ബയോടെക്നോളജിയിൽ ഉന്നത പഠനം

ബയോടെക്നോളജിയിലും അനുബന്ധ വിഷയങ്ങളിലും എം.എസ്‌സി, എം.ടെക്, എം.വി.എസ്‌സി കോഴ്സുകൾക്കും ഗവേഷണത്തിനും അപേക്ഷിക്കാം. കേന്ദ്ര ബയോടെക്നോളജി വകുപ്പിന്റെ സഹായത്തോടെ നടത്തുന്ന കോഴ്സുകൾ സ്റ്റൈപെൻഡോടെ പഠിക്കാം. പ്രവേശനത്തിനായുള്ള ഗ്രാജ്വേറ്റ് ആപ്റ്റിറ്റ്യൂഡ് ടെസ്റ്റ്- ബയോടെക്നോളജി (GAT-B)/ ബയോടെക്നോളജി എലിജിബിലിറ്റി ടെസ്റ്റ് (BET) എന്നിവയ്ക്ക് ഏപ്രിൽ 9 വരെ www.nta.ac.in വഴി അപേക്ഷിക്കാം.

1. ഗ്രാജ്വേറ്റ് ആപ്റ്റിറ്റ്യൂഡ് ടെസ്റ്റ്- ബയോടെക്നോളജി (GAT-B )

........................................

എം.എസ്‌സി ബയോടെക്നോളജി, എം.ടെക് ബയോടെക്നോളജി, എം.എസ്‌സി അഗ്രിക്കൾച്ചറൽ ബയോടെക്നോളജി, എം.വിഎസ്‌സി അനിമൽ ബയോടെക്നോളജി കോഴ്സുകളിലെ വിവിധ വിഷയങ്ങളിലേക്കും സ്പെഷ്യലൈസേഷനുകളിലേക്കുമുള്ള പ്രവേശനം GAT-B സ്കോർ അടിസ്ഥാനത്തിലാണ്.

ബന്ധപ്പെട്ട വിഷയത്തിൽ നേടിയ ബിരുദമാണ് അപേക്ഷിക്കാൻ വേണ്ട അടിസ്ഥാന യോഗ്യത. മേയ് 17നാണ് പരീക്ഷ. കേരളത്തിൽ തൃശൂരും തിരുവനന്തപുരവുമാണ് പരീക്ഷാ കേന്ദ്രങ്ങൾ.

* സ്ഥാപനങ്ങൾ

...................................

ജെ.എൻ.യു, അളഗപ്പ യൂണിവേഴ്സിറ്റി, ജാമിയ മിലിയ ഇസ്ലാമിയ, ഇൻഡോർ ഐ.ഐ.ടി, ഹൈദരാബാദ് യൂണിവേഴ്സിറ്റി, ഡൽഹി യൂണിവേഴ്സിറ്റി, പഞ്ചാബ് അഗ്രിക്കൾച്ചറൽ യൂണിവേഴ്സിറ്റി തുടങ്ങി രാജ്യത്തെ 79 സ്ഥാപനങ്ങളിലേക്കുള്ള പ്രവേശനം GAT-B സ്കോർ അടിസ്ഥാനത്തിലാണ്.

കേരളത്തിൽ കാർഷിക സർവകലാശാലയുടെ എം.എസ്‌സി (അഗ്രിക്കൾച്ചർ) മോളിക്കുലാർ ബയോളജി & ബയോടെക്നോളജി കോഴ്സ് (15 സീറ്റ്) പ്രവേശനം GAT-B സ്കോർ വഴിയാണ്. കൂടാതെ, കുസാറ്റ് നടത്തുന്ന എം.ടെക് മറൈൻ ബയോടെക്നോളജി കോഴ്സ് പ്രവേശനവും (20 സീറ്റ്) GAT- B അടിസ്ഥാനത്തിലാണ്. (അതത് സ്ഥാപനങ്ങളാണ് പ്രവേശനം നടത്തുന്നത്. അവർ പ്രവേശന വിജ്ഞാപനം പ്രസിദ്ധീകരിക്കുമ്പോൾ GAT- B സ്കോറുള്ളവർക്ക് രജിസ്ട്രേഷൻ നടത്താം.)

* സ്റ്റൈപെൻഡ്

................................

GAT-B സ്കോർ വഴി പ്രവേശനം നേടുന്നവർക്ക് പ്രതിമാസ സ്റ്രൈപെൻഡ് ലഭിക്കും. എം.എസ്‌സി ബയോടെക്നോളജി/ അനുബന്ധ വിഷയക്കാർക്ക് 5000 രൂപയും എം.എസ്‌സി അഗ്രിക്കൾച്ചറൽ ബയോടെക്നോളജി/ അനുബന്ധ വിഷയക്കാർക്ക് 7500 രൂപയും എം.ടെക്/ എം.വി.എസ്‌സി പ്രോഗാമുകൾക്ക് 12000 രൂപ വീതവും പ്രതിമാസ സ്റ്റൈപൻഡ് ലഭിക്കും.

2. ബയോടെക്നോളജി എലിജിബിലിറ്റി ടെസ്റ്റ് (BET)

............................................

ബയോടെക്നോളജി, ലൈഫ് സയൻസ് വിഷയങ്ങളിൽ ഗവേഷണത്തിനുള്ള ദേശീയ യോഗ്യതാ പരീക്ഷയാണ് BET. യോഗ്യത: 75 ശതമാനം മാർക്കോടെ ബയോടെക്നോളജി/ ലൈഫ് സയൻസ് അനുബന്ധ വിഷയങ്ങളിൽ നേടിയ 4 വർഷ ബിരുദം. അല്ലെങ്കിൽ 60 ശതമാനം മാർക്കോടെ നേടിയ ബി.ഇ/ ബി.ടെക്. അല്ലെങ്കിൽ 60 ശതമാനം മാർക്കോടെ ബയോടെക്നോളജി/ ലൈഫ് സയൻസ് അനുബന്ധ വിഷയങ്ങളിൽ നേടിയ മാസ്റ്റേഴ്സ്. ഉയർന്ന പ്രായം 28. സംവരണ വിഭാഗക്കാർക്ക് മാർക്കിലും പ്രായത്തിലും നിയമാനുസൃത ഇളവുണ്ട്. മേയ് 17നാണ് പരീക്ഷ. വിശദവിവരങ്ങൾ വെബ്സൈറ്റിൽ.