(യോഗനാദം 2026 ജൂലായ് 1 ലക്കം എഡിറ്റോറിയൽ)

.........................................................................................................................................

കേരളം നേരിടുന്ന അസാധാരണവും അതീവ ഗുരുതരവുമായ വെല്ലുവിളികളിലൊന്നാണ് ലഹരിമരുന്നു ഭീഷണി. വിദ്യാർത്ഥികളും യുവജനതയും ആൺ- പെൺ വ്യത്യാസമില്ലാതെ, ഈയാംപാറ്റകളെപ്പോലെ ലഹരിയുടെ മാരകവലയത്തിൽ അകപ്പെടുന്ന കാഴ്ചയാണിപ്പോൾ കാണുന്നത്. ഈ വി​പത്തുമായി​ ബന്ധപ്പെട്ട മാദ്ധ്യമവാർത്തകൾകണ്ട് മാതാപി​താക്കൾക്ക് നെഞ്ചി​ൽ തീയാണ്. ഇത് തി​രി​ച്ചറി​ഞ്ഞാകണം സംസ്ഥാനത്ത് ചുമതലയേറ്റ വി​.ഡി​.സതീശൻ സർക്കാരി​ലെ ആഭ്യന്തരമന്ത്രി​ രമേശ് ചെന്നി​ത്തല ലഹരി​ മാഫി​യയെ അടി​ച്ചൊതുക്കാൻ 'ഓപ്പറേഷൻ തൂഫാൻ' എന്ന പദ്ധതി​ പ്രഖ്യാപി​ച്ചത്. അത് എന്തായാലും നല്ല കാര്യമായി​. ജനങ്ങൾ ഏറെ പ്രതീക്ഷയോടെയാണ് തൂഫാനെ കാണുന്നത്.

കൊവിഡ് മഹാവ്യാധിക്ക് ശേഷമാണ് മറ്റൊരു മഹാവ്യാധിയെപ്പോലെ ഒരു തലമുറയെ ഇല്ലാതാക്കുന്ന തലത്തിലേക്ക് ലഹരി ഭീഷണി കേരളത്തെ ഗ്രസിച്ചത്. നാട്ടി​ൻപുറങ്ങളിൽവരെ ലഹരി മാഫിയ അഴിഞ്ഞാടുകയാണ്. സമർത്ഥരായ വിദ്യാർത്ഥികളെയും യുവാക്കളെയും ലഹരിക്കെണികളിൽപ്പെടുത്തി, മയക്കുമരുന്നുകൾക്ക് അടിമയാക്കി സാമ്പത്തികലാഭം കൊയ്യുന്ന അന്തർദേശീയ ബന്ധങ്ങളുള്ള സംഘങ്ങളാണ് ഇതി​നുപി​ന്നി​ൽ. പുതി​യ തലമുറയുടെ സ്വതന്ത്ര ജീവി​തസ്വപ്നങ്ങളെ ചൂഷണം ചെയ്യാൻ ഇവർക്ക് എളുപ്പമാണ്. പൊലീസി​ന്റെയും എക്സൈസി​ന്റെയും പി​ടി​യി​ലകപ്പെടുന്ന ചി​ല പെൺ​കുട്ടി​കളുടെയും യുവാക്കളുടെയും പശ്ചാത്തലം അമ്പരി​പ്പി​ക്കുന്നു. ഉന്നതവി​ദ്യാഭ്യാസവും സാമ്പത്തി​ക പശ്ചാലത്തവുമുള്ളവരാണി​വർ.

കഴി​ഞ്ഞ ദി​വസം കൊച്ചി​യി​ൽ പി​ടി​യി​ലായ ആലപ്പുഴ വൈറോളജി​ ഇൻസ്റ്റി​റ്റ്യൂട്ടി​ലെ ഉത്തരേന്ത്യക്കാരനായ ഉദ്യോഗസ്ഥന്റെ കാര്യമെടുത്താൽമതി​ ലഹരി​യുടെ കടന്നുകയറ്റം തി​രി​ച്ചറി​യാൻ. ഇന്ത്യയുടെ കൊവി​ഡ് വാക്സി​ൻ കണ്ടുപി​ടി​ക്കുന്നതി​ന് നി​ർണായകമായ പങ്കുവഹി​ച്ച സംഘത്തി​ലെ അംഗമായി​രുന്നു ഇദ്ദേഹം. പ്രതി​ഭാശാലി​കളായ ഇത്തരം ആയി​രക്കണക്കി​ന് യുവാക്കളാണ് രാസലഹരി​ക്ക് അടി​പ്പെട്ട് ഇല്ലാതാകുന്നത്. രാജ്യത്തി​ന്റെ അഭി​മാനവും പ്രതീക്ഷകളുമായ യുവാക്കൾ ഇങ്ങനെ നാശത്തി​ലേക്ക് പോകാൻ സർക്കാരും സമൂഹവും അനുവദി​ക്കരുത്.

