ചെടിച്ചട്ടിയിൽ വളർത്തിയാലും മികച്ച കായ്‌ഫലം; ഈ പഴം ഉപയോഗിച്ച് ഫ്രഷ് ജ്യൂസും ജാമും അച്ചാറും തയ്യാറാക്കാക്കാം

നല്ല കടും ചുവപ്പ് നിറത്തിൽ ആകർഷകമായ ഫലങ്ങൾ നൽകുന്ന ഒരു കുറ്റിച്ചെടിയാണ് സവന്ന ചെറി. ബ്രസീലിലെ ഉഷ്‌ണമേഖല കാടുകളിൽ വളരുന്ന ഈ സസ്യം കേരളത്തിന്റെ കാലാവസ്ഥയിൽ കൃഷിചെയ്യാനും വളരെ അനുയോജ്യമാണ്. ഏകദേശം പത്തുമുതൽ 12 അടിവരെ ഉയരത്തിൽ വളരുന്ന ഈ ചെടി വലിയ ചട്ടികളിലാക്കിയും വളർത്താനാകും. സാധാരണ ചെറിപ്പഴങ്ങളോട് ഇവയ്‌ക്ക് ജനിതകബന്ധമില്ല. എന്നാൽ, ഇവയുടെ മധുരവും പുളിയും കലർന്ന രുചി ചെറിപ്പഴങ്ങൾക്ക് സമമാണ്.

കൃഷി

• ബഡ് ചെയ്ത തൈകൾ വാങ്ങാനായി പ്രത്യേകം ശ്രദ്ധിക്കുക. അങ്ങനെയെങ്കിൽ രണ്ട് വർഷം കഴിയുമ്പോഴേക്കും കായ് ഫലം ലഭിച്ചുതുടങ്ങും. വിത്തിട്ട് മുളപ്പിച്ച തൈകളാണെങ്കിൽ മൂന്നോ നാലോ വർഷം കഴിയുമ്പോൾ മാത്രമേ കായ്‌ഫലം ലഭിക്കുകയുള്ളു. ചിലപ്പോൾ അതിലധികം കാലതാമസം വരാം.
• നല്ല വെയിലുള്ള സ്ഥലങ്ങളിൽ വേണം തൈകൾ നടാൻ.
• മണ്ണിര കമ്പോസ്റ്റ് അല്ലെങ്കിൽ ചാണകപ്പൊടി, വേപ്പിൻ പിണ്ണാക്ക് തുടങ്ങിയവ ചേർത്ത് തയ്യാറാക്കിയിട്ട കുഴിയിൽവേണം തൈകൾ നടാൻ.
• വെള്ളം കെട്ടികിടക്കുന്നിടത്ത് തൈകൾ നടുന്നത് വേരഴുകിപ്പോകാൻ ഇടയാക്കും. വേനൽക്കാലത്ത് പതിവായി നനയ്‌ക്കണം.
• കൊമ്പുകൾ കോതിയൊതുക്കുന്നത് നല്ല കായ്‌ഫലം ലഭിക്കാൻ സഹായിക്കും.

ഉപയോഗം

• പർപ്പിൾ അല്ലെങ്കിൽ കടും ചുവപ്പ് നിറത്തിലുള്ള സവന്ന പഴങ്ങൾക്ക് ചെറിയുടേതിനോ നല്ല മധുരമുള്ള ചാമ്പയ്‌ക്കയോടേതിനോ സമാനമാണ് ഇവയുടെ രുചി. നല്ല മൃദുവായ തൊലികളോട് കൂടിയ ഇവ പച്ചയ്‌ക്കും കഴിക്കാം.
• ജാം, ജ്യൂസ്, അച്ചാർ തുടങ്ങിയവ തയ്യാറാക്കാനും സവാന പഴങ്ങൾ ഉപയോഗിക്കുന്നു.