ഇന്ത്യൻ ക്രിക്കറ്റിൽ ചരിത്രം ആവർത്തിക്കുന്നു; അന്ന് സെവാഗും ദ്രാവിഡും, ഇന്ന് ഇരുവരുടെയും മക്കൾ

ന്യൂഡൽഹി: ഇന്ത്യൻ ക്രിക്കറ്റിലെ ഇതിഹാസ താരങ്ങളായ വിരേന്ദർ സെവാഗിന്റെയും രാഹുൽ ദ്രാവിഡിന്റെയും മക്കളായ ആര്യവീർ സെവാഗും അൻവായ് ദ്രാവിഡും ഇന്ത്യയുടെ അണ്ടർ-19 ടീമിൽ ഇടം നേടി. ഓസ്ട്രേലിയയ്ക്കെതിരായ ഏകദിന പരമ്പരയ്ക്കുള്ള ഇന്ത്യയുടെ അണ്ടർ-19 ടീമിലാണ് ഇരുവരെയും ഉൾപ്പെടുത്തിയത്. ബിസിസിഐയുടെ സെലക്ഷൻ കമ്മിറ്റിയാണ് ടീമിനെ പ്രഖ്യാപിച്ചത്.

സെപ്തംബർ 18നാണ് ഇന്ത്യയും ഓസ്ട്രേലിയയും തമ്മിലുള്ള അണ്ടർ-19 പരമ്പര ആരംഭിക്കുന്നത്. മൂന്ന് ഏകദിന മത്സരങ്ങളും രണ്ട് മൾട്ടി-ഡേ മത്സരങ്ങളുമാണ് പരമ്പരയിലുള്ളത്. ഏകദിന ടീമിന്റെ നായകനായി ലക്ഷ്യ റായ്ചന്ദാനിയെയും വൈസ് ക്യാപ്റ്റനായി യശ്വർധൻ സിംഗ് ചൗഹാനെയും തിരഞ്ഞെടുത്തു.

പതിനെട്ടുകാരനായ ആര്യവീർ സെവാഗിന് ഇതാദ്യമായാണ് ഇന്ത്യയുടെ അണ്ടർ-19 ടീമിലേക്ക് വിളിയെത്തുന്നത്. നിലവിൽ ഡൽഹി പ്രീമിയർ ലീഗിൽ കളിക്കുന്ന ആര്യവീറിനെ ഓസ്ട്രേലിയക്കെതിരായ ഏകദിന ടീമിലാണ് ഉൾപ്പെടുത്തിയിരിക്കുന്നത്. മൾട്ടി-ഡേ മത്സരങ്ങൾക്കുള്ള ടീമിൽ ആര്യവീറിന് ഇടം ലഭിച്ചിട്ടില്ല.

അതേസമയം, മുൻ ഇന്ത്യൻ ക്യാപ്റ്റനും പരിശീലകനുമായ രാഹുൽ ദ്രാവിഡിന്റെ ഇളയ മകൻ അൻവായ് ദ്രാവിഡ് ഏകദിന ടീമിൽ സ്ഥാനം നിലനിർത്തുകയായിരുന്നു. കഴിഞ്ഞ മാസം ശ്രീലങ്കയിൽ പര്യടനം നടത്തിയ ഇന്ത്യയുടെ അണ്ടർ-19 ടീമിലും 17കാരനായ അൻവായ് അംഗമായിരുന്നു. വിക്കറ്റ് കീപ്പർ-ബാറ്ററായ അൻവായ് ശ്രീലങ്കയ്ക്കെതിരായ രണ്ട് യൂത്ത് ഏകദിനങ്ങളിൽ 14, 87 എന്നിങ്ങനെ റൺസ് നേടിയിരുന്നു.

ഇന്ത്യയും ഓസ്ട്രേലിയയും തമ്മിലുള്ള മൂന്ന് ഏകദിന മത്സരങ്ങളും ആദ്യ മൾട്ടി-ഡേ മത്സരവും രാജ്കോട്ടിലാണ് നടക്കുന്നത്. രണ്ടാം മൾട്ടിഡേ മത്സരം അഹമ്മദാബാദിലാണ് നടക്കുക.