ഇരുപത്തിനാല് മണിക്കൂറിനിടെ രാജ്യത്ത് റിപ്പോർട്ട് ചെയ്തത് 42,982 കൊവിഡ് കേസുകൾ; ഇതുവരെ രോഗം സ്ഥിരീകരിച്ചത് 3.18 കോടി പേർക്ക്

ന്യൂഡൽഹി: രാജ്യത്തെ പ്രതിദിന കൊവിഡ് കേസുകൾ വീണ്ടും നാൽപതിനായിരത്തിന് മുകളിൽ. കഴിഞ്ഞ ഇരുപത്തിനാല് മണിക്കൂറിനിടെ 42,982 പേർക്കാണ് രോഗം സ്ഥിരീകരിച്ചതെന്ന് കേന്ദ്ര ആരോഗ്യമന്ത്രാലയം അറിയിച്ചു. ആകെ രോഗബാധിതരുടെ എണ്ണം 3,18,12,114 ആയി ഉയർന്നു.

നിലവിൽ 4,11,076 പേരാണ് ചികിത്സയിലുള്ളത്.ഇന്നലെ മാത്രം 533 പേരാണ് രാജ്യത്ത് കൊവിഡ് ബാധിച്ച് മരിച്ചത്. ആകെ മരണം 4,26,290 ആയി. ഇരുപത്തിനാല് മണിക്കൂറിനിടെ 41,726 പേർ രോഗമുക്തി നേടി. രോഗമുക്തരുടെ എണ്ണം 3,09,74,748 ആയി ഉയർന്നു.

ബുധനാഴ്ച 16,64,030 സാംപിളുകളാണ് പരിശോധിച്ചതെന്ന് ഇന്ത്യൻ കൗൺസിൽ ഒഫ് മെഡിക്കൽ റിസർച്ച് അറിയിച്ചു. 2.58 ശതമാനമാണ് രാജ്യത്തെ ടെസ്റ്റ് പോസിറ്റിവിറ്റി നിരക്ക്. ഇന്നലെയും പ്രതിദിന കേസുകൾ ഏറ്റവും കൂടുതൽ റിപ്പോർട്ട് ചെയ്തത് കേരളത്തിൽ നിന്നായിരുന്നു. സംസ്ഥാനത്ത് 22,414 പേർക്കാണ് കഴിഞ്ഞ ദിവസം രോഗം സ്ഥിരീകരിച്ചത്. 108 പേർ മരിച്ചു.