ട്രേലിയൻ പര്യടനത്തിന് മുന്നേ സന്നാഹ മത്സരത്തിൽ ബംഗ്ലാദേശിന് തിരിച്ചടി, രണ്ടക്കം കടന്നത് ഒരേയൊരു താരം

ഡാർവിൻ: ഓസ്‌ട്രേലിയക്കെതിരായ ടെസ്റ്റ് പരമ്പരയ്ക്ക് മുന്നോടിയായുള്ള ഏക സന്നാഹ മത്സരത്തിൽ ബംഗ്ലാദേശിന് വൻ തകർച്ച. കളി അവസാനിക്കുന്ന മൂന്നാം ദിവസം ഉച്ചഭക്ഷണത്തിന് പിരിയും മുൻപ് ഇന്നിംഗ്‌സിനും 38 റൺസിനുമാണ് ബംഗ്ലാദേശ് പരാജയപ്പെട്ടത്. രണ്ടാം ഇന്നിംഗ്‌‌സിൽ വെറും 54 റൺസിന് ബംഗ്ലാദേശ് ബാറ്റിംഗ് നിര തകർന്നടിയുകയായിരുന്നു.

യുവ പേസർ കാംബെൽ തോംസണിന്റെ തകർപ്പൻ ബൗളിംഗ് പ്രകടനമാണ് സന്ദർശകരെ തകർത്തത്. 11 ഓവറിൽ 25 റൺസ് വഴങ്ങി എട്ട് വിക്കറ്റുകളാണ് 22 കാരനായ തോംസൺ വീഴ്ത്തിയത്. കരിയറിലെ തന്റെ രണ്ടാമത്തെ ഫസ്റ്റ് ക്ലാസ് മത്സരമാണിത്. ബംഗ്ലാദേശ് നിരയിൽ ഓപ്പണർ തൻസിദ് ഹസൻ (22) മാത്രമാണ് രണ്ടക്കം കടന്ന ഒരേയൊരു താരം. ആദ്യം ബാറ്റ് ചെയ്ത ബംഗ്ലാദേശ് ആദ്യ ഇന്നിംഗ്സിൽ 263 റൺസ് നേടിയിരുന്നു. മറുപടി ബാറ്റിംഗിനിറങ്ങിയ ക്രിക്കറ്റ് ഓസീസ് ഇലവൻ 355 റൺസെടുത്തു.

പാറ്റ് കമ്മിൻസ്, മിച്ചൽ സ്റ്റാർക്ക്, ജോഷ് ഹേസൽവുഡ് തുടങ്ങിയ ലോകോത്തര പേസർമാരടങ്ങുന്ന ശക്തിയായ ഓസ്‌ട്രേലിയൻ ടീമിനെതിരെ അടുത്ത ആഴ്ച ഡാർവിനിൽ നടക്കുന്ന ടെസ്റ്റ് പരമ്പരയ്ക്ക് മുന്നേ ബംഗ്ലാദേശിനേറ്റ തോൽവി വലിയ തിരിച്ചടിയാകും.