പറക്കമുറ്റും മുമ്പേ പിറക്കുന്ന ക്രൂരതകൾ

ചിങ്ങപ്പുലരിയുടെ ശാന്തതയിലേക്ക് കരുവാറ്റ ഗ്രാമം ഉണർന്നത് ഒരു സാധാരണ പുലരിയിലേക്കായിരുന്നില്ല; കേരള മനഃസാക്ഷിയെ ആകെ ഉലച്ചുകളഞ്ഞ ഒരു ക്രൂരകൃത്യത്തിന്റെ ഞെട്ടലിലേക്കായിരുന്നു. ഐഫോണും ആഡംബര ബൈക്കും സ്വന്തമാക്കാൻ തടസമായി നിന്ന 67 കാരനായ ശിവൻകുട്ടി ചെട്ടിയാർ എന്ന മുത്തച്ഛനെ സ്വന്തം കൊച്ചുമകൾ ക്വട്ടേഷൻ നൽകി ഇല്ലാതാക്കിയെന്ന വാർത്ത, കേവലമൊരു കുറ്റകൃത്യത്തിനപ്പുറം നമ്മുടെ കൗമാരലോകം എത്തിനിൽക്കുന്ന ഭയാനകമായ വഴികളിലേക്കാണ് വെളിച്ചം വീശുന്നത്.
ആഗസ്റ്റ് 14ന് വീട്ടിലെ സ്വർണം മോഷ്ടിക്കാനുള്ള 13 കാരിയുടെ ശ്രമം ശിവൻകുട്ടി കൈയ്യോടെ പിടികൂടിയതായിരുന്നു തുടക്കമെന്നാണ് പൊലീസിന്റെ നിഗമനം. സ്വന്തം ആഗ്രഹങ്ങൾക്ക് തടസ്സമായി നിന്ന മുത്തച്ഛനെ ഇല്ലാതാക്കാൻ ആ പെൺകുട്ടി കണ്ടെത്തിയത് തന്നോളം മാത്രം പ്രായമുള്ള മൂന്ന് ആൺസുഹൃത്തുക്കളെയായിരുന്നു. ആഗസ്റ്റ് 16ന്റെ ഇരുട്ടിൽ, വീടിന്റെ പിൻവശത്തെ മേൽക്കൂര ഷീറ്റ് തകർത്ത് ആ കൗമാരക്കാർ അകത്തുകടന്നു. തുടർന്നവിടെ നടന്നത് ക്രൈം സിനിമകളെപ്പോലും തോൽപ്പിക്കുന്ന ഭീകരതയായിരുന്നു.

കരുവാറ്റ കൊലപാതകം ഒറ്റപ്പെട്ട ഒന്നല്ല. സമീപകാലത്തായി കേരളത്തിൽ കുട്ടികൾ ഉൾപ്പെടുന്ന കുറ്റകൃത്യങ്ങളുടെ എണ്ണത്തിലും സ്വഭാവത്തിലും വലിയ വർദ്ധനവാണ് ഉണ്ടായതെന്ന് സ്ഥിതി വിവരക്കണക്കുകൾ വെളിപ്പെടുത്തുന്നു. നിസാര ആവശ്യങ്ങൾക്കായി കൊലപാതകം, ലഹരിമരുന്ന് കടത്ത്, ആക്രമണം എന്നിവയിലേക്ക് കുട്ടികൾ തിരിയുന്നത് സമൂഹത്തിന് വലിയൊരു മുന്നറിയിപ്പാണ്. ഈ മാസം 16നാണ് കൊലപാതകം നടന്നത്. 14 ന് പെൺകുട്ടി വീട്ടിൽ സ്വർണം മോഷ്ടിക്കാൻ ശ്രമിച്ചത് ശിവൻകുട്ടി കൈയോടെ പിടികൂടി. ഇതിന് പിന്നാലെ ശിവൻകുട്ടിയെ കൊലപ്പെടുത്തിയേ മതിയാകൂവെന്ന് പെൺകുട്ടി ആൺസുഹൃത്തുക്കളോട് ആവശ്യപ്പെട്ടതായാണ് സൂചന. പ്രതികളായ ആൺകുട്ടികളുടെ ഫോൺ ചാറ്റിൽ ലഹരി ഇടപാട് സംബന്ധിച്ച വിവരങ്ങളുമുണ്ട്. എന്നാൽ ഇവർ ലഹരി ഉപയോഗിച്ചിരുന്നോ എന്നതിൽ ശാസ്ത്രീയ പരിശോധന വേണ്ടിവരും.

