നാളെ മണ്ണാറശാല ആയില്യം; പുണ്യ ദിനത്തിൽ ഓരോ നാളുകാരുടെയും ജീവിതത്തിൽ സംഭവിക്കുന്നത് എന്തെന്നറിയാം

റാംസാഗർ തമ്പുരാൻ, അസ്ട്രോ ന്യൂമറോളജിസ്റ്റ്, ഫോൺ : 91+83010 36352, വാട്സാപ്പ് : 91+7907244210, ഇമെയിൽ: samkhiyarathnam@gmail.com

2026 നവംബർ 2 (1202 തുലാം 16) തിങ്കളാഴ്ച

* മണ്ണാറശാല ആയില്യം.

(53 നാഴിക 36 വിനാഴിക വരെ ആയില്യം നക്ഷത്രം ശേഷം മകം നക്ഷത്രം)

[അഷ്ടമി തിഥി 17 നാഴിക 13 വിനാഴിക വരെ ശേഷം നവമി തിഥി]

(രാഹുകാലം 7.30 മണി മുതൽ 9 മണി വരെ)

അശ്വതി: രാവിലെ തന്നെ അനുകൂല വാർത്ത കേൾക്കാൻ യോഗമുണ്ട്. പഴയ നിക്ഷേപത്തിൽ നിന്ന് ചെറിയ തുക തിരികെ ലഭിക്കും. വാഹന യാത്രകളിൽ കൂടുതൽ ശ്രദ്ധ പുലർത്തണം. ഗുരുജനങ്ങളുടെ അനുഗ്രഹം പ്രവർത്തികളിൽ പ്രതിഫലിക്കും. സന്ധ്യയ്ക്ക് കുടുംബത്തോടൊപ്പം സമയം ചെലവഴിക്കും.

ഭരണി: മുടങ്ങിക്കിടന്ന ഫയൽ ഇന്ന് ക്ലിയർ ആകും. കലാരംഗത്ത് പ്രവർത്തിക്കുന്നവർക്ക് പുതിയ അവസരം തുറന്നുവരും. സഹോദരസ്ഥാനീയരുമായി ഉണ്ടായിരുന്ന അകൽച്ച മാറും. ഉച്ചയ്ക്ക് ശേഷം മനസിന് ഉന്മേഷം തോന്നുന്ന കാര്യം നടക്കും. ഭക്ഷണത്തിൽ നിയന്ത്രണം പാലിക്കുന്നത് നല്ലതാണ്.

കാർത്തിക: പുതിയ ജോലിക്ക് അപേക്ഷിച്ചവർക്ക് അഭിമുഖത്തിനുള്ള വിളി വരും. ഭൂമി സംബന്ധമായ തർക്കത്തിന് പരിഹാരമാകും. വിദ്യാർത്ഥികൾക്ക് പരീക്ഷയിൽ പ്രതീക്ഷിച്ച മാർക്ക് ലഭിക്കും. വൈകുന്നേരം സുഹൃത്തിന്റെ സഹായത്താൽ ഒരു പ്രതിസന്ധി ഒഴിയും. ദേവീക്ഷേത്ര ദർശനം ഗുണം ചെയ്യും.

രോഹിണി: കച്ചവടത്തിൽ അപ്രതീക്ഷിത ഓർഡർ ലഭിക്കും. ദാമ്പത്യജീവിതത്തിൽ കൂടുതൽ അടുപ്പം അനുഭവപ്പെടും. പൂർവിക സ്വത്ത് സംബന്ധമായ രേഖകൾ ശരിയാകും. യാത്രയിൽ വിലപ്പെട്ട വസ്തു കണ്ടെടുക്കാൻ യോഗമുണ്ട്. രാത്രി ഉറക്കം സുഖകരമാകും.

മകയിരം: എഴുത്ത്, മാദ്ധ്യമ മേഖലയിൽ ഉള്ളവർക്ക് പ്രശസ്തി കൂടും. ചെറിയ തുക കടമായി നൽകേണ്ടി വന്നേക്കാം. മക്കളുടെ വിദ്യാഭ്യാസ കാര്യത്തിൽ തീരുമാനം എടുക്കും. സർക്കാർ ഓഫീസിലെ കാര്യം വേഗത്തിൽ നടക്കും. ചെവി സംബന്ധമായ ചെറിയ അസ്വസ്ഥതകൾ ശ്രദ്ധിക്കണം.

