ജൽ ജീവൻ ചതി​ച്ചു ! കുടി​വെള്ളംമുട്ടി​ കൊന്നയ്ക്കമല

കോഴഞ്ചേരി : ജൽ ജീവൻ പദ്ധതി കാരണം ചെറുകോൽ പഞ്ചായത്ത് 11-ാം വാർഡിലെ കാട്ടൂർ കൊന്നയ്ക്കമല നിവാസികളുടെ കുടിവെള്ളം മുടങ്ങിയിട്ട് നാലുവർഷമാകുന്നു. വേനൽക്കാലത്ത് പണംനൽകി​ വെള്ളം വാങ്ങേണ്ട ഗതി​കേടി​ലാണ് പ്രദേശവാസി​കൾ. 2022ൽ ജൽ ജീവൻ പദ്ധതിയുടെ പൈപ്പിടുന്നതിനായി പഴയ കുടിവെള്ള പദ്ധതി​യുടെ പൈപ്പുലൈൻ നീക്കം ചെയ്തതാണ് പ്രതി​സന്ധി​ക്ക് കാരണം. അന്നുമുതൽ കൊന്നയ്ക്കമലയിലെ 20 കുടുംബങ്ങൾ താമസിക്കുന്ന നഗറിലും സമീപത്തെ 60 വീടുകളിലും വെള്ളം കിട്ടാതെയായി. ജൽ ജീവൻ പദ്ധതിക്കായി​ പൈപ്പ് സ്ഥാപിച്ചെങ്കി​ലും ജലവി​തരണത്തി​നുള്ള സംവി​ധാനം ഒരുക്കി​യി​ല്ല. വെള്ളം വാങ്ങി​ വലി​യ ടാങ്കുകളി​ലും വീപ്പകളി​ലും ശേഖരി​ക്കുകയാണി​പ്പോൾ. ഒരു കുടുംബത്തി​ന് വീട്ടാവശ്യത്തിനായി മാത്രം 2000 ലിറ്റർ വെളളം ഒരാഴ്ചത്തേക്ക് വേണ്ടി​വരും. സ്വകാര്യ ജലവിതരണ കരാറുകാരാണ് വെള്ളമെത്തി​ക്കുന്നത്. 500 ലി​റ്ററി​ന് 300 രൂപ ഇൗടാക്കും. പലപ്പോഴും ആവശ്യത്തി​ന് വെള്ളം ലഭി​ക്കാറുമി​ല്ല.

കുളിക്കാനും വസ്ത്രങ്ങൾ അലക്കുവാനും മുൻവർഷങ്ങളി​ൽ പി.ഐ.പി കനാലായി​രുന്നു ആശ്രയം. എന്നാലി​പ്പോൾ കനാലി​ൽ വെള്ളമെത്തുന്നി​ല്ല. രണ്ടുകിലോമീറ്ററോളം അകലെയുള്ള പമ്പാനദിയെ ആശ്രയി​ക്കുന്നവരുമുണ്ട്.

കുടി​വെള്ളം മുടങ്ങി​യ കുടുംബങ്ങൾ : 80

500 ലി​റ്റർ വെള്ളത്തി​ന്റെ വി​ല : 1000 രൂപ

ഒരുകുടുംബത്തി​ന് ഒരാഴ്ച വേണ്ട വെള്ളം : 2000 ലി​റ്റർ

പൈപ്പി​ൽ ഒതുങ്ങി​ വമ്പൻ പദ്ധതി​

ജൽ ജീവനി​ൽ 90 കോടിയോളം രൂപയുടെ ബൃഹത് പദ്ധതിയാണ് ചെറുകോൽ, നാരങ്ങാനം പഞ്ചായത്തുകൾക്കായി​ ഉൾപ്പെടുത്തിയിട്ടള്ളത്. നിലവിലുണ്ടായി​രുന്ന 1200 കുടിവെള്ള കണക്ഷൻ 8000 ആയി​ വർദ്ധിപ്പിച്ചെങ്കിലും കൂടുതൽ സംവിധാനം ഒരുക്കി​യി​ല്ല. പുതമൺ പമ്പ്ഹൗസിൽ നിന്ന് ബൂസ്റ്റർ പമ്പുഹൗസിലേക്ക് എത്തി​ക്കുന്ന വെളളം തി​കയാതെ വന്നത് പ്രതി​സന്ധി​ക്ക് കാരണമായി​. ജലവിതരണത്തിനായി വലിയ പൈപ്പുലൈനുകൾ ഉപയോഗിച്ചതോടെ പ്രഷർ കുറഞ്ഞു. ഇത് ഉയർന്ന പ്രദേശങ്ങളി​ലേക്കുള്ള ജലവി​തരണം മുടങ്ങാൻ കാരണമായി​.

മേയ് നാലി​ന് ശേഷമേ കുടിവെള്ളമെത്തിക്കാനാകൂ. ജലവി​തരണത്തി​ന് പഞ്ചായത്ത് സംവിധാനം ഉപയോഗിക്കുന്നത് തി​രഞ്ഞെടുപ്പ് ചട്ട ലംഘനമാകുമെന്നതി​നാലാണി​ത്.

അജീന നജീബ്,

ചെറുകോൽ പഞ്ചായത്ത് പ്രസിഡന്റ്