ആഭ്യന്തരമന്ത്രിയുടെ സ്വന്തം മണ്ഡലത്തിൽ നടന്ന അരുകൊല അന്വേഷിക്കാൻ എറണാകുളം റേഞ്ച് ഡി.ഐ.ജി യതീഷ് ചന്ദ്ര അടക്കമുള്ള ഉന്നത പൊലീസ് സംഘമാണെത്തിയത്. അപ്പൂപ്പൻ വാതിൽതുറക്കുന്നില്ലെന്ന് ചെറുമകൾ അറിയിച്ചത് പ്രകാരം ശിവൻകുട്ടിയുടെ മകളുടെ വീടിന്റെ നിർമ്മാണത്തിനെത്തിയ അന്യസംസ്ഥാന തൊഴിലാളിയെ കൊണ്ട് വാതിലിനോട് ചേർന്നുള്ള ഗ്രില്ല് പൊളിച്ച് നോക്കിയപ്പോഴാണ് വിവസ്ത്രനായ നിലയിൽ മൃതദേഹം കണ്ടത്.

ബെഡ് ഷീറ്റ് കൊണ്ട് കാലിലും, കഴുത്തിലും, കാലും കൈയും ചേർത്തും മൂന്ന് കെട്ടുകൾ കെട്ടിയിരുന്നു. വീട്ടിലെ അലമാരയ്ക്കുള്ളിലും ആകമാനം മുളകുപൊടി വിതറി. ഇതേ വീട്ടിലെ അടുക്കളയിലുണ്ടായിരുന്ന മുളകുപൊടിയാണ് ഉപയോഗിച്ചത്. എല്ലാ സാധനങ്ങളും വലിച്ചുവാരിയിട്ട നിലയിലായിരുന്നു. വീടിന് പിൻവശത്തെ മേൽക്കൂരയിലെ ഷീറ്റ് പൊട്ടിച്ചാണ് കുറ്റവാളികൾ അകത്തുകടന്നത് . മൂന്ന് വർഷമായി വീട് നിർ‌മ്മാണത്തിന്റെ ഭാഗമായി കരുവാറ്റയിൽ താമസിക്കുന്നുണ്ടെങ്കിലും കുടുംബത്തിന് പ്രദേശവാസികളുമായി കാര്യമായ ബന്ധമുണ്ടായിരുന്നില്ല.

 ഡിജിറ്റൽ ഇരുട്ടിലെ കൗമാരം

ഡിജിറ്റൽ യുഗത്തിലെ അമിതമായ സ്വാധീനത്തോടൊപ്പം മദ്യം, മയക്കുമരുന്ന് തുടങ്ങിയ ലഹരിവസ്തുക്കളുടെ ലഭ്യത കുട്ടികളെ ക്രൂരമായ പ്രവൃത്തികളിലേക്ക് നയിക്കുന്നു. കുറ്റകൃത്യം ചെയ്യുന്ന രീതികൾ (ഉദാഹരണത്തിന് സിനിമകളിൽ നിന്നും വീഡിയോകളിൽ നിന്നും) എളുപ്പത്തിൽ അനുകരിക്കാൻ ഇന്റർനെറ്റ് സൗകര്യം ഒരുക്കുന്നു. കരുവാറ്റ കേസിൽ കൊലപാതക ദൃശ്യം വീഡിയോ കോളിലൂടെ പെൺകുട്ടി ലൈവായി കണ്ടത് ഇതിന്റെ ഭീകരത വ്യക്തമാക്കുന്നു. മാതാപിതാക്കളുടെ തിരക്കുപിടിച്ച ജീവിതവും ആശയ വിനിമയക്കുറവും കുട്ടികളുടെ മാനസികാവസ്ഥ മനസിലാക്കാൻ കഴിയാതെ പോകുന്നു.