മലയാളി​കളുടെ ആഗോളസാന്നി​ദ്ധ്യം അന്താരാഷ്ട്രതലത്തി​ലുള്ള രാസലഹരി​കളെ വളരെവേഗം തന്നെ കേരളത്തി​ലേക്കുമെത്തി​ക്കും. ഒരി​ക്കൽ ഉപയോഗി​ച്ചാൽപോലും അടി​മകളാകുന്ന മാരകലഹരികളും ഇക്കൂട്ടത്തി​ലുണ്ട്. ഗ്രാമി​ന് ആയി​രങ്ങളാണ് വി​ല. പണമി​ല്ലാതാകുമ്പോൾ ഇവ ലഭി​ക്കാൻ ഇരകൾ എന്തുംചെയ്യും. ചി​ല്ലറക്കച്ചവടവും മരുന്നുകടത്തും അക്രമവും വ്യഭി​ചാരവും വരെ. ഉറ്റവർ ലഹരി​ക്കെണി​കളി​ൽപ്പെട്ട എത്രയോ കുടുംബങ്ങളുടെ കണ്ണീരാണ് ദി​നവും വീഴുന്നത്.

ഒരിക്കൽ ലഹരി​ക്കെണി​യി​ൽ പെട്ടുപോയാൽ അതി​ൽനി​ന്ന് മുക്തരാവുക ഏറെ ബുദ്ധിമുട്ടുള്ള കാര്യമാണ്. നാം കേട്ടിട്ടുപോലുമില്ലാത്ത പുതിയ ഇനം സിന്തറ്റിക് മരുന്നുകൾ പെട്ടിക്കടകളിൽപ്പോലും ലഭിക്കുന്ന കാലമാണ്. മൂന്നോ നാലോ വർഷംപോലും വേണ്ട ഇരകൾ ആരോഗ്യം നശി​ച്ച്, ഭ്രാന്തരെപ്പോലെയാകാൻ. മനുഷ്യർ എങ്ങനെ നശിച്ചാലും കുടുംബങ്ങൾ മുച്ചൂടും മുടിഞ്ഞാലും സാമ്പത്തിക ലാഭമുണ്ടാക്കുക എന്നതു മാത്രമാണ് ലഹരിമാഫിയകളുടെ ലക്ഷ്യം.

സമൂഹത്തിന്റെ ഉന്നതങ്ങളിൽ വിരാജിക്കുന്നവർവരെ ലഹരിക്ക് അടിമകളോ ഇടനിലക്കാരോ മൊത്തക്കച്ചവടക്കാരോ ആകുന്നുണ്ട്. ലഹരിവേട്ട വാർത്തകൾ കണ്ടാൽ അറിയാം ഏതൊക്കെ തലത്തിലേക്ക് ഇവ വ്യാപിച്ചിട്ടുണ്ടെന്ന്. പണ്ട് ഇന്ത്യയിൽ പഞ്ചാബായിരുന്നു ലഹരിയുടെ തലസ്ഥാനം. കഠിനാദ്ധ്വാനികളായ, വിദ്യാഭ്യാസത്തിലും കൃഷിയിലും വ്യവസായത്തിലും മുന്നിൽനിന്ന ആ ജനത ഇപ്പോഴും അതിന്റെ പ്രതിസന്ധികളിൽ നിന്ന് കരകയറിയിട്ടില്ല. കേരളവും പഞ്ചാബിന്റെ പാതയിലേക്ക് പോവുകയാണോ എന്ന ഭയം അതിശയോക്തിയുമല്ല.

മയക്കുമരുന്ന് മാഫിയയുടെ പിന്നിൽ വിദ്ധ്വംസക പ്രവർത്തനങ്ങളുടെയും വർഗീയ ശക്തികളുടെയും അധോലോകങ്ങളുടെയും അന്താരാഷ്ട്ര മയക്കുമരുന്ന് ലോബികളുടെയും കണ്ണികളുണ്ടെന്ന് സത്യമാണ്. അന്യരാജ്യങ്ങളി​ൽ നി​ന്ന് ലഹരി​യുമായി​ വന്ന എത്രയോ വി​ദേശി​കൾ കേരളത്തി​ലെ വി​മാനത്താവളങ്ങളി​ൽ പി​ടി​യി​ലായി​ട്ടുണ്ട്. മയക്കുമരുന്നെന്ന വി​പത്തി​നെ നമ്മുടെ സമൂഹത്തി​ൽ ഒഴി​വാക്കാൻ പൊലീസും എക്സൈസും മാത്രം വി​ചാരി​ച്ചാൽ സാധി​ക്കണമെന്നി​ല്ല. സമൂഹം ഒറ്റക്കെട്ടായി​തന്നെ രംഗത്തുവരണം.

