ഇടതു വിരുദ്ധ വികാരം ശക്തം: ഐ.എൻ.എൽ

കോഴിക്കോട്: ആഞ്ഞടിച്ച ഇടതു വിരുദ്ധ വികാരം തിരഞ്ഞെടുപ്പ് തോൽവിക്ക് കാരണമായെന്ന് ഐ.എൻ.എൽ സംസ്ഥാന കമ്മിറ്റിയുടെ വിലയിരുത്തൽ. ലോക്സഭ, തദ്ദേശ തിരഞ്ഞെടുപ്പിലുണ്ടായ തിരിച്ചടിയുടെ കാരണം കണ്ടെത്താനോ തിരുത്തി ജനപിന്തുണ വീണ്ടെടുക്കാനോ കഴിഞ്ഞില്ല. ഭരണവിരുദ്ധ വികാരമുണ്ടായില്ല. ഇടത്, സോഷ്യലിസ്റ്റ് മൂല്യങ്ങളിൽ നിന്നുള്ള വ്യതിചലനം അണികളെ രോഷാകുലരാക്കി. നയപരവും സംഘടനാപരവുമായ പാളിച്ചകളും വീഴ്ചകളും തിരുത്താനും ഘടകകക്ഷികൾക്ക് വളരാനും അവസരമൊരുക്കിയില്ല.ജനകീയ പ്രശ്നങ്ങൾ അപ്പപ്പോൾ ചർച്ച ചെയ്ത് പ്രതിവിധി കണ്ടെത്തിയില്ലെന്നും വിലയിരുത്തലുണ്ടായി.

തിരഞ്ഞെടുപ്പിലുണ്ടായ കനത്ത ആഘാതം പരിഹരിക്കാൻ അണികളിലേക്കിറങ്ങി പ്രവർത്തിക്കുമെന്ന് യോഗത്തിന് ശേഷം ജനറൽ സെക്രട്ടറി കാസിം ഇരിക്കൂർ, പ്രസിഡന്റ് അഹമ്മദ് ദേവർകോവിൽ എന്നിവർ വാർത്താസമ്മേളനത്തിൽ പറഞ്ഞു. ഐ.എൻ.എൽ 33-ാം വാർഷികം അടുത്ത ഏപ്രിൽ വരെ വിവിധ പരിപാടികളോടെ ആഘോഷിക്കും. 31ന് എല്ലാ ജില്ലകളിലും കൺവെൻഷനുണ്ടാകും. പൂർവകാല നേതാക്കളെ അനുസ്മരിക്കുന്ന നേതൃസ്മരണ, ആദരിക്കൽ എന്നീ പരിപാടികളും നടത്തും.