തിരുവാതിര: വിദേശയാത്രയ്ക്ക് ശ്രമിക്കുന്നവർക്ക് അനുകൂല സൂചന ലഭിക്കും. പഴയ വാഹനം മാറ്റി പുതിയത് വാങ്ങാൻ ആലോചിക്കും. തൊഴിൽസ്ഥലത്ത് സ്വന്തം അഭിപ്രായത്തിന് വില കിട്ടും. കടം വാങ്ങിയ തുക തിരിച്ചു നൽകാൻ സാധിക്കും. ദാനധർമ്മങ്ങൾ ചെയ്യാൻ മനസ് തോന്നും.

പുണർതം: കുടുംബത്തിൽ മംഗള കർമ്മത്തിന് തീയതി കുറിക്കും. കർഷകർക്ക് വിളവെടുപ്പിൽ നേട്ടമുണ്ടാകും. വൈദ്യസഹായം തേടിയിരുന്നവർക്ക് ആശ്വാസം ലഭിക്കും. ഉച്ചയ്ക്ക് ശേഷം ഓഫീസിൽ നിന്ന് നല്ല വാർത്ത വരും. വീട്ടിൽ അതിഥി സൽക്കാരത്തിന് യോഗമുണ്ട്.

പൂയം: മേലധികാരിയിൽ നിന്ന് പ്രശംസ ലഭിക്കും. പുതിയ വസ്ത്രം, ആഭരണം എന്നിവ വാങ്ങും. നിയമപരമായ കാര്യങ്ങളിൽ വിജയം കൈവരിക്കും. പങ്കാളിയുടെ ആരോഗ്യത്തിൽ പുരോഗതി കാണും. സന്ധ്യയ്ക്ക് ഇഷ്ടഭക്ഷണം ലഭിക്കും.

ആയില്യം: മണ്ണാറശാല ആയില്യം ആയതിനാൽ നാഗപ്രീതി വർദ്ധിക്കുന്ന ദിനമാണ്. മനസിൽ വിചാരിച്ച കാര്യം നടക്കാൻ തടസം മാറും. കുടുംബത്തിൽ നിലനിന്നിരുന്ന ദോഷശാന്തിക്ക് പരിഹാരം കാണും. സന്താനഭാഗ്യം ആഗ്രഹിക്കുന്നവർക്ക് അനുകൂല സമയമാണ്. വൈകിട്ട് കുടുംബ ക്ഷേത്രത്തിൽ വിളക്ക് വയ്ക്കുന്നത് ഐശ്വര്യപ്രദമാണ്.

മകം: പുതിയ ബിസിനസ് തുടങ്ങാൻ ആലോചിക്കുന്നവർക്ക് ദിവസം നല്ലതാണ്. പിതൃതുല്യരിൽ നിന്ന് സാമ്പത്തിക സഹായം ലഭിക്കും. കലാപരമായ കഴിവ് മറ്റുള്ളവർ അംഗീകരിക്കും. യാത്രയ്ക്കിടെ പുതിയ സൗഹൃദം ഉടലെടുക്കും. തലവേദന പോലുള്ള ചെറിയ പ്രശ്നങ്ങൾ അവഗണിക്കരുത്.

പൂരം: പൊതുരംഗത്ത് പ്രവർത്തിക്കുന്നവർക്ക് ജനപിന്തുണ കൂടും. വീട് നിർമ്മാണത്തിന് പണം ലഭിക്കാൻ വഴി തെളിയും. വിവാഹ ആലോചനയിൽ അനുകൂല തീരുമാനം ഉണ്ടാകും. പഴയ സുഹൃത്തിനെ കണ്ടുമുട്ടി സന്തോഷിക്കും. രാത്രിയിൽ ആഘോഷത്തിൽ പങ്കെടുക്കും.

ഉത്രം: വസ്തു വിൽപ്പനയിൽ നിന്ന് നല്ല ലാഭം കിട്ടും. മത്സരപരീക്ഷയിൽ വിജയസാദ്ധ്യത തെളിയും. അമ്മയുടെ ആരോഗ്യത്തിൽ ശ്രദ്ധ വയ്ക്കണം. ഓൺലൈൻ ജോലി ചെയ്യുന്നവർക്ക് വരുമാനം കൂടും. മനസിൽ ഏറെ നാളായി കൊണ്ടുനടന്ന ആഗ്രഹം സഫലമാകും.

അത്തം: കടം കൊടുത്ത പണം തിരികെ കിട്ടും. തൊഴിൽ തേടുന്നവർക്ക് നല്ല കമ്പനിയിൽ നിന്ന് വിളി വരും. വീട്ടിലെ അറ്റകുറ്റപ്പണി പൂർത്തിയാക്കും. ഭക്ഷ്യവിഷബാധ ഏൽക്കാതെ ശ്രദ്ധിക്കണം. ദമ്പതികൾ തമ്മിലുള്ള തെറ്റിദ്ധാരണ മാറും.

ചിത്തിര: ഡിസൈനിംഗ്, ഫാഷൻ മേഖലയിൽ ഉള്ളവർക്ക് നേട്ടമുണ്ടാകും. പുതിയ വാഹനം വാങ്ങാൻ യോഗമുണ്ട്. കുട്ടികളുടെ പഠനത്തിൽ മികവ് തെളിയും. ബാങ്ക് ലോൺ പാസാകാൻ സാദ്ധ്യതയുണ്ട്. വൈകുന്നേരം ആരാധനാലയത്തിൽ പോകണം.

ചോതി: കോടതി വ്യവഹാരത്തിൽ അനുകൂല വിധി വരും. ശത്രുക്കളുടെ നീക്കം പരാജയപ്പെടും. വ്യാപാരികൾക്ക് കുടിശ്ശിക പിരിഞ്ഞുകിട്ടും. സഹപ്രവർത്തകരുടെ സഹകരണം ലഭിക്കും. കണ്ണിന് ചെറിയ അസ്വസ്ഥത അനുഭവപ്പെട്ടേക്കാം.

വിശാഖം: ഓഹരി വിപണിയിൽ നിന്ന് നേട്ടം പ്രതീക്ഷിക്കാം. ഗൃഹത്തിൽ സമാധാന അന്തരീക്ഷം നിലനിൽക്കും. പുതിയ കോഴ്സിന് ചേരാൻ തീരുമാനിക്കും. അച്ഛന്റെ ഉപദേശം ഗുണം ചെയ്യും. യാത്രയിൽ സൂക്ഷിച്ചില്ലെങ്കിൽ ചെറിയ പോറൽ ഏൽക്കാം.

അനിഴം: ജോലിയിൽ സ്ഥിരത കൈവരും, പ്രമോഷൻ ലിസ്റ്റിൽ പേര് വരും. രഹസ്യമായി സൂക്ഷിച്ച പദ്ധതി വിജയിക്കും. പ്രണയബന്ധം വിവാഹത്തിലേക്ക് നീങ്ങും. ഉദരസംബന്ധമായ അസുഖമുള്ളവർക്ക് ആശ്വാസം ലഭിക്കും. വൈകിട്ട് കുടുംബസമേതം പുറത്തുപോകും.

തൃക്കേട്ട: മംഗളവാർത്ത കേൾക്കാൻ യോഗമുണ്ട്. കെട്ടിടനിർമ്മാണം പാതിവഴിയിൽ നിന്ന് മുന്നോട്ട് പോകും. സഹോദരിക്ക് ശുഭകരമായ കാര്യം നടക്കും. മനസിലെ ഭയം മാറി ആത്മവിശ്വാസം കൂടും. രാത്രിയിൽ നല്ല ഉറക്കം ലഭിക്കും.

മൂലം: ഉന്നത പഠനത്തിന് അഡ്മിഷൻ ലഭിക്കും. ഗവേഷണ മേഖലയിൽ ഉള്ളവർക്ക് അംഗീകാരം കിട്ടും. വീട്ടിൽ പഴയ വസ്തുക്കൾ അടുക്കി വയ്ക്കും. കാലിന് ചെറിയ വേദന അനുഭവപ്പെടാം. സുഹൃത്തിന്റെ വീട്ടിൽ സൽക്കാരത്തിന് പോകും.

പൂരാടം: കുടുംബത്തിൽ ഒത്തൊരുമ കൂടും. പുതിയ വീട്ടിലേക്ക് താമസം മാറാൻ യോഗമുണ്ട്. കൃഷിയിൽ നിന്ന് അധിക വരുമാനം ലഭിക്കും. മനസിന് സന്തോഷം തരുന്ന മെസേജ് ലഭിക്കും. ഈശ്വര പ്രാർത്ഥനയ്ക്ക് കൂടുതൽ സമയം കണ്ടെത്തും.

ഉത്രാടം: ധൈര്യപൂർവ്വം എടുത്ത തീരുമാനം നേട്ടമാകും. പുതിയ ആളുകളെ പരിചയപ്പെടാൻ അവസരം കിട്ടും. പഴയ വാഹനത്തിന്റെ കേടുപാട് തീർക്കും. സർക്കാരിൽ നിന്ന് ആനുകൂല്യം ലഭിക്കാൻ സാദ്ധ്യതയുണ്ട്. വൈകുന്നേരം ചെറിയ സമ്മാനം ലഭിക്കും.

തിരുവോണം: ഇന്ന് അതീവ ശുഭദിനമാണ്. എന്ത് തുടങ്ങിയാലും വിജയിക്കും. ധനവരവ് പ്രതീക്ഷിച്ചതിലും കൂടുതലായിരിക്കും. ഭഗവാൻ മഹാവിഷ്ണുവിന്റെ അനുഗ്രഹം ഉണ്ടാകും. തൊഴിൽ മേഖലയിൽ സ്വന്തം വാക്കിന് വില കൂടും. കുടുംബത്തിൽ സന്തോഷം നിറയും.

അവിട്ടം: വാഹന ഭാഗ്യം തെളിയും, യാത്ര സുഖകരമാകും. വൈദ്യുതി ഉപകരണങ്ങൾ വാങ്ങാൻ നല്ല ദിവസമാണ്. സഹോദരന്റെ കാര്യത്തിൽ നല്ല തീരുമാനം എടുക്കും. കടബാദ്ധ്യതയിൽ നിന്ന് കുറച്ചെങ്കിലും മോചനം ലഭിക്കും. രാത്രിയിൽ ബന്ധുവീട്ടിൽ നിന്ന് വിളി വരും.

ചതയം: മുടങ്ങിക്കിടന്ന നിർമ്മാണം പുനരാരംഭിക്കും. ആശയങ്ങൾ പങ്കുവയ്ക്കാൻ പറ്റിയ സുഹൃത്തിനെ ലഭിക്കും. ലാബ് പരിശോധനാഫലം ആശ്വാസകരമാകും. വസ്ത്ര വ്യാപാരികൾക്ക് നല്ല കച്ചവടം ലഭിക്കും. പുണ്യസ്ഥലം സന്ദർശിക്കാൻ യോഗമുണ്ട്.

പൂരുരുട്ടാതി: അപ്രതീക്ഷിതമായി പണം കൈയിൽ വരും. വിദേശത്തുള്ള ബന്ധുവിൽ നിന്ന് അനുകൂലമായ വിവരം ലഭിക്കും. പുതിയ പദ്ധതിക്ക് അംഗീകാരം കിട്ടും. വീട്ടിൽ ചെറിയ ചടങ്ങ് നടക്കും. യാത്രാവേളയിൽ ഭക്ഷണം കൈവശം കരുതണം.

ഉത്രട്ടാതി: ദൈവാനുഗ്രഹത്താൽ മനസിന് ശാന്തി ലഭിക്കും. കലാകാരന്മാർക്ക് അവാർഡ് ലഭിക്കാൻ സാദ്ധ്യതയുണ്ട്. പഴയ കേസിൽ നിന്ന് മോചനം ലഭിക്കും. ദമ്പതികൾ ഒരുമിച്ച് തീർത്ഥയാത്ര പോകും. ഉറക്കത്തിൽ കണ്ട സ്വപ്നം ശുഭസൂചകമാകും.

രേവതി: മനസിന് കുളിർമ്മ നൽകുന്ന വാർത്ത കേൾക്കും. സഹായം ചോദിച്ച് വന്നവരെ സഹായിക്കാൻ കഴിയും. സ്വർണ്ണവുമായി ബന്ധപ്പെട്ട ഇടപാടിൽ ലാഭമുണ്ടാകും. മേലധികാരി കഴിവിനെ പുകഴ്ത്തും. സന്ധ്യയ്ക്ക് കുടുംബത്തോടൊപ്പം പ്രാർത്ഥനയിൽ പങ്കെടുക്കണം.