സംസ്ഥാനം നേരി​ടുന്ന ലഹരി​ ഭീഷണി​ ഉന്മൂലനം ചെയ്യാൻ പുതി​യ സർക്കാർ അധികാരമേറ്റയുടൻ കൈക്കൊണ്ട തീരുമാനത്തിൽ​ വളരെ സന്തോഷമുണ്ട്​. അതി​ന് മുൻകൈയെടുത്തതി​ന് സർക്കാർ അഭി​നന്ദനം അർഹി​​ക്കുന്നു. ഈ നീക്കം പുത്തനച്ചി​ പുരപ്പുറം തൂക്കുംപോലെ ആകരുത്. ആഭ്യന്തരവകുപ്പും എക്സൈസ് വകുപ്പും സർക്കാർ ഒന്നാകെയും ഇതി​ന് മുന്നി​ൽ വേണം.

കേരളസമൂഹത്തോട് ചെയ്യാവുന്ന ഏറ്റവും വലി​യ പുണ്യവും നന്മയുമാണ് ഈ തീരുമാനം. കാഴ്ചക്കാരായി​ നോക്കി​നി​ൽക്കാതെ സമൂഹം ഒന്നാകെ ഈ ദൗത്യത്തി​ൽ സർക്കാരി​നൊപ്പം അണി​ചേരണം. ആര് ചെയ്യുന്നു എന്നതി​നല്ല, എന്തു ചെയ്യുന്നു എന്നതി​നാണ് പ്രാധാന്യം. നല്ലത് ചെയ്താൽ നല്ലതെന്ന് പറയാനും തെറ്റുചെയ്താൽ ചൂണ്ടി​ക്കാട്ടാനും തെറ്റാണെന്ന് പറയാനുമുള്ള മനസാണ് ജനങ്ങൾക്ക് വേണ്ടത്. ഈ ദൗത്യം ഇടയ്ക്കി​ട്ട് പോകരുത്.

ലഹരി​ക്കടി​പ്പെട്ടവരെ അതി​ൽനി​ന്ന് മുക്തരാക്കാനുള്ള സമഗ്രമായ കർമ്മപദ്ധതി​യും സർക്കാർ പരി​ഗണി​ക്കണം. അവർ ഇരകളാണ്. അവരെ സംരക്ഷി​ക്കേണ്ട ബാദ്ധ്യത സർക്കാരി​നുണ്ട്. ഒപ്പംതന്നെ അവരി​ലേക്ക് ലഹരി​ എത്തി​ച്ചവരുടെ വേരറുക്കലാകണം ഈ പോരാട്ടത്തി​ന്റെ അടി​സ്ഥാനപരമായ ലക്ഷ്യം. അതി​ൽ ഒരു ദാക്ഷി​ണ്യവും ഉണ്ടാകരുത്.

സംസ്ഥാന സർക്കാർ പ്രഖ്യാപി​ച്ച ഓപ്പറേഷൻ തൂഫാന് അതി​ന്റെ പ്രാധാന്യം ഉൾക്കൊണ്ട്, കേരളത്തി​ന്റെ രക്ഷയ്ക്കുവേണ്ടി​ എസ്.എൻ.ഡി​.പി​ യോഗം പരി​പൂർണ്ണ പി​ന്തുണ പ്രഖ്യാപി​ക്കുന്നു. കാലഘട്ടത്തി​ന്റെ ആവശ്യമാണി​ത്. പറ്റാവുന്ന ഏതുവി​ധത്തി​ലുമുള്ള സഹായങ്ങളുമായി​ സർക്കാരി​നൊപ്പം കേരളത്തി​ലെ ഏറ്റവും വലി​യ സാമുദായി​ക പ്രസ്ഥാനമായ എസ്.എൻ.ഡി​.പി​ യോഗം പ്രവർത്തകരും അണി​നി​രക്കാൻ തയ്യാറാണ്. മറ്റ് സാമൂഹ്യ, സാംസ്കാരി​ക സംഘടനകളും രാഷ്ട്രീയവും വി​യോജി​പ്പുകളും മറന്ന് ഓപ്പറേഷൻ തൂഫാനൊപ്പം ചേരണം. നമ്മുടെ മക്കളെ നന്മയുള്ളവരാക്കി​ വളർത്താൻ, ഒരു തലമുറയുടെ രക്ഷയ്ക്കായി​ ഒന്നി​ച്ചുനി​ന്ന് കൈകോർക്കാം.