 കണക്കുകളും ഞെട്ടിക്കുന്നത്

നാഷണൽ ക്രൈം റെക്കാഡ്സ് ബ്യൂറോയുടെയും കേരള പൊലീസിന്റെയും കണക്കുകൾ പ്രകാരം, പ്രായപൂർത്തിയാകാത്തവർ പ്രതികളാകുന്ന കേസുകളുടെ എണ്ണത്തിൽ കഴിഞ്ഞ കുറെ വർഷങ്ങളായി ആശങ്കാജനകമായ വർദ്ധനവാണ്. സംസ്ഥാനത്ത് വിവിധ കേസുകളിൽ ഉൾപ്പെട്ട് ജുവനൈൽ ജസ്റ്റിസ് ബോർഡിന് മുന്നിലെത്തുന്ന കുട്ടികളുടെ എണ്ണം വർഷം തോറും വർദ്ധിക്കുന്നു. മോഷണം, പിടിച്ചുപറി, ലഹരി വസ്‌തുക്കളുടെ വിപണനം, അടിപിടി കേസുകൾ എന്നിവയ്ക്കൊപ്പം കൊലപാതകം പോലുള്ള അതീവ ഗുരുതരമായ കുറ്റകൃത്യങ്ങളിലും കുട്ടികൾ പങ്കാളികളാകുന്നത് ഗൗരവത്തോടെ കാണേണ്ടതുണ്ട്. കൗമാരപ്രായക്കാരായ കുട്ടികൾക്കിടയിലെ 'കോണ്ടക്ട് ഡിസോർഡർ' പോലുള്ള മാനസിക പ്രശ്നങ്ങളും സമപ്രായക്കാരുടെ സമ്മർദ്ദവും ഇത്തരം കുറ്റകൃത്യങ്ങളിലേക്ക് അവരെ തള്ളിവിടുന്നു.

പ്രതിരോധവും സമൂഹത്തിന്റെ ഉത്തരവാദിത്തവും

കൈവിട്ട് കുട്ടിക്കളികൾ എന്ന് ലഘൂകരിച്ച് തള്ളിക്കളയേണ്ടതല്ല ഇന്നത്തെ കൗമാരക്കാരുടെ അക്രമവാസനകൾ. ഒരു തലമുറ മുഴുവൻ വഴിതെറ്റിപ്പോകുന്നു എന്നതിന്റെ ഉത്തമ ഉദാഹരണമാണ് കരുവാറ്റ സംഭവം.

1. കുടുംബത്തിന്റെ ഇടപെടൽ:

കുട്ടികളുടെ പെരുമാറ്റത്തിലും കൂട്ടുകെട്ടുകളിലും മാതാപിതാക്കളുടെ നിരന്തരമായ ശ്രദ്ധയും കരുതലും ഉണ്ടാകുക.
2. കൗൺസലിംഗ് സംവിധാനം:

സ്കൂൾ തലത്തിലും സമൂഹത്തിലും കുട്ടികൾക്കായി കൃത്യമായ മാനസികാരോഗ്യ കൗൺസലിംഗ് ഉറപ്പാക്കുക.
3. ലഹരിവിരുദ്ധ പ്രവർത്തനം:

സ്കൂൾ പരിസരങ്ങളിലും മറ്റും ലഹരി മാഫിയകളുടെ പിടിയിൽ കുട്ടികൾ അകപ്പെടുന്നത് തടയാൻ കർശനമായ പൊലീസ് നിരീക്ഷണം ഉണ്ടാകുക.

ഈ വിഷയത്തിൽ കൂടുതൽ ഗൗരവകരമായ ചർച്ചകൾ നടക്കേണ്ടതുണ്ട്. കുട്ടികൾക്കിടയിലെ സ്വഭാവവ്യതിയാനം തടയാൻ രക്ഷിതാക്കളും അദ്ധ്യാപകരും സമൂഹവും ഒരു പോലെ ജാഗ്രത പാലിക്കേണ്ട സമയം അതിക്രമിച്ചിരിക്കുന്നു.