തിരുവോണം ബംപർ; ലോട്ടറി അടിച്ചത് സർക്കാരിന്, റെക്കോർ‌ഡ് വില്പന, അടിച്ച മുഴുവൻ ടിക്കറ്റും വിറ്റുതീർന്നു

തിരുവനന്തപുരം: തിരുവോണം ബംപർ ലോട്ടറി ടിക്കറ്റിൽ റെക്കോർഡ് വില്പന. അടിച്ച മുഴുവൻ ടിക്കറ്റും വിറ്റഴിക്കപ്പെടുന്ന ആദ്യ ലോട്ടറി എന്ന റോക്കോർഡ് ഈ വർഷത്തെ ഓണം ബംപർ സ്വന്തമാക്കി. 90 ലക്ഷം ടിക്കറ്റുകളാണ് ഇക്കുറി ഓണം ബംപറിനായി അച്ചടിച്ചത്. നാളെ നറുക്കെടുപ്പ് നടക്കാനിരിക്കെയാണ് കണക്ക് പുറത്തുവന്നിരിക്കുന്നത്.

ഇത്തവണത്തെ ഓണം ബംപറിന് നിരവധി പ്രത്യേകതകളാണ് ഉള്ളത്. ഏറ്റവും ഉയർന്ന സമ്മാനത്തുക, ഏറ്റവും കൂടുതൽ ടിക്കറ്റുകൾ അച്ചടിച്ചത് തുടങ്ങിയ കാര്യങ്ങളിൽ ഈ വർഷത്തെ ഓണം ബംപറാണ് മുന്നിൽ. ഇപ്പോഴിതാ അച്ചടിച്ച എല്ലാ ടിക്കറ്റുകളും വിറ്റുപോയി എന്ന റെക്കോർ‌‌ഡും സ്വന്തമാക്കി.

2026ലെ തിരുവോണം ബംപറിന്റെ ഒന്നാം സമ്മാനം 30 കോടി രൂപയാണ്. രണ്ടാം സമ്മാനമായി ഒരുകോടി രൂപ വീതം 20 പേർക്കും മൂന്നാം സമ്മാനമായി 25 ലക്ഷം രൂപ വീതം 20 പേർക്കും നാലാം സമ്മാനം 5 ലക്ഷം രൂപ വീതം 10 പേർക്കും ലഭിക്കും. അഞ്ചാം സമ്മാനം 2 ലക്ഷം രൂപ വീതം 10 പേർക്കാണ് ലഭിക്കുക. കൂടാതെ 5,000, 2,000, 1,000, 500 രൂപയുടെ നിരവധി സമ്മാനങ്ങളുമുണ്ട്. ടിക്കറ്റ് വില 500 രൂപയാണ്.

ലോട്ടറി വകുപ്പിൽ നിന്നും ഹോൾസെയിൽ ഏജന്റുമാരിൽ നിന്നും ചില്ലറ വില്പനക്കാർ വാങ്ങിയ ബാക്കിയുള്ള ടിക്കറ്റുകളും ഇന്നും നാളെയുമായി പൂർണമായി വിറ്റഴിയുമെന്നാണ് കണക്കാക്കുന്നത്. 90 ലക്ഷം ടിക്കറ്റുകളിൽ ഏറ്റവും കൂടുതൽ വിറ്റുപോയത് പാലക്കാട് ജില്ലയിലാണ്. 20 ലക്ഷം ടിക്കറ്റുകളാണ് ജില്ലയിൽ വിറ്റഴിച്ചത്.