'ശിലയായി മാറിയ പാമ്പ്'; തായ്‌ലാൻഡിലെ ഈ വിചിത്ര ഗുഹയെക്കുറിച്ച് കേട്ടിട്ടുണ്ടോ?

തായ്ലാൻഡ് എന്ന് പറയുമ്പോൾ പലർക്കും ആദ്യം ഓർമവരുന്നത് നിശാപാർട്ടികളും ബീച്ചുകളുമാണ്. എന്നാൽ അധികം സഞ്ചാരികൾ അറിയാത്ത മറ്റൊരു വശം കൂടി ആ രാജ്യത്തിന് ഉണ്ട്. ഗുഹകളും കാടുകളും എല്ലാമാണ് അതിൽ ഉൾപ്പെടുന്നത്. അതിൽ തന്നെ തായ്‌ലൻഡിൽ ഏറെ സവിശേഷതകൾ നിറഞ്ഞ ഒരു ഗുഹയാണ് നാക ഗുഹ.

തായ്‌ലൻഡിന്റെ വടക്കുകിഴക്കായുള്ള ബ്യൂയെങ് കാൻ പ്രവിശ്യയിലെ ഫു ലങ്ക നാഷണൽ പാർക്കിലാണ് ഈ മനോഹരമായ ഗുഹയുള്ളത്. ഒരു വലിയ പാമ്പിന്റെ ചെതുമ്പൽ പോലെ കാണപ്പെടുന്ന പാറകളാണ് ഇവിടുത്തെ പ്രത്യേകത. പാമ്പിന്റെ തലയോട് സാമ്യമുള്ള ഒരു കല്ലും ഇവിടെയുണ്ട്. സർപ്പദൈവത്തിൽ വിശ്വസിക്കുന്ന തദ്ദേശീയർക്ക് അസാധാരണമായ ഈ മല ഐതിഹ്യങ്ങളുടെ ഉറവിടമാണ്. ശപിക്കപ്പെട്ട നാഗദേവൻ ശിലയായി മാറി ഇവിടെ കുടിയിരിക്കുന്നുവെന്നാണ് വിശ്വാസം.

ഐതിഹ്യം അനുസരിച്ച് നാഗദേവൻ ഒരു ദിവസം ഉയിർത്തെഴുന്നേൽക്കുമത്രെ. തായ് ഭാഷയിൽ നാഗത്തിന് 'നാക' എന്നാണ് പറയുന്നത്. നാഗദേവന്റെ ഇരിപ്പിടമെന്ന് വിശ്വസിക്കുന്ന ഈ സ്ഥലമറിയപ്പെടുന്നത് നാക ഗുഹ എന്നാണ്. ദീർഘകാലം വെയിലും തണുപ്പും മാറിമാറി വരുന്ന കാലാവസ്ഥയും ശിലകളിലുണ്ടായ ഭൗതിക മാറ്റങ്ങളും വെള്ളത്തിന്റെ ഒഴുക്കും മൂലമാണ് പാറയ്ക്ക് ഈ പ്രത്യേക രൂപം ലഭിച്ചതെന്നാണ് വിദഗ്ധർ പറയുന്നത്. ഗുഹയിലേക്ക് എത്തുന്നതിന് കുന്നിൻ മുകളിലൂടെ ഏകദേശം ഒരു മണിക്കൂറോളം നടക്